雯雯口吻: 一齊 ...

今日丹丹...樺爾一齊打機機呀...好玩,係呀,丹丹....丹丹好想同樺爾一齊打機呀...係呀...

第一次玩PS2版的NBA Live,上次都係見d BB玩,我都冇份玩.今日樺爾無啦啦話,不如打機囉,咁就打Houston 對Toronto啦. set 咗一輪config,都係用返Default啦.
同打電腦版一樣,想shoot就噤咗個dunk掣,又成日用緊姚明時唔知邊個係block ball 掣,我都搵唔到個插水救Ball掣既?!
打唔打得贏?第三節落後成廿分...我又做咗"朱西"....點追呀.
只係打咗一陣,不過成日打機的話,就冇哂時間啦.

九州大阪六天團行程

聽日就要踏上旅途啦...唔知會點呢...唔知會唔會唔慣呢.唔知會唔會同樺爾嗌交呢...唔知會唔會帶漏嘢呢...又唔知會唔會唔見嘢呢...仲唔知會唔會瞓唔著呢...希望一切都好好地順順利利啦. 行程海陸空都有,上天下海乜都齊,安排如下:
第一天
香港~福岡~中州夜市~特色拉麵大排檔(九州拉麵券 ￥1300@)~酒店 (東急 / 皇都 / 太子酒店)
第二天
太宰府~天滿宮~豪斯登堡 ￥1500@美食餐券,(晚膳自費),住豪斯登堡日航酒店
第三天
阿蘇火山(大型吊車往火山口)(如遇火山口關閉，改往猿猴劇場)~草千里~鹿兒島~城山展望台~天文館商店街,晚上住鹿兒島東急 / 霧島皇都露天溫泉酒店
第四天
宮崎~宮崎平和台~日南海岸~鬼之洗板~鵜戶神宮~志布志~ BLUE HIGHWAY LINE BLUE 【 12,000 噸 】客輪, 晚上客輪上享用自助餐 ~大阪
第五天
大阪城~環球影城(自費午膳)~大阪心齋橋~美國村自由購物~晚膳 (鐵板燒 / 特色網燒博多城 )~酒店
第六天
京都~嵐山美景~渡月橋~伊勢丹展望台~京都地下購物城(自費午膳)~機場~香港

要準備食的彈藥都要幾多...￥3000x5都要帶多d...早幾日兌的￥唔知夠唔夠呢. 又怕熱又怕凍的我唔知要帶幾多唔同的衫去呢...今晚又唔知瞓唔瞓得著.

倒數 - 距離仲有三晚的時間

今日試婚紗,遇到一個要揀六套婚紗的新娘... 搞到我唔夠時間試....6_- .
除咗佢之外,所有人都話佢著某一條好d,佢都仲要話自己鍾意另一條的顏色,就係咁話要哂兩套,連個sales 都忍唔住同佢講一晚要著七套婚紗會好趕,四至六套已經頂哂籠.之後就試嚟試去....駛唔駛問吓現場觀眾呀,快鬼d啦.
個sales都已經好攰,仲點會好細心咁同我試衫,仲唔啦啦臨收工走人!所以著咗套婚紗一分鐘,是但揀左一套首飾就算.都其實冇乜選擇,所樺爾又好快就揀咗一件背心同領呔就算喇.
呢間公司,你落單o個陣佢就對你客氣d,揀婚紗時想你揀多幾套又唔會對你太差,到你要試身喇,佢惡d你都唔可以要求佢畀d乜畀你揀.

今日阿d又入黎我哋間房傾計....又同我倒數啦... 7_7 :"你仲有X晚" 就係咁,每晚都擾擾攘攘到1:00am 6_@ (新娘子之所以大部份都又失眠又"謝",又熊貓眼,個原因只係一個,就係勞累咗幾星期,晚晚都好夜先瞓,搞到冇精神,第二日又係咁惡性循環)

今日有相攞

哈哈!話咁快就有相攞啦.小雲:"好緊張呀...." 小吉: "bu bi bu..."
每次到WA都落雨,今次仲黃雨添!褲腳都濕左一大截,點攞相呀...
去到WA,落雨都咁多人.入左去一個露天玻璃房,裏面放哂d相等人黎攞,其實光度唔係太足夠...唔知係唔係故意既.其實大相有一兩張都好似晒相過度曝光咁燶左,但係因為加左d effect都冇乜點察覺;但見到本細相簿,又好似曝光不足白哂咁.唯有再晒過,再攞過本細相簿啦. 6_+
可能天雨關係啦,個師傅都係唔多有心機,只係"是但"show 一 show d相就算,諗住佢地咁專業都應該冇問題啦,所以都睇得唔係咁小心.當我想再睇下d相時,個師傅就話咁快收哂d相嘞.不過個師傅都好好心地,又叫我哋落咁大雨,去化妝房坐下先,又叫我哋截的士咁...
落雨撘的士都幾狼狽,個心仲諗緊d相唔知仲有冇問題,搞到落車都雞手鴨腳咁.又要樺爾提先記得畀錢,畀完錢又唔記得除安全帶先落車,除返安全帶落車又唔記得開遮,開遮又唔記得要遮返樺爾同d相.
攞完眼鏡再食飯,返到屋企都9:xxp.m.,經四家姐睇一睇,佢又話個對裝相的相框應該要一對先係,但我又冇留意到佢唔同色.其他再睇番都幾好,好在整體來講都好滿意.
不過有時想,其實加左coating之後,d相好似暗左少少,可能唔加仲好,又或者黑房的師傅晒到咁...如果之前話唔加coating攞出去其他公司再加coating,咁到時有問題都唔知賴邊個.
唔知樺爾有冇同感呢...成晚都唔多出聲,攞住的相咁耐係唔係好攰呢?唔知你鍾唔鍾意個"貓樣年樺"feel 的o個張相呢?

五天天氣預報

弊...19日短暫時間有陽光,今朝仲係話只係局部地區有驟雨.冇法啦,要出嫁先黎落雨,唔通個天都唔鍾意我?!
6月16日 (四)
有雨26-29 C85-95 %
多雲，有驟雨及雷暴。 南至西南風3 至4 級。
6月17日 (五)
天色明朗26-30 C75-90 %
部分時間有陽光，有一兩陣驟雨。 南風3 至4 級。
6月18日 (六)
驟雨27-31 C70-90 %
部分時間有陽光，局部地區有驟雨。 南至西南風3 至4 級。
6月19日 (日)
驟雨28-31 C75-90 %
短暫時間有陽光，局部地區有驟雨。 西南風4 級。
6月20日 (一)
微雨27-30 C80-95 %
大致多雲，有驟雨。 西南風4 級。

......又或者聽日話有陽光呢.

在Myra的blog 留言一則

"我做野做到好悶,想起四家姐,好多日都冇睇你的日記啦,於是入左黎睇,唔知點解之前你當面同我講話唔捨得我的時候,我都只係眼濕濕,但睇到你的日記時....我竟然突然間係咁喊...其實我都好唔捨得你架... (我的手在顫!).多年黎一直照顧我,唔只係爸爸媽媽,有d心事又只有你先知...係最錫我的人...6_<~~~~~~~ 我唔可以再打落去...如果唔係,我的同事會發覺我喊緊啦.... "

家姐...其實我都好唔捨得你架!不過我又唔係去好遠的地方.....(想起Kathy添....都一樣咁唔捨得)只要你好番,我地成日可以去行街街玩,一齊去睇魚魚好唔好?

雖然唔係好啱對家姐唱....

在這離別的時候（國）

握著你的手　我要走不能走
簡單的再見兩個字　我說不出口
你那癡癡的眼光　訴說著無盡的哀愁
最痛心處　是你努力讓笑容依舊
我聽到我的心跳　一再說著不走不走
＃在這離別的時候
風也溫柔雲也溫柔 我眼裡有千千萬萬個你
每個你都是溫柔 我恨自己不夠瀟灑
為甚麼一步一回頭 我聽到我們的心跳
像是天籟的合奏 一再說著相守相守相守
我還是必須走　我鬆了你的手
簡單的愛你兩個字　我說不出口
看著你的眼睛　湧上了無盡的溫柔
最傷心處　是你努讓淚水停留
我聽到你的心跳　一再說著別走別走
REPEAT＃
曲：古巨基 詞：瓊瑤 編曲：BILLY CHAN 監製：古巨基

註:其實古巨基作曲都唔錯架,套劇集唔收得,就連首歌都被忽略,好浪費.相信真係喜歡古巨基的歌的人,一定會喜歡佢呢首國語歌,
因為聽佢的國語歌好有感覺

今日見到二家姐

一朝早,二家姐就打電話畀我,話依家出去驗身,順便下晝同我食lunch,我當然一口答應啦...
二家姐仲話可以幫我準備主車花球公仔,都不之幾好.我太懶啦,好多事都應該自己打點,但就成日靠其他人.好彩有咁多好關心我的人幫我手咋.

Lunch 好少唔同同事一齊食,但就連續上星期五同阿Lib,星期一同樺爾,今日星期二同二家姐都冇一齊食.
我就帶咗二家姐去 "Eimlie" (好似係咁串呱...係一間基督教的人開的茶敍間.)
入到去,見到都冇乜人,最啱我哋想慢慢傾的人啦.d餐選擇唔多.而且lunch算貴啦. ~$50 each.
不過係用錢嚟買個清靜的環境吧.

二家姐可能仲未改做老師的職業病...其實係好掛住我呱?我哋有好多嘢係咁講係咁講,好開心...其實我都係第一次咁樣同二家姐兩個人食飯咋.

我會好好記住同參考你的建議同經驗, 有時間我會去讀讀"男女大不同",煮得清淡一d,健康d...不過我學媽媽的煮法己經習慣咗佢味道啦...不竟如果可以煮到媽媽的一半功力,我都好開心啦.
唔知你同唔同意,其實唔要求要有山珍海味,但經常清清淡淡就可能會枯燥乏味,我都希望做到味道可以點綴生活,變得精彩...哈哈,妙想天開...人家肯吃你的嘢都好啦...

搬遷通告

敬啟者:
茲 因事先準備不足及過份高估自己重溫陳年物品的速度,家嚴加以督導下,是日搬遷演變大逼遷,尚有隨身物品、禮物、私人珍藏及電腦一部未能在限期內搬清,擇日再搬.
勞累了三姐姐及姐夫辛苦走一趟,煩請多多包涵...

(嘻...都話應用文全部俾返老師啦...寫到都唔似樣架)

做大排檔廚師,超過癮!!

做大排檔廚師,超過癮!!
http://maggiemarket.kizash.com/films/2748/166/index.php
Instruction:煮出他們要吃的東西 ，記住要放東西往他們的檯中才算成功。
１．將要煮的海鮮拖到鑊去；
２．煮的時候要時常炒，否則會燒焦；
３．將煮好的食物放到碟上，再將完成的食品拖到客人檯上，完成。
４．要開啤酒，先要用開瓶器開蓋，再拖啤酒到客人檯上，完成。 若食物未煮熟便熄了爐，要扔進垃圾筒再煮過。又或者煮好一款食品後想改款，也要放進垃圾筒再煮過。每放一次垃圾筒都要扣一次。
若客人等得太耐又或者送錯食物，也要扣分。

史上最無聊的網上遊戲

今朝Henry send咗個bubblewrap 堪稱 "史上最無聊的網上遊戲" ...完全同意..
不過有好多人都真係好鍾意呢d真的bubblewrap,好似我哋上次去咗一間五金舖買面鏡,一攞出黎,個老闆娘就係咁"啪"係咁"啪",喂呀姐...我哋要攞走架,你"啪"哂,咁保乜鬼護呀!

唉,最慘就係我外甥女瑩瑩,學足三家姐(佢mammy)咁有呢個"陋習",見到呢d bubblewrap,包住乜嘢都唔理啦.呢個都算啦...至少無傷大雅....
不過另一個陋習就...唉...上次四家姐要幫我剪髮,瑩瑩又黎咗家企喎,我怕佢悶,就比套"龍珠"VCD佢睇啦.我只係將個盒放响個電視櫃啫.點知瑩瑩見到,有條"沿著撕開"的包裝紙條黏住個紙外套,佢好順手就咁沿著撕爛咗我個套....6_<~~~我又點救得切呀.
我敢肯定瑩瑩係有呢鋪癮既...因為佢問都冇問就做嘞...

記錄-姊妹開大會

四年前同一日約左Mabel, Pui Yee,Ginny,Iris佢地一齊見面,估唔到今日會約左所有姊妹開大會.
記錄下人物先,按著認識的年期排:
Mabel係我中一的同學,係第一個會主動打電話搵我的中學同學....因為第一日返學就識左佢.
Ginny,Iris係中二的同學,係我"聊"女仔成果.之後一齊做"河伯搶親"的廣播劇功課,大家就熟起黎嘞.
隔籬班的Berry其實响中三已經成日見,不過只係一齊返屋企的"陌路人",成日見到佢同細妹一齊返屋企.到左中四,我地先正式認識,之後我就取代左佢細妹的位置成日同佢一齊放學.
成日都係响隔籬班的PuiYee就係中五時同Mabel一齊做暑期工時先認識的,之後雖然冇見好耐,但係就好似認左好耐的朋友咁.
可能做朋友都係講緣份同主動性...我就比較被動,好在中六時遇到Kathy,仲好記得佢捉我遊車河o個個情境...都係咁樣,我而家先會好地地咁坐車車咋.
今晚仲有一個對我好好的伴娘家姐都黎左坐鎮...Myra四家姐,病緊都出黎陪我,真係唔好意思.好在你己經好返好多...日食1.x蘋果...終於肥返少少啦...(讀到呢到你會唔會有好大滴汗? 4_0!)

言歸正傳...姊妹一行八人...(唔好話係X婆呀!反面架! 6_+)到左"夏雪"食晚飯...(好在有PuiYee幫手book枱...我真係好懶惰...唔該哂...hehe...).我哋一邊食一邊講...(我係長枱的一邊主要係食...長枱的另一邊就主力討論點搞呢個Function,點樣玩班兄弟)

hehe...內容就唔多講啦,遲d你就知.不過,我自己都做過姊妹,自問就冇佢地咁認真做定哂功課,仲有好多鬼主意,真係好感激...hehe...都係搞氣氛得啖笑架啫.
不過就唔係幾好意思...成日搞搞震唔俾咁又唔准咁....

唔准開Show 唔准污糟 唔准"喳"刀
....
唔准孟 唔准吞 唔准哼
唔准多 唔准拖 唔准摸
唔准拍手 唔准買酒 唔准帶狗 唔准走
....
唔准經常 唔准太長 唔准商量
....
喂 大佬 咁乜o野先准呀

節錄自 李克勤 - "希望 " 第五首 "唔准咁" 曲:周啟生 詞:余紹琪/Mic 編:周啟生
註:其實我唔係太喜歡呢首歌咋...克勤十年前的快歌...通常都會被飛.......

我終於明白點解我唔鍾意"星戰"!

!@#$#@!$#% 6_Q
原來我之前係睇左第四集的沙漠半個鐘,頂唔順之後轉睇第六集先.之後我就同好多人講...好唔鍾意"星戰"!
因為睇完"星戰III"改觀的關係,於是覺得可以睇睇個大結局...
俾佢呃左我地成晚...同細佬,家姐一齊睇,三人六眼,哂左我地足足9個鐘!我...差!
同MatrixIII一樣...根本唔應該拍第六集,索性將重點同第五集濃縮一齊做咪得囉!
我唔係要睇貍貓熊怪物,唔係要睇蟾蜍!!!!個Luke好冇用,單人匹馬自投羅網,唔用電光劍!但竟然個白痴國王硬要收佢為徒!加埋個鹹 Solo(音曰:濕佬)...充當成指揮,用所謂智取的方式涯打到片尾.
點解Darth Vader 要跟住個佢一隻手指都可以托起掉落街的人三集 ?!

睇星戰III

呢排都冇乜時間睇戲,聽好多人講,話呢套"星戰III"好好睇,但我就冇乜點睇過其他幾集,成日睇d唔睇d,而且星戰响我的記憶中好似唔多好睇,不過樺爾又鍾意睇...咁就冇計啦,早d起身去睇,兩個人都係$50,抵到爛!
睇完第三集,對"星戰III"的印象改觀左.雖然覺得個Anakin好似好笨咁,本來怕個Padme難產,為左佢先走去幫個議長,但係最終又激到Padme唔想做人.個議長話有起死回生的本事,但又唔幫Anakin去救Padme,之後個Padme都死左啦,個Anakin又會死心塌地咁跟隨個議長,除左因為要接住第四集之外,都唔知有乜理由咁樣嘞.
仲好記得Anakin同個Padme打情罵悄o個一段話:
Anakin #_#: 你真係好靚!
Padme O_+: 你真係咁認為?
Anakin ~_~: 因為我愛你.
好一句情人眼裏出西施!! -_-
唔知點解會加呢一段...可能個公主唔夠靚呱...仲有盲的都睇到個Padme大住個肚,個白痴Anakin仲要個Padme同佢講先知道,都幾...豬...
不過成套片都真係幾好睇,情節好緊湊.明知個主角係要變奸,但又唔想佢咁就變奸...矛盾!
搞到我都想睇下明珠台播的第六集添. 睇下Darth Vader 係點死既.
見到m&m個Starwars Flash 好搞鬼,好正. http://us.mms.com/us/mpire/

劭君四歲生日

為左入去屯門同劭君慶祝四歲生日,所以先咁早去睇"星戰III",姪女生日,好開心架,落住雨都要入去啦.
好在個個都係三.四點先到.去到大家姐新居,見到君君同羨寧都已經著住花女裙黎歡迎我o地俾個Preview版給我睇下.
之後又一齊睇飛機降落,每次見到飛機都會叫一次.."飛機呀..."
入到去大家姐的床上面仲失控...跳到床鋪都快爛啦.君君同羨寧見到個LCD TV又會好輕易就知道點開機,點轉台.不過都仍然係掛住跳.
四個BB玩NBA Live 都有唔同態度:
君君最大,至少知道點樣去試d掣,但係只係鍾意個"插水救Ball掣",個player插親水就係咁笑.不過可能君君有power,不嬲都係只有佢玩冇細妹玩.有兩個情況會有少少唔同:一係就兩個有得同時一齊玩,咁佢都仲會同其他表妹,或者指揮呵妹一齊玩;一係就佢玩厭o左,先到其他人玩.如果唔係,佢讓一讓其他人玩之後又覺得輪返到自己,就會想搶返黎再玩過.
瑩瑩第二大,都有d power,都會搶,但有我哋叫住佢排隊玩,佢都會守秩序先,而且較容易叫佢讓其他人玩.
雯雯最懂得清楚表達自己想玩乜,而且會向我地講左先"我都想玩呀...",得到permit先做.但係冇人理佢,佢又唔會發long 黎.不過會再講多次俾你聽佢想點.等我地幫佢安排.
羨寧好明顯成日受家姐指揮,家姐俾佢,佢就有得玩.佢見家姐笑,就會覺得好好笑,一齊笑到"look"地.
最搞笑係瑩瑩,响大家姐屋企到唔捨得走,仲要同daddy, mammy講 byebye叫佢地走先!