忘記咗個主角係四家姐

好耐未試過咁多人一齊食晚飯啦,有爸爸,媽媽,四家姐,阿Dee,原來仲有二家姐,同雯雯.樺爾唔得閒.所以得我去咋.


唔知係唔係樺爾唔係度,冇人同我爭同雯雯玩,一入門口,雯雯好乖,又歡迎我,又叫我食蝦唔好食個蝦殼尾.又好乖咁食菜菜,同樹樹 (西蘭花).


二家姐話雯雯好乖,食完生果又會自己洗返個碗,佢仲話連老師都讚雯雯有手尾,玩完玩具會收拾原位先走,好有責任感.聽到都開心.


之後,我戴咗個聖誕鹿頭箍,扮鹿鹿.


我就話:"我係鹿,我係鹿...."


雯雯就耍手拎頭咁話:"唔好扮啦!"


我同阿Dee都笑死,唔明佢點解唔准我扮,我就同雯雯戴個聖誕鹿頭箍,佢就扮鹿鹿.原來佢想扮.我仲以為佢嫌我幼稚添!阿Dee仲話我同佢都唔識戴頭箍,(其實我唔係唔識架!)


同雯雯一齊畫聖誕咭,雯雯都幾有創意,好鍾意一節節咁用唔同顏色畫.


我本來想教佢畫嚟送畀媽媽,我就想送畀佢的婆婆...我寫"To Ma Ma",點知雯雯見到,又想要.


最後,唯有加兩個"n"字,送畀"Man Man" 啦!


臨走先知,今日有三個大頭蝦,一人漏低咗一樣嘢,二家姐漏咗個眼鏡,雯雯就漏咗婆婆畀佢的聖誕咭,而我就連個電話都可以留低!好彩二家姐上返去攞咋!