今日去影相相呀

珮兒Master畢業啦,所以約咗Mabel, Iris, Giny 同我幾個人一齊影相.

去之前當然要買束花賀一賀佢啦,咁我就同埋Mabel,Giny去咗花墟,好彩人又唔算多,又有好多時間畀我哋慢慢揀,但係d花唔係太大束就係唔夠搶眼,再唔係就好似係男朋友送畀女朋友咁既款,都係留返佢的真命天子買畀佢求婚啦.咁多年朋友都唔知佢哋幾個鍾意d咩花,原來珮兒都係冇特別喜歡的花(據Mabel了解),Mabel 就鍾意鬱金香喎...(仲未知Giny喎?)咁我哋行吓一間,行吓又一間,由街頭行到街尾,揀來揀去,先揀好咗一束我哋幾個都認為係最靚既,咁啱就係鬱金香再加百合喎!


去到CityU舊地重遊,三樓四樓改建之後,好多地方都變咗,入口加咗兩幅好大的畫...段估應該係以國畫手法畫既兩個人,真係估唔到國畫都有印象派的,我個人就唔係咁懂欣賞喇.


恆生又搬咗位,又加咗商務書局,圖書館門口改咗闊落咗,民主牆又搬咗過對面,四樓多咗好多梳化,仲有個大鐘,成為新景點,不過我哋就冇影到.其實之前都知道呢d改動,不過唔講唔知,好細的羅馬廣場又摺咗裝修喎.


圖書館附近的電話都唔同咗.好懷念以前用果d"黑色按鈕電話"打電話返屋企,同屋企話唔返屋企...食!


講到影相,見到d人去石麒麟上完又落咁影完又影,擾擾攘攘又唔係影呢我就火都嚟啦,不過,又冇理又同佢地一般見識,同佢哋一齊失禮架?!咁我哋就忍佢哋啦!轉移陣地,反正有兩隻!不過有時都會遇到好人既,可能要我哋走,先要同我哋影咗先呱?!嘿嘿...以小丹之心,度君子之腹添.


今日的天氣好好架,有個好靚好靚的藍天,不過就唔係好多相有影到個天喎,哈,我其實好想同你哋影沙龍,不過算啦,自己知自己事,都係學好d攝影好d.


唔知點解,好似仲開心過自己畢業咁,不過就唔係影咗好多相...都夠架啦...但係對於我呢個太喜歡亂影的人...乜都想影一餐.


話時話今日唔記得同Mabel講多謝,多謝你隻好可愛的布象棋呀,我會好好哋咁掛住佢啦...我起初唔記得咗你係"夾"返嚟,仲問你點解唔買"將"或者"帥"呢,其實"相"仲啱我啦,我咁鍾意影"相"...如果我有個相機袋,我一定會掛嚟做識別架.


Iris走先去探佢媽媽,我地其他人仲一齊食晚餐添,返到屋企,隻貓又唔煮公仔麵喎,都唔知係唔係又打機打一個晏晝喇.不過呢隻貓都算乖,食完自己都會"舔乾淨"隻貓碟,唔駛我洗!