聖誕節

細個過聖誕節冇乜聖誕節的氣氛,始終都係留嚮屋企.呢幾年,因為有好多個BB的關係,我哋都會好珍惜同BB玩的機會,同家人一齊過聖誕節,食乜,做乜都唔係好理.總之就係見吓面都好開心啦.


今日同D大BB玩扑傻瓜,我哋講解咗點玩之後,唔知係羡寧唔明呀,定係佢唔想扑其他人,我哋又逼得佢太緊,一時間唔知叫邊個好,我哋叫佢叫"家姐",佢就扁咀,跟住仲喊埋出嚟.因為佢成日都唔出聲,大家姐又話羨寧比較內歛.一向要佢叫人都有d困難,今次仲要叫佢叫其他人的名,可能太大壓力啦.兩姊妹都咁"薄皮",大個咗都唔知會唔會少少嘢都喊餐死添.


如果真係三歲定八十呢,呢幾個大BB將來可能會係咁:


一個做畫家 - 劭君:


君君畫畫都幾叻,佢自創的畫魚魚真係好得意,又有藝術家的脾氣,上次四家姐睇到佢畫個女仔,用咗紅色畫,四家姐一講"好似眼火爆咁",君君就扁咀啦!好在四家姐兕得返咋.


一個可以見大場面,做MC - 珮瑩:


佢會攞個咪,對住佢大聲講"各位,今日我哋要拋圈圈"...


一個做老師 - 雯絢:


雯雯成日都扮老師咁講解活動,大家姐話:"我唔明你講乜呀", 雯雯就話:"你唔明,我就講多次你聽啦"


一個唔知會唔會係舞蹈家?? - 羨寧:


今日睇阿妹羨寧的錄影帶,學校有個聖誕節表演,見佢年紀少少,節拍感一流,所有動作都做到足.好細膩架.


今日樺爾仲扮聖誕老人派禮物,不過就只係著紅d橙d,小朋友都唔知當唔當佢係聖誕老人啦.


呀妹31號生日,有份大份d的生日禮物,係一套七件的Winnie The Pooh食具.唔知呀妹鍾唔鍾意呢?


其他幾個呢就收到一份米奇米妮食具背囊套裝.係樺爾上次同我哋一齊去迪士尼買既.


至於媽媽呢,就收到一份好啱佢玩的聖誕禮物,就係Hello Kitty拋圈圈遊戲啦,媽媽都唔知玩得幾開心,仲同我講,我走咗之後,佢一次過拋五中五,幾叻!