Looks good

Sigma SGM2 mouse

My NBA fantasy lineup

多謝你地

呢排成日掛著搞四家姐間舖的野,一路都冇點見吓朋友同聚舊.


但係一send email真係好多人好擁躍嚟支持我地.


一個就帶女朋友嚟, 一個就帶朋友嚟, 另外有兩個就幫我嚮網上面賣廣告,真係好有心.


唔好講睇唔睇啱我地賣既野,就係專誠過嚟探我呢一份心意就已經好感動啦.


多謝哂你地呀! x5 倍!

有你一天

今朝返屋企,阿Dee播緊our most favourite,古巨基國語同名大碟,真係太正,首首都極好聽!


樺爾夜晚無啦啦又攞返古巨基的"Be my valentine"隻碟嚟播喎,其實我都冇心機聽歌...


聽到呢首歌...雖然唔係我最喜歡的古巨基 collection 之一,不過忽然覺得聽咗可以打一打氣...!


有你一天 - 古巨基 想聽呢首歌,按這裡再按上面Play掣

曲：張佳添　詞：林夕　編：張佳添

直到風　沒法飛　都可愛你
頭上雨　淋著你　使我妒忌
就算欠運氣　相信自己
隨時在困境中找到　陽光空氣

**就如夢想怕實踐不到便忘記
亦難以相擁到下世紀

@還有你一天　便等得到晴天
離紅日再遠　也總會及時發現
還信那一天　縱使不休不眠
憑一點堅持預見　明天的笑臉
（如果肯堅持下去　仍相信有你一天．．．）

沒有燈　沒有光　也可感覺你
留在我臉頰上那滴吻　不會墮地
為了愛護你　相信自己
能在白雪之中找到　微熱的蒸氣
repeat**@

咁就做成第一單生意啦

開舖啦!


四家姐,恭喜你呀,個幾月嚟的頻頻撲撲,終於開舖啦.潮話:Wa gai leu hwan he!(我為你高興!)


祝你心想事成,生意愈做愈旺,賺多d!


祝你早日準備好你的新產品,早日面世!Yeah!


今朝11:00a.m 起身,平時可以極速出門,但係今日開舖,當然唔可以失禮啦,熨件勉強見得人的衫著,平時好少化妝的我,今日要花多咗少少時間,因為要賀一賀你!


唔知點解,今日發覺好似好多人望我,唔知係咪我的化妝有乜問題,定係我的衣著....唔通,平時我唔多望人,只係因為我今日四處望人,所以先有呢個感覺??!6_@ 嘻...咪傻啦.


開舖先嚟抹玻璃門...真係好趕呀.好彩趕到吉時開舖!


四家姐的朋友送嚟的花籃好特別,配襯得好靚呀!希望呢個花籃可以帶多d客入嚟啦.


媽媽,二家姐同雯雯都嚟恭賀四家姐呀.


好彩二家姐d字靚d,"新張期內 全店九折 兩件八五折",我寫果張抛落垃圾桶好啦.


雯雯仲為姨姨祈禱添,佢話:多謝天父,賜MeiMei姨姨可以有多d客人入嚟買嘢,舖頭細呀,客人要一個跟一個入嚟買嘢!!哈哈...


媽媽仲幫手招呼客人入嚟睇嘢,不過今日入嚟睇嘢的人,都係呢個場的朋友或者sales居多,呢頭入嚟夾價,果頭去開舖....-_-


有幾件衫好明顯好多人會睇多幾眼,有兩個女仔入咗嚟睇一陣就走咗.


我因為要買個CD架,去咗Ikea行,買完返去頂替四家姐,四家姐呢頭走咗,點知果頭果兩個女仔行完街,兩個鐘後又返嚟喎,佢試身後就買咗條裙,我真係手忙腳亂呀,忙著打個九折畀佢,差少少連紙袋都唔知點入...好彩呢個時候四家姐返嚟救我...佢仲sale到另一個買埋條頸鍊,咁可以打個八五折!真係開心啦,咁就做成第一單生意啦!


其實...打咗個八五折,希望薄利多銷,客人會多d返嚟啦.


四家姐的朋友又嚟探佢啦,我都係時間陪返老公啦...老公,唔好意思呀,嘥咗你今日請成日假呆坐家中添...


四家姐話,佢的兩個朋友買咗嘢,仲有個女仔入嚟買嘢,真係一個好開始!


明天仍要努力!天使天使加油!

可恨最美一刻我並沒在場

你的努力,沒有白費,First Honour.....可恨最美一刻我並沒在場....


mms://wms1.ust.hk/itsc/congregation/2006/day3.wmv



恭喜呀...見到你之前post的video,超速行禮 ge 過程.. 我反覆扭到 1:34:44 睇咗十次! 好開心,好似大雄用法寶不斷咁replay靜宜讚佢好叻,咁黎replay你上台果一刻, First Class Honors!!!


It's my honour to watch the video! Proud of you! My tears ran down...

7-11 Hello Kitty 祝福

今日同四家姐去入貨,買買埋埋兩個喼.但係返到屋企睇,先知有d好似比聽到的價錢貴,到底係我冇留心,定係人地講得唔清楚呢?定係...人地以為我地似新手,所以蝦我地丫嘛...


入咗好多貴貨,希望客人喜歡就好啦.



呢排成日同四家姐一齊,真係有少少忽略樺爾....
樺爾真係慘啦,放工放得夜,仲要去我媽媽屋企樓下等我離開.....


今晚同樺爾去7-11,佢又想買熱浪薯片啦....入咗去買呀買,原來有Hello Kitty祝福電話繩送喎.我估樺爾想起班"BB女"呱?所以就買多少少野啦.


返屋企一拆出嚟,我反而想送畀四家姐呀.


四家姐,噚日的去Circle K 抽到既"sad"已經拋開啦,今日就有"順利","成功",同埋"親情"


拆開咗真係好開心呀!


雖然今日好努力咁趕,但係如果未準備好,就算可能趕唔到星期六或日開舖都冇所謂啦.反正星期六日都係破日,唔好話唔信邪呀.


講真,其實大家都好攰啦,最緊要就係抖足精神先做到野架嘛.我地抖一日,好好地休息一下都好丫.

最後衝刺一星期

四家姐間時裝舖就嚟開業啦,依家進入倒數階段的最後一個星期,但其實真正的裝飾設計先叫做剛剛開始.


11/3
同四家姐去旺角行返之前冇去過的牆紙舖,終於都揀定一款又平又靚既.有好的開始啦.貨架買的買,訂的訂,好似都幾貴,不過冇法子啦.


11/4
因為好似好耐冇陪樺爾,所以成日就留咗嚮屋企,冇陪四家姐,留待四家姐自己去入貨.


11/5
阿Dee畢業成家人影相,是日休息一天
我仲要趕兩場,IPA + Linux,上完真係虛脫.


11/6
Logo + 名片 電腦初稿完成啦!
Tamama 晚上返來啦.....唉.不妙.不爽.
裝修搞掂晒啦.好嘢!


11/7
一早起床,去四家姐再覆核Logo+名片,檔案太大,開唔到!失敗!!!
嗱嗱聲再重做過,名片面目全非.好在四家姐都接受到...
送出原稿製作,完工了!


11/8
四家姐漏夜趕工,今朝搞掂更衣簾,今日好似做咗好多嘢,打掃,貨架又提早送到,買埋蒸氣熨斗,衣架,裝飾.
今日真係有"苦力"的感覺,但係係我自己攞嚟,鬼叫我話唔駛帶喼去買衣架咩,真係不聽家姐言,吃苦在眼前.


聽日就要再入貨啦.仲有其他的"lum sum"嘢,聽日再繼續啦.如果星期五開到舖就好啦.星期六日都唔係好日,大事不宜...我就覺得唔好唔信邪啦.所以都係努力啦.家姐!

離家出走後後後記

Berry 生日,我通常都忘記咗,因為十月份生日的人有好多,屋企都有三個.所以感覺上年年都好似好隨意咁同佢慶祝.我真係太差啦...


本來要同四家姐睇牆紙,但係我一早同咗四家姐"請假",其實四家姐都唔駛我同佢去啦.不過我都可以做唔苦的"苦力"既.


同Berry又下午茶(其實係lunch嚟),又去宜家傢俬行咗好耐,真係乜都睇一餐,仲影咗幾張相,想畀四家姐做參考添,點知有位哥哥仔話唔可以影相喎...咁我就唯嘥佢的紙,帶佢張catelog走啦.


行行吓,咁又一晝啦,之後輾轉間去咗好耐都冇食過的Delifrance,哈,真係好,終於有軟麵包食啦,雖知道阿婆我冇牙吃呀嘛.


真係好耐冇咁傾過計啦,就咁就傾到差唔多十一點,Berry半講笑話,叫我同佢返屋企,唔知點解忽然有個想法,想去盡d,因為我應該冇乜機會會無啦啦走去朋友屋企玩借宿一宵啦.今次都係我第一次離家出走架咋.


打咗電話畀樺爾通知佢,原來佢呢個時候先準備離開公司....(慚愧...我就走去玩,佢就開會開到11:00p.m.)


嚮毫無準備之下,我上咗Berry間屋啦,佢真係一個乖孩子,好整齊呀!!


因為大家到冇準備之下,所以都好即興咁學起職業安全鬆弛肌肉的十招招式.剛剛條腰先好返,都係唔好做咁多啦.


講起西斜,無啦啦就講起細個都係住白田,屋企都係西斜,我地仲畫埋圖,又解說,又講細個去邊度,佢細個讀秀中幼稚園,我果間白田幼稚園都"摺"咗啦.


佢有個好朋友同我係同一間小學,而我讀的小學的四至六年級,每年彌撒先會經過佢間小學一次.


臨瞓前仲睇咗好多Berry細個的相,原來好多人細個都會對住個生日蛋糕影相,可能大家都唔明點解要對住個蛋糕誓願啦.唔知係咪通常都係掛住食糖,好似"嬲包包"咁影相.Berry當時又係咪食緊糖呢?


細個的活動範圍都有好多共通點,好似石硤尾公園咁啦,真係每年都會去影相咁掣,唔知,佢去動植物公園的時候,我又會嚮邊度呢?如果拍部電影或者寫漫畫情節,會唔會好似"NaNa"咁呢?


可能係因為睇咗好多相的關係啦,我發夢仲見到佢,佢的媽媽,話一齊要去見佢表姐添!真係好笑!

恭喜我啦!

醫咗咁耐,今日終於敷埋最後一敷藥啦.


雖然感覺好似唔係咁痛啦,仲有少少少少痛,醫師話得,我都信佢話應該得.醫師仲叫唔好"dum"懶個身,快d去搵工啦.之前的右膝醫好咗都要用多個幾星期先有力,家陣有腰骨啦,依家腳同大腿骨的關節又冇以前咁大聲"呱呱聲".真係好咗好多.


今日醫師仲同睇多次我隻腳,佢話我左腳踝好好,呢幾晚腳有d唔自然,佢仲幫我"拍一拍"腳指公的關節添."拍"完好似真係幾好.希望我可以瞓得好d啦.


因為呢掛成日要行街,所以都冇好好地休養生息,呢排仲有好多事情等住我去做....第一件事,就係搵工.


四家姐方面,我都好似冇乜好搞啦,希望四家姐舖頭搞得有聲有色,咁我都安樂哂啦.


不過.....好似個人仲未ready去搵工....唔通真係"dum"懶咗個人(唔"dum"都係個大懶人啦)?點算好?

藉著雨點說愛你

呢幾個星期日都要由下午上堂上到晚上,上多幾堂真係幾辛苦.早幾次重搞到胃痛.好彩呢兩次有你陪我食下午茶,所以呢兩次先冇胃痛啦.


相識咁耐都係呢兩次有單獨傾計的機會,可能我都係習慣一對一傾計啦,有時多一兩個人,講的話題都係好大圍一齊講得的野,所以當一對一的時候,就可以講多d切身d的話題.傾落,我反而覺得太理智可能令感性的人都變得太冷靜.有時候等待未知的未來都是一種折磨,有d事唔可以不變應萬變,因為人生要經歷的事實在太多,唔到你唔爭取時間...哈哈,講乜?都係唔好講咁多啦,希望你唔會覺得我太八掛啦. (少少咁都係真架.)


半年前嚮三家姐屋企,同三家姐&姐夫一齊睇咗呢套戲"藉著雨點說愛你",佢地話呢對男女主角拍完呢套戲就結咗婚啦.因為佢地認為人生苦短,想去做的事,就唔好遲疑,因為冇辦法控制下一秒的事.錯失的機會無可能好似戲劇咁爭取返來.其實睇完呢套戲,我都領略唔到呢套戲的重點,因為呢套戲天馬行空的情節太常見,不過都會令我有少少感動.


http://hk.movies.yahoo.com/050302/32/19y10.html/

番唱

今晚有李克勤上勁歌,又唱咗一d舊歌,果首關正傑的"殘夢"都係我以前的favourite!唱得真係好啦.但係古巨基版"喝采",同克勤版"喝采"都係唔夠陳百強原唱咁好.


克勤就唱自己寫d歌特別投入架,好似<<情非首爾>>同<<婚前的女人>>,即使d歌詞....佢寫都好過林x!


果首新歌<<天水圍城>>無論個曲譜同歌詞都唔夾佢唱,又唔好聽,就算佢搵個韓國豎琴高手黎演奏都無補於事.唔知佢係咪夾"演奏廳"夾到矇咗.失望!走火入魔!有音質,冇"音功".


唔係"一輪咀"唱就啱佢唱架嘛...清唱一堆冇音調變化的字把鬼麼...


圍住了刻薄?! [講乜呀...@-@]

人擠逼中便容易退步 [真正的逆思維....]

要見步行步 無車票又怎去覓去路 [唔望你有上文下理,單睇一句都唔知講乜!!]


天水圍唔衰都畀佢寫衰! 克勤真係要小心揀歌架...咪下下玩花巧,唔記得自己唱得正,唔駛靠綽頭.


早排睇電視見到古巨基番唱以前d經典歌.(一開聲就走音...玩現場都係克勤好d)睇古巨基唱就知佢鍾意邊首歌,因為好似唱佢自己鍾意的歌會投入d,同盡情d咁.好似呢首 叫"明天還要繼續"(譚詠麟原唱),都幾好聽架!都係向雪懷d詞好多多聲.打畀四家姐聽:


明天仍要繼續 (TVB電視劇"他來自江湖"主題曲) - 譚詠麟 想聽呢首歌,按這裡再按上面Play掣
曲：盧東尼 | 詞：向雪懷

沒有去試過 怎知它錯 就算我錯了 亦必須繼續
痛苦時有眼淚去中和 沒有去愛過 怎知它美
沒有你愛我 問怎可脫俗 那管它世界未原諒我
多奢侈的夢 一朝醒覺時盡變空 [呢句唔"老黎"...唔關事架]
你看我時沒有淚容 愁懷懸在半空
明天縱多苦痛 命運繼續來
一點不放鬆 明天冷風送 面上有熱情(未動我熱仍自我)
仍流過


古巨基版好聽好...............多 !!!

改名

因為好多嘢都幫唔到四家姐,改名呢d嘢就可以大家畀d input,我始終都係喜歡樺爾幫手改的果個名.不過四家姐仲想諗多幾個揀下,我已經搞盡腦汁,都唔知邊個叫做好名.


不過四家姐就喜歡我提意的window display, 咁都有d嘢叫做做過啦.


做生意真係好難.

祝你成功

成個幾星期東睇睇西看看,睇左好多間舖都唔敢去馬,始終因為租金太貴,要冒好大風險.可能係天意啦,四家姐以前都想過租的地方,咁啱租金大減喎.真係好多人都躍躍欲試.三家姐幫眼睇過都話ok,睇黎我同佢都要忙多半個月啦.


終於都選定地點啦.希望四家姐你身體好d,可以大展鴻圖!今生無悔!


至於我呢?身體好得九成九,如果再唔去搵工,恐怕都會畀人覺得有偷懶之嫌.

旅遊醒少少﹕台北捷運免費一日遊

2006-09-26 更新

【明報專訊】由即日起，香港旅客前往台北，只需要憑香港旅行社(網站 - 圖片)所蓋章簽發之「台北一日遊捷運車票換領券」、香港旅遊證件（只限BNO/SAR護照）及機票，到台灣觀光協會香港辦事處登記，便可領取台北一日遊捷運車票。數量有限，換完即止。


地址﹕香港上環德輔道中173號南豐大廈904室
辦公時間﹕上午9:00至下午5:00（星期一至五）
查詢﹕2581 0933

網上簽證: http://www.immigration.gov.tw

收拾殘局

雖然成個幾月冇返工,但係好似都冇好好地休息過.之前一想執屋,隻手就搞到甩皮.今日又再"的起心肝"執野.但係一睇到自己的舊物.不其然又好似以前咁,又變咗睇返以前.


我有兩個舊同學講起,佢地結婚到而家間屋都仲好似剛剛搬入去咁少野,因為佢地成日都"dum"野.舊的野,冇用啦,就唔要啦.


睇返我自己,就乜垃圾都要留,但係間屋就唔可以放到咁多野...哎...


睇下睇下,見到以前同學寫的信,見到一d冇再聯絡的同學的信,聖誕咭,生日咭...發覺我的記性真係好差.


睇返呢d野,忽然想起很多事,想起以前關心我的朋友.以前的我,好軟弱.多得幾位好朋友的鼓勵.寫信最多信給我的兩位朋友,已經離開香港啦.原來我成日都唔回信...真係太差勁啦.好在佢地都冇怪我懶,仲會同我聯絡.


佢地幾個仲唔知點解畀咁多驚喜,仲會自製好有心思的生日禮物,靜靜雞咁放入我個位呀,書包咁,真係好開心呀.


睇到以前因為阿Dee唔可以"夜麻麻"睇龍珠,要jot notes講故畀佢聽,之後又成日畫比達...


睇下呢d野心情經常大起大跌,又喊又笑.


睇到以前的日記,原來11年前我已經希望學電腦....當時真係幾天真.爸爸仲曾經想同我報名讀暑期班,但係我最後因為太貴冇讀到.以前要學電腦係好奢侈,到阿Dee年代,學電腦係正常既.


想到以前屋企冇乜錢,爸爸為咗我的前途都會肯花錢畀我學野,佢對我的期望,我依家都未達到....連工都冇返.之前成日考慮自己,從來都冇想過爸爸媽媽擔心.....好似<<愛得太遲>>的感覺呢...(歌詞的意思好...不過詞彙就...算啦,無謂咬文嚼字啦)不過,其實愛得未遲呀.


四家姐話,媽媽都問起我到底做緊乜,又唔返屋企....唉...其實我唔係唔想返,係唔敢返,只不過唔想成日畀佢知我仲未好番.仲係咁頽廢.日日都冇做野.


仲要醫多幾耐呢...幾日得唔得呀?我冇乜耐性啦.


愛得太遲 -- 古巨基想聽呢首歌,按這裡再按上面Play掣

愛得太遲

歌手：古巨基 | 作曲：楊鎮邦＠宇宙大爆炸
填詞：林夕 | 編曲：雷頌德

我過去　那死黨　早晚共對　各也紮職以後沒法暢聚
而終於　相約到　但無言共對　疏淡如水
日夜做　見爸爸　剛好想呻　卻霎眼看出他多了皺紋
而他的蒼老感　是從來未覺　太內疚擔心

最心痛是　愛得太遲　有些心意　不可等某個日子
盲目地發奮　忙忙忙其實自私
夢中也習慣　有壓力要我得志

最可怕是　愛需要及時　只差一秒　心聲都已變歷史
忙極亦放肆　見我愛見的相知
要抱要吻要怎麼也好　偏要推說等下一次

我也覺　我體質　彷似下降　看了症得到是別要太忙
而影碟　都掃光　但從來未看　因有事趕
日夜做　儲的錢　都應該夠　到聖誕正好講跟我白頭
誰知她開了口　未能挨下去　已恨我很久

錯失太易　愛得太遲　我怎想到　她忍不到那日子
盲目地發奮　忙忙忙從來未知
幸福會掠過　再也沒法說鍾意

愛一個字　也需要及時　只差一秒　心聲都已變歷史
為何未放肆　見我愛見的相知
要抱要吻要怎麼也好　不要相信一切有下次

相擁我所愛又花幾多秒
這幾秒　能夠做到又有多少
未算少　足夠遺憾忘掉

多少抱憾　多少過路人　太懂估計　卻不懂愛錫自身
人人在發奮　想起他朝都興奮
但今晚未過　你要過也很吸引

縱不信運　你不過是人　理想很遠　愛於咫尺卻在等
來日別操心　趁你有能力開心
世界有太多東西發生　不要等到天上俯瞰

在家千日玩

今日樺爾有中秋節補假,真係開心.好耐冇咁多時間一齊留嚮屋企啦.不過,唔係睇戲,就係打機,係咪好頹廢呢?


唔知佢呢排點解狂睇戲,我星期六先同佢睇戲,睇果套Bloomy Sunday(布達佩斯之戀),佢星期日等我,為咗kill time,又同Donald去睇花之忍者,Donald仲睇到"瞌眼瞓"添.真係可憐....但係套戲好似係佢揀家喎...


睇完戲,又去旺角買DVD...唔通真係咁多戲好睇?


呢套"下妻物語"係都係拍"花樣奇緣"的導演中島哲也喎,所以佢就買咗返嚟睇.


我的Comment....拍得幾得意,但係睇咗兩眼空空.冇乜得著.


但係唔知點解...我反而會想畀四家姐睇呢套戲.

IPA Lesson 3 + Linux Lesson 2

依家一到星期日,我就好似d中小學生咁,要走去上成日堂.一日要上兩堂兩三個鐘的課程本來都ok,好似仲冇細個成日讀d唔想讀果d堂咁悶.英語老師講書又幽默,電腦堂的野聽少陣又怕自己唔識.


不過,我呢幾日傷風,要上成日真係幾惡頂.不過唔知點解拍咗傷風丸都唔眼瞓呢,真係幾奇.


上咗成日,只係因為太遲食,有d餓到暈...


上埋今堂,IPA的基本功,Vowels + Consonants 發音都學齊啦.理論上,查咗字典就可以讀到個字出嚟啦.


不過th音真係幾難發音. 純正的美式 r 音就仲難學.呀sir話,要學最好就係細個學,玩口水都可以悟出發音的方法架喎... ==> 結論:由細開始就要學玩口水啦.


******************


去學 Linux 七成為學,三成為買Mac mini 啦.因為個課程半賣半送個Mac mini,又話可以一部機,裝windows + Mac + Linux 真係相當吸引.


去上堂呢班人都有八成人係呢個心態報名.可能佢地都係去玩多個去學,本身可能都識識地.


不過,我就係一個新手.所以會好小心睇住"碌屎"學(喂喂,上完IPA,學咗都要畀面用架!! 係notes!!唔係"碌屎")


因為阿sir冇教到一樣野,所以我就落堂去問佢,我的問題: "x 是什麼意思呀?" (好似台灣網站a-kuei.com.tw的阿貴問媽媽某句粗口 wa kao 是什麼意思呀?"咁....)


因為我上次又問佢同類的問題,但係考起咗阿sir,阿sir就講咗句:"你D問題都幾特別下喎..."(唔駛用呢招啦,呢招只係用嚟buy time架...)


不過算啦,佢都叫做答咗我,不過我就係唔知佢的答案堅唔堅啫...

衝動 Part2

今日敷完藥,醫師話睇多我幾日先可以講我個病仲有幾多日要敷...唔,應該咁講仲有一個星期要敷啦...但係咁都好啦,我應該開始準備見工的野啦....似乎太耐冇執,真係會花多d時間囉...


食完飯就去咗剪頭髮,今次係我繼01年以來第二次電髮.因為呢幾個月醫病,完全都唔理個頭.好似好"哩啡"咁.今日終於忍唔住去理髮啦.


希望睇落會精神d啦.哈哈...

人類消失 大自然重生

【明報專訊】英國《新科學家》雜誌報道，假如有一天人類消失，不出數日地球會出現另一番新景象，屆時瀕危物種恢復生長，污染逐漸消失。數十年後草木叢生，2萬年後人類痕全部消失，但若要輻射及人為化學物質蕩然無存卻是遙遙無期。


《新科學家》指出，人類滅絕後，光污染會即時消失，這由於無人再補充發電廠的燃料，人為光線很快熄滅。接農田、街道，以至如香港、倫敦(相關新聞 - 網站)等大都會將在50年內生滿植物，建築物陸續因失修、蟲蛀、腐朽而倒塌。「假若明日天光，人類不再存在，地球軌道也會即時出現變化。沒有維修，所有風災、水災和寒夜會蠶食荒廢的建築物，幾十年間屋瓦剝落，樓房倒塌。」


此外，逾1.5萬種瀕危物種即時恢復數量﹔1000年後二氧化碳回復工業化前的水平，2萬年後人類痕會全部消失。


Source: http://hk.news.yahoo.com/061012/12/1ul5r.html

衝動

本來只係約咗朋友等埋一齊去食飯,點知經過見到上星期心郁郁想買的果部手機有優惠,咁就無啦啦帶冧把轉台兼買機啦.


SE Z610i ....I love this mobile!!


其實都明知部機好易有手指模(我手汗咁多咁濕..都幾大鑊架...),冇headphone送,得送64Mb M2,冇閃燈,個相機冇蓋,但係...因為好like佢個樣.忍唔住就買咗啦.


不過部機都有喜出望外之處,可以連拍四張相,揀白平衡,揀影象顏色,又可以用機內調校光暗,對比度.哈...部手機好似相機咁.2.0 Mega Pixels...唔知d畫質係咪真係咁好啦.哈哈....仲有哥哥好喜歡的計時功能添...玩咗20分鐘有既"初心者體驗"....可能日後會#%#$^^$%^7@#$


影片同相片都可以即時用3G送出去個Blog添....個掣太易揀到啦.但係影下一張就要按另一個掣兩下先可以繼續影喎.唔啱畀屋企果幾個小鬼用!!


本來手機就只係用黎打電話打出打入啦,但係無啦啦因為個靚字就.... -_-


好似從來都冇咁衝動過,之前有工做都冇咁"大洗",正所謂一闊三大,應該都仲未有收歛的餘地!

穿Prada的惡魔

好耐冇睇戲,因為四家姐請我就畀面去睇下睇啦,多謝家姐!!!


呢套戲個故事本身就好簡單,不過就好多名牌衫褲鞋勁晒冷,對於我呢個冇Fashion認知的人,睇咗都係過眼雲煙.


不過唔知點解,四家姐同我都會睇睇下眼濕濕,我就中間無啦啦有d想喊,佢就尾聲先嚟感觸!!奇哉...


或者無業的人睇呢套戲會喊呱....莫非無工做,無得買靚衫....無可能...有工做都買唔起果d衫啦.


對於我,只可以得出一個好無聊的結論,就係:去搵工之前要裝身!

遲咗好多嚟的好消息

已經敷藥敷咗三個月啦,身邊的人,擔心有擔心既,問候有問候既,責備有責備既,加上四家姐忽然隻手都出問題,又去敷三日又唔再敷,到底係我有耐性丫,定係佢唔信人呀,就連我都開始冇心機醫啦.


噚日醫師話我隻腳可以敷埋噚日就唔駛敷啦.我都唔敢相信,怕今日佢又話我未得.


今日真係只係條腰有事,腳就唔駛再敷啦!!! 只係股骨仲有一個位置就好返啦.

廣告時間-花樣奇緣

昨天去看了<花樣奇緣>, 說實話, 我最初睇到預告片時就已經把它歸納為一定不看一類的電影, 到看了內容簡介後我又起了好奇心, 很好奇想看看導演究竟點樣來表達... (很有趣, 如果只看預告或者只看內容簡介任何一樣的話, 都不會引起我的興趣)


在表達手法方面, 意念很新穎, 畫面場面也很悅目, 音樂歌曲十分好聽, 故事發展引人入勝, 真的我的專心程度比看一些荷里活動作片高多了. 看完之後很有一份滿足感, 同時也覺得眼界開闊了, 原來... 電影是可以這樣拍的, 不得不說一句, 導演真是個天才!!


警告: 筆者喜好通常來說比較另類, 讀者如發覺"乃野", 本人概不負責...


P.S.: 發覺原來都幾多人單拖走去睇戲...

無心機打blog...

呢排其實冇做工,應該好多時間做其他野.但係唔係主婦手,就係病未好,想執屋都只係執咗d,又唔可以執屋.又泰國返嚟,又一個星期啦.


聽日又要上成日堂,都唔知自己咁學野吸收到幾多....


如果唔係tamama返嚟,本來今個星期都算開心啦.


至少,有野學,見返d好耐冇見的好朋友.好難得可以咁樣傾計架...


不過...Kathy 又走啦...以後更加少機會見啦... sigh.....

中秋節快樂

祝你們 中秋節快樂!!


人月兩團圓!!!


心想事成!

IPA Lesson 1

之前Mabel約我同珮兒一齊去上一個英文Demo堂(Prime English),聽完都好想進修一下英文,但礙於時間同$$$關係,就算想讀好D英文,都會為之卻步.我自問花唔起成一年多的時間個個星期去上英文堂.之前職業英語有資助都冇用到,真係好嘥.如果我仲有$10000資助,都仲可能會花一年時間...花少少錢就上咁多堂,真係幾抵.不過,我就用咗嚟資助PMP course,咁就冇計啦.


之後同Mabel珮兒商量過,都係學好音標先,所以反而報咗呢一間學.(Prime English又做咗助攻手添...)


我地呢個年代的香港人,通常都冇正確學好音標同拼音.細個只係靠老師教我地點讀,只係靠多聽多默書嚟教生字,老師學錯,老師教錯,下一代都一齊錯埋.到真係同外國人溝通,聽唔明佢講乜之餘,佢又更加聽唔明我講乜.真係好樣衰.


睇到三家姐個女瑩瑩學英文學得好好,只係得四歲咋,就會主動同外國人講英文,真係自愧不如.要我同佢講英文,有時都唔知點講.如果要小朋友教返我轉頭,更正我的讀音,咁就更加樣衰啦...作為一個長輩,唔可以咁差啦...


我將會學到的Phonetics,如果我地4-7歲就學會,真係可以大大提高自學英語發音的能力.而且學其他以國際音標教學的語言都有幫助.新一代的小朋友,唔好再好似我地以前咁無知啦.


***************
今日去旺角的國際音標學會(IPA)上堂,個講師講得好生鬼,一路都冇睡意.主要的內容同之前聽過的Demo堂係差唔多.

1. 港式英語學習常見問題,又有實例
自已試下讀呢d字啦,睇下你啱幾多....
Set 1:
car, far, big, book, look, cook
Set 2:
island, debt, hour, heir
Set 3:
viscount, receipt, corps, subtle, fasten, exactly
Set 4:
ballet, buffet
Set 5:
produce, discount, control, forget, cupboard, purpose, police
Set 6:
Fiona, Eliza
(唔知自己啱唔啱?網上好多發聲字典架,咁就要睇你係咪聽一套講一套啦.)


話你知,我Set 5 的字真係全部都讀錯哂...其實同年代的人可能都會同我一樣全錯!!!點解?因為我地其實係用以知的小部份字去估其他字的讀音,但係咁樣就會好易估錯音....若果大家都來自同一個問題教育基礎上,好多冇得解釋的"exception"其實係因為本身學錯的問題,e.g. 串字相同都唔代表同一個讀音.好似foot同food咁,中間係唔同音標架!


Set 3, Set 4其實都唔難讀,但係我就成日明知故犯,用港式音,真係好錯架.


2. Phonetics 同 phonics 的分別

原來phonics係畀native speaker 學閱讀,就好似我地中國人學識字咁,圖文配對,而唔係用嚟學拼音架!

發到音就默書默得出,咁都係未必啱哂架,因為英文都同樣係一音多字架...(e.g. see, sea, C 都係同音呀.)


3. 發音基礎,Elision(元音省略的方法)等.

set 3 就全部都係呢類字啦


4. 原 Vowels != Vowel letters 架!呢個真係影響寫作能力架.
好似點解hour 係用an, hotel的兩個讀音又會影嚮佢個 articles 係 a / an !


5. 歸納Vowels的種類及記憶方法
用口形,唇形,脷前,脷後的發音分辦,真係可以聽得出多d分別啦!

今堂只係教咗8/20 Vowels...仲要學多幾堂呢...

網上示範音標發音: http://www.ipa.edu.hk/ipaNew/ipa.swf (抄個flash,冇難度!!)


真係一堂應該一早就學的課堂!


多謝Mabel!我好想學呀!...呀,仲有呀...多謝珮兒呀,雖然我對馬騮仔Monchhichi冇喜好(我有個friend好鍾意架),但係都多謝你買的筆記簿呀!

追

雖然只係去咗泰國幾日,但係我已經大半個月冇好好地上網寫blog,睇blog,今朝用咗成個鐘四圍睇!


忽然發覺,完來我呢排忽略咗阿Dee,學佢話齋,有好多野miss咗,追唔返就好似白過...我真係睇唔切你個blog啦.


就算留返嚮UST,都有新的環境要適應,如果真係太辛苦日日要用2個鐘撘車,不如去將軍澳搵同學仔一齊租樓住啦...好過日日咁辛苦....以前見樺爾咁辛苦都唔知為乜.唉,如果我有份工,我會資助你.

返家翌日

第二朝11:00起身拾下呢d果d咁又一朝,出去睇醫師,都係要繼續敷藥,但係個膝頭就好返唔駛敷啦.


又返咗媽媽度,攞返d冬蔭功麵畀佢地,媽媽話大家姐精心為佢揀的絲織披肩幾靚,但係就冇機會用...哈,如果佢好似樺爾媽媽咁就會成日用啦.我地都揀咗一條畀佢.希望佢喜歡用啦.


同樺爾一齊執下屋,佢又再打新買返黎的NDS Lite 啦...見到佢咁沉迷,"係咁二"都要扭下計話佢啦!睇嚟我距離黃臉婆又近了一步啦!

泰國之旅 - 第四日 (後記)

待續....

我返嚟啦

11:00先出機場,同埋四家姐樺爾撘的士返荃灣都00:00,邊食mama麵邊睇無線播流金歲月第一集,之前的棟篤神探完咗添,冇得睇...唔想睇白痴妹,好野,以後早d瞓.


沖完涼己經2:00am,一"撻"落床就瞓著咗啦.


個trip點?遲d先打啦.

泰國之旅 - 第三日 (後記)

待續....

泰國之旅 - 第二日 (後記)

第二日
行程: 湄南河遊船河->大皇宮-> Zoo -> 南星 (in China Town)食翅

早上去食早餐自助餐,最好味就係果d粥,因為戒口,所以好多都唔食得.但係家姐話呢間水準幾好


10:30 撘的士去Saphan Taksin 站

11:00 買全日通船票,以為Tourist Boat 有英文講解好d,原來當地人講的英文真係聽得明就奇.不過都有驚喜既,就係有水送喎! 瑩瑩就全程係咁瞓.


今日係四日裏面最好天氣的一日.藍天白雲(但係仲有灰雲)沿岸都有好多有特式的建築物.


11:45 瑩瑩醒啦,佢只係撘咗一個站咋就落船.


12:00 路過市集買咗三頂帽,瑩瑩係都要揀青色,但係三家姐最後都係"幫佢"揀咗黃色!!


12:15 行去皇宮的路幾靚,但係大家都冇聽我提佢地要著長褲,要租褲又好似怕污穢而唔想入去.最後,我地都係係咁二嚮外面影幾張相.


12:30 Amulet Market

入咗一間大街中的室內食肆,可能係旅遊區的餐廳,個侍應的英文都幾好,仲同瑩瑩傾計添.瑩瑩仲跟音樂跳舞!


13:30 Dusit Zoo

撘的士去左一個似乎幾Local的動物園,唔多外國遊客,有水上單車,我之前都想同樺爾玩,但係香港就唔係咁抵玩.當地只係40B咋!不過要畀20B按金.四家姐唔係咁舒服,三家姐就留嚮岸上面同我地影相.所以係我同樺爾一架車,大家姐同三姐夫加瑩瑩一架車,真係好奇怪的組合!


玩玩下,有兩個當地女學生仲"聊"樺爾,無啦啦問樺爾我地係咪韓國人...乜樺爾一時似日本人,一時似韓國人呢....


我仲拍Video添,又睇都大蜥蝪,瑩瑩就猛話驚.瑩瑩落咗水上單車仲會走去岸邊推郁架車添,嚇死我地呀.


入到呢個動物園,發覺有d動物好似被虐待咁,關入籠的猛獸好虛弱,隻獅子瘦到難以辨認,真係唔忍心影相,所以冇得睇.除咗"猛瘦"之外,其他的動物就冇乜嘢.


入去動物園果陣,個守衛問我地由邊度嚟,我地話香港,咁佢就好Cute單一單眼咁講咗: Oh, Andy Lau!幾搞笑架.


今日應該係幾日行程裏面最充實架.我地仲路過好似古堡的Anantasamakhom Throne Hall的外面,再去大街上同軍人哥哥影坦克車添.d軍人好pro架,每次同人影相都會笑架.估唔到政變之後,咁就成為一個景點!!不過我地就遇唔到扮矇面超人的"超人"



18:30 唐人街 南星食翅

如果唔係嚟呢間南星餐館,今日都算幾好幾perfect,三家姐的朋友推介話呢間好食,旅遊書都有提過,咁我地就試下啦,呢間出名就係可以自己揀排翅,三家姐揀咗足夠做兩種味的翅,真係太多啦,用咗7600B!!!其實少d份量的4600B似乎已經夠啦....食落點知得個鹹字. Thumb down!


其他都係好鹹,所以相比之下,難怪免費添飲的菊花茶成為招牌甘露啦,旅遊書寫的真係大有玄機!!!


除咗負責點菜同添飲的服務員之外,其他人好似好得閒咁,好似食客唔係咁多.走的時候仲幫我地寫菜的泰版車太賢同我地叫的士添.當時落住雨,佢都好細心咁為我地"擔遮".佢就幾殷勤啦...但係始終食物唔得,都係差差差!!


10:30 am 同瑩瑩添UNO同食冬蔭功


今晚都幾開心呀!!

泰國之旅 - 第一日 (後記)

第一日 Ocean World + Big C


7:00 機場集合
人物: 三家姐連同阿圖+瑩瑩,大家姐,四家姐,我同樺爾
三家姐同瑩瑩都唔舒服,所以好"mun"先嚟到. 搞到大家都好心急


10:30 當地時間慢一個鐘,落機都仲係好早.去兌換咗泰銖,都唔知夠唔夠用添...


11:00 去的士候車處,我地要咗兩架的士返酒店,一架三家姐一家人,另一架就係大家姐四家姐,我同樺爾.每架車都會有一張黃色的出租咭寫好目的地,但係三家姐一家人的果個司機搶埋我地的出租咭,樺爾就問返三家姐攞佢手中的另一張咭,畀司機搞咗一搞,三家姐又連佢手執的地址都畀咗樺爾.因為三家姐唔知我地酒店的地址,個司機好似扮唔知目的地既地址,車咗三家姐佢地去第二度,之後仲想問佢攞多d錢.後尾樺爾又畀多咗50B畀佢地添...當地司機有好多都好呃錢.


我地就一早返咗酒店,等咗半個幾鐘,手機又打唔出,只可以用SMS通訊,但係來來回回,就算我地畀返個地址三家姐,都幫唔到佢,都唔明當地的司機咁多地方唔識點出嚟行!


6_@ ==> Very Bad impression!!

11:45 Check in Swissotel Nai Lerk Park Hotel, ai...當地人好似唔知乜叫Swissotel,因為酒店改咗名,當地人只係知泰文拼音.不過呢間酒店的服務都幾好,服務員的英文水平同態度都好好.不過就一日執幾次房,都唔知點解咁密.


12:00 就快落雨咁,都係留咗嚮酒店食Buffet,呢一餐比想象中好,750B per person, 唔包drink, 7個人,4980B.Lunch嚟講都算貴啦.


14:30 第一站,Siam Station

嚮香港車費的收費方式,通常都係用年歲做指標,但係當地好多都用高度做指標,> 90 cm 的瑩瑩都要計一人的價錢.因為瑩瑩嚮香港成日畀人問佢幾多歲,去到泰國,佢打頭第一句就係"I'm 4 years old!"


Siam Center, Siam Paragon, Siam Square 等等 都係當地的大型百貨商場. Siam Paragon就好Grand,尊賣超貴價品牌.但係估唔到d Shop 的Display 都幾靚,唔似得香港d shop 得個名冇乜Theme,真係好似入咗Virtual World 咁,幾有Cyber feel.當然,我都只會Window Shopping 啦.



花咗每人500B買套票入去Siam Ocean World,為就係入去睇下海洋生物,上吓玻璃船睇魚魚,鯊魚咁.呢個號稱全亞洲數一數二大的海洋水族館,如果有心去都唔好坐玻璃船,隻船行一圈就係咁多啦,又冇乜有用的講解!一艘船八個人,同我地一齊仲有個鬼佬,猛同樺爾講佢自己出海捉鯊魚.唉....坐咗都唔覺得學咗野.


不過同小朋友去,有時睇下呢d水族館都無妨既,話哂有d魚魚睇下咁啦.至少可以睇到鯊魚瞓覺,睇到成個頭咁大條的Butterfly fish, 腳長長的Giant spider Crab (大家姐成日講:應該都會好好味!真係畀佢笑死!)


呢個水族館有一個成十幾尺深的大水池,d魚超級大,仲有一塊斜向下的玻璃窗,企入去就好以自己身處水底一樣.呢個設計真係一流.D Butterfly fish好鍾意游向人個頭度,隔住玻璃都幾得意架.


呢度用咗兩個鐘左右.


17:30 返酒店,點知落雨,其實可能大家都想留返嚮酒店,但係大家都唔敢講...


19:00再出返去Big C 晚飯,唔知點解,無啦啦入咗去日式拉麵快餐店,價錢平,味道一般,份量好似下午茶.兩個男士睇怕都係要買d杯麵啦.


20:00 Big C Supermarket


好多野買,但係冇時間揀,揀咗幾件衫仔畀幾個姪女,兒甥女之後,當然唔可以錯過內衣部啦...6_~


我地仲買咗兩箱冬蔭功麵添.yeah!

泰國之旅後記 (前言)

自遊行本來就係可以自遊d咁安排行程,但係同樣亦畀咗好多Hae的機會.未去之前都冇好好地講好行程,因為三家姐話,就算計劃好咗,去到都未必係果回事.


計劃咗的三日半行程就係頭尾兩個半日行街shopping,頭一日去Siam Paragon 入面的 Ocean World 睇魚魚,半日去湄南河遊船河+泰式建築物觀光,再去ChinaTown食翅,一日或半日去Dream World 或者去蘇梅島游水,三家姐同四家姐就想搵時間去個Spa或按摩.


唔知有幾多個真係去到?!

呢個星期過得好快

呢個星期過得好快,仲係每日敷藥,好似每日都冇咗半日咁,一來一回,加埋食飯,咁就一晝.之後,又會同四家姐行街,有一日就見下Kathy,又或者走去圖書館睇書,計劃一下泰國行程.畀個泰國政變嚇一嚇,搞到成日要搵旅行社問東問西.好彩好似平息咗,咁先安心d去玩下咋.


差不多每日去敷藥之後,都會去對面間強記美食屋茶餐廳食嘢.d阿姐見得我多都認得我,但係都唔會有乜著數畀我架,好似星期四帶Kathy去食Lunch,飲凍檸賓都係要加$5!


講真,我唔係貪佢有乜嘢好食定係佢開口埋口叫靚女,人地唔知以為我因為佢好味先日日去,其實我只不過因為呢間茶餐廳的廚師唔會加好多嘢一齊煮,反而係煮熟就食得果種,唔似得d懶有研究烹調方式的餐廳又要落東落西去煮一大輪,我就係怕有d "invisible"既野落左我會敏感.如果個廚師知道咗,唔會唔會好失望...哈.


不過呢間茶餐廳的炒粉麵飯都ok(不過我好多都唔食得...),價錢好大眾化,所以好多比較粗豪的人去食野....(包括我在內),不過最怕就係d煙味!


果度有個新黎的阿姐,一時又話我似佢以前的同學,一時又問我係讀書定係做緊野,點解咁得閒日日落去茶餐廳.哈哈,我真係想講笑話:我係你老闆派黎的臥底...你信唔信呀?!


我就話:我無業架!


佢當然唔信啦.不過佢就講:你咁靚女,去做酒樓都得啦,點會冇野做呀....-_-真係唔知好嬲定好笑!

新朋友

人大了,有時候唔係好想識太多朋友.因為自問很幸運的我,好朋友多的是(喂...咁自大?)


有時候覺得識人好易,交朋友就唔係咁易,維繫朋友關係更難.其實以我咁懶的性格,有幾個知心朋友已經好好彩啦.


不過幸好我所結識的朋友都對我好好,好關心我.就算我幾咁懶,冇成日聯絡,一聯絡就滔滔不絕.


因為咁懶的關係,就畀個藉口自己:幾個知心朋友就夠啦.有時間就用黎維繫朋友關係啦.真係唔想主動交新朋友.


不過,開始寫blog,開始睇朋友的blog,開始見到朋友的朋友在朋友的blog中留言.發覺原來經常引證"物以類聚"或者"近朱者赤"(唔係近豬者...-_-)的道理.再而會唔會惺惺相惜(唔係猩猩呀...6_^!)就要睇下會唔會有機會交流啦.


噚日認識的新朋友,行姐同小音符都係Kathy的好朋友,因為成日睇到Kathy blog 裏面提及的人,有時真係有d想見一見佢的朋友.哈...就好似Kathy都去探Mabel的Hompy一樣.不知不覺,好似我都同紅魔鬼,Dick Dick相識咁.


雖然噚晚唱K的活動,唱歌多過說話,但係從選歌都可以知其一二...嘩...周杰倫呀...嘩...范曉萱呀...嘩...呢首好呀...嘩...八十年代的金曲呀...咦~~~...七十年代金曲呀....所以佢地走咗啦....


大家都唱得好高興呀...不過我同Berry都係要學多d新歌啦...哈哈...我都唔可以成日左克勤,右巨基,前燕姿,後杰倫咁架...


因為Kathy的離港,認識到佢的新朋友.真係一個好特別相識,你話係咪?引見之後,自己就飛走喎....


6_<~~~ 唔.....嗚嗚.....


下年年頭去馬來西亞,唔知係一個奢望,定係夢想呢...一切都好似太遙遠咁.原來,當失去工作的時候,承諾都變得奢侈.

望莽忙妄忘

打打下又reboot...打打下又reboot...唉.........


今日的心情真係起伏不定....


朝早洗牙望都唔敢望個牙醫,因為好耐冇去洗牙,好鬼醜怪.望住天花柀,想佢乾淨d,快d就好啦.


對四家姐的莽撞...唉,我希望唔會有下次,我想同大家一齊開開心心去旅行,就當乜事都冇啦.好唔好?


忙住confirm酒店,去二家姐度,同雯雯玩,睇雯雯做功課.仲可以陪二家姐送雯雯學畫,真係好開心.
仲無啦啦爭住送雯雯一件生日禮物添,真係好有用.希望雯雯快高長大,聰明又聽教.


夜晚同Mabel,珮兒一齊聽國際音標示範堂,心想,就算幾好都好,我都係會三分鐘熱度,又未必會學得好,都係算吧...唉...真係妄自匪薄!!!


弊! 掛住打字,忘記沖涼添.

Tamama

好耐之前有一次同瑩瑩一齊去玩具舖睇到軍曹,佢只係識得Keroro,原來仲有一個叫Tamama,一個叫Karara之類....


不過我通通都唔鍾意.唔鍾意!唔鍾意!一萬個唔鍾意!


尤其係Tamama!!


只要佢唔好留咁耐,我可以忍受.佢唔打電話就返屋企,我都算,佢話走又唔走,又唔打電話....我都忍.


今次畀佢睇到屋企好混亂,佢就到處執拾...搜索...查獲.好了,我被逮捕了....


佢搞唔清,呢個已經唔係佢話嚟就嚟,話走唔走的地方.佢所以為要負的清潔責任,已經一早唔關佢事.佢打理,就算佢出於幾好心地,我都反而會怪佢多管閒事.


佢唔會明,就算佢幫我洗埋個洗手盤,就算佢同我掃地.佢只會令我反感.


因為好多都唔夾,我唔發作,只係我忍得,但係我都要搵地方發洩....


我尊誠去買好d的餸菜,煮畀佢食,但係佢就打咗底先返屋企,又話要增肥,又話我蒸魚太老,湯太清,菜唔夠"lum",蕃茄唔夠多油,又話要放多d鹽...口口聲聲話唔好食唔健康的嘢架...佢已經冇咗正常的味覺,但係我已經刻意加多少少鹽...都係失敗.


第二日仲情願去食老麥的麥樂雞,又唔打電話講聲,等我煮咗佢份,又唔駛食咁款啦.畀佢玩死...佢唔見我煮,佢又會話我地食埋哂d唔健康的嘢,佢返屋,我又冇理由唔煮埋佢果份,好似刻薄家婆咁.真係好屈!!!


佢都好免為其難咁再試食,我冇洗多菜,佢就只係食菜!我為佢準備的豬手,佢只係食咗一件,佢真係好畀面架啦.雞翼就佢唔食仲好,我食多幾隻啦.


就算我為佢放多咗鹽...我唔落辣,佢就唔合口味....佢都只係會用呢個方法"宣洩主權".何苦呢...如果唔啱,不如早兩日走啦...佢留多一天只會多添我一日的煩惱.


佢只係用自己的角度睇野.因為佢的字典係唔會有"通氣"呢個辭彙.


6_@ 點解,又未走架....

再見了爆炸王

因為之前的成個星期都用咗嚟handover,明明辭咗工啦,但係星期一先開始收拾留嚮公司的剩餘物資.仲留咗成個下午,一個星期以來,還是天天敷藥.還是天天路過爆炸王,每天拿一小袋放在公司的物品返屋企.仲有一日同"舊同事"一齊食飯,另一日又同一樣係即將轉工,當日剛好last day 既阿Su食Lunch.


唔知點解,咁又一個星期啦.唔知自己日日忙乜...


足足用咗一個星期去沖淡離職的感覺.原來真係唔係一件怎麼樣的事.再見了.爆炸王!


聽日係so call 的"last day".....9-11,哈....唔會有大事發生呱?!


(註: 喂,我唔係特登玩嘢,玩9-11辭職架.....)

想打好耐啦

想打呢首歌好耐啦.....


Yeah!!!! 聽日Runaway!


Runaway - 陶吉吉 想聽呢首歌,按這裡再按上面Play掣

作詞：陶吉吉/娃娃　作曲：陶吉吉

無名的怒火　有說不出的無力想敲打我自己
os:太陽快要下山了　什麼都不做　只拿著遙控器　一直不停的換台
麻木的神經　感覺自己像個機器快不能呼吸
os:快打開冰箱看看裡面的東西　唉~　
除了醬瓜什麼也沒有　算了吧　去外面吃吧
火辣的太陽　永遠在前方　無盡的公路　無盡的追求
我想要　run away　run away　不想再懷疑自己對不對
甩開一切無所謂　run away　run away

像困在霧裡　焦躁的想從茫然的現實中逃離
os:唉~　想的太簡單了吧　你覺得你想做的都可以做得到嗎?
淡掉的感情　還堅持下去又有什麼意義
os:喂!　你拿著車鑰匙要去哪裡啊　你別忘明天還要上班呢　別在外面鬼混了
風吹亂頭髮　黑暗星空下　無盡的公路　無盡的自由
我需要　run away　run away　不想再懷疑自己對不對
甩開一切無所謂　就快去　run away　run away
我可以　run away　run away　不想再懷疑自己對不對
是為自己不為誰　不在乎的　run away
很多人再說　不斷的一直說　必須這樣子做　不能夠那樣做
卻又沒有辦法在自己的生命中突破　oh ya~
如果再不走　就永遠不會走　別讓自己再回頭　沒掙扎怎能夠有自由　快走
現在就　run away　run away　不想再懷疑自己對不對
甩開一切無所謂　run away　run away
快點去　run away　run away　不想再懷疑自己對不對
是為自己不為誰　不在乎的　run away
現在要　run away　run away
今天要　run away　run away
現在要　run away　run away
今天要　run away　run away

廣告時間

最近一年比較喜歡看"瘋狂衛士", 一來UPDATE下自己的普通話, 學下D新用詞, 二來個臺確有特別之處. 有時看"唱唱三人痕", 聽下來自不同阶層的人士講下對時事的睇法, 也為自己帶來一些新想法, 新角度, 新知識. 再晚一點, 有"老魚有藥", 專門訪問一些不同行業的佼佼者, 例如有世界打機冠軍, 說相聲的達人(Master)等等... 聽這些來自不同"星球"的人講自己的故事, 等自己也有機會一窺井外的世界... 悶的時候看看台灣的一些綜娛節目, 倒也笑個人仰馬翻, 也許來自不同文化的笑料更能刺激我的笑穴吧?


個人感覺上, 該臺的主持, 記者的質素都比較高, 個個出口成文, 頭頭是道, 詩文典故順手拈來, 而且節目內容不落俗套, 可堪咀嚼, 空閒時候觀看除了消磨時光, 還能增益廣文, 確實是當今充斥著質素低下媒體的社會中的一服清新劑.


(頹筆剛值而立, OT期間無所事事, 遂弄筆娛己娛人, 各機構有意者請留言, 可代筆寫賀詞, 通告, 小品, 訃文, 稿酬面議...)

放假啦!!

今日係第二日假期,但係好似冇乜點抖咁.噚日阿Dee生日,話要同佢慶祝,都冇既~


出去敷藥,又返媽媽度,無啦啦激親媽媽,(佢冇記性,我又冇記性,冇啦啦搞到媽媽唔開心,正衰女包)...


之後幫四家姐部機加Harddisk,咁又一晝,夜晚同佢去上攝影堂,咁又一日啦.


每日都要去油麻地敷藥,好似返工咁.只係遲咗起身,同唔駛返公司.


今日三家姐落旺角買佢公司d野,同佢食Lunch,三家姐又話佢公司有Network Job要我幫拖,都唔知接唔接好....


之後又同四家姐睇地方,行到四點返屋企執屋.


執執吓,公司又Call話新Website有野Set唔到....原來連Framework都冇裝好,真係估佢唔到.咁又搞咗一輪....小問題明天待續.... 6_x!


醫師話,如果我放假去行街又唔休息,又照坐,咁都係一樣冇抖到.但係我就好似仲忙過返工....
係身體要緊?定係要溫書,同四家姐的工作都好花時間....公司的事又掉唔低....唉...

鎖定目標

無錯啦,去馬啦!家姐!!


大力支持你!


聽日之後的一個星期,我就日日都畀半條人命畀你.... I mean half man-day.


一齊加油呀!!!

今日好攰呀

唔好以為辭咗工就可以嗱嗱聲放低工作,走咗去.


同d同事一齊共事咁多年,都唔想交低d唔清唔楚的嘢就咁走咗去.不過真係好攰.唔知幾時先可以真係抖吓....


我仲有好多好多事要做....點算呀....得返兩日就要放一個星期,唔知趕唔趕得切.放咗工都呆咗咁.


得返一個留嚮公司都仲要做...仲辛苦過之前.長命功夫短命做....mor mear (潮州話:無命!)

第二次燈光實習

今次己經係第二次實習啦.因為太匆忙,竟然會留底咗最重要的"電池"好在同學仔肯借我影咋.如果唔係就要交白卷啦.


今日的攝影課題係,人體攝影...即係個Model著得好少,或者真空咁畀你影.主題係身體的各部位的美態.要做到就算影緊重要部位,都唔係表現色情的感覺.d相要用想d象力去觀賞.例如將皮膚的質感表露,影下旭日初昇,河流之類,再唔係影到個屁股好似個沙漠山丘咁都得.


雖然阿Sir要求我地有十張相見得人,但係我就.........都唔知自己影乜...總之都係再次失敗啦.


入嚟睇要有心理準備,雖然我影得唔好,都請尊重呢個尊業的Model啦.
http://333.fotoc.com/dunkey6_6/v/lesson2/

生日快樂

祝今日生日個Mabel的仔仔快d好返.Mabel 開心番晒.


仲有今個月生日的....


祝珮兒同博士快d拉埋天窗.


祝三家姐唔駛咁多嘢做,多d時間教瑩瑩.


祝開始冇禮貌的瑩瑩以後乖乖地唔好成個小姐咁.


祝我可愛的小弟弟可以得心應手,想乜理論都想通.又快d開始搵個未來弟婦畀我睇下...哈哈...


祝Kennis快d升職加人工.快d搵到個如意郎君....嘻嘻...!

塵埃應該落定

今日遞信,嚇咗老細一跳,仲又多一兩個同事都同時見到.


我真係做咗QPI R&D 差d摺埋之後史無前例的舉動.


遞信之前,我上咗I-resign.com,呢個site,好適合果D意志唔夠堅決的人睇架,有心人就睇下啦.


食lunch 前的 Exit Interview 本來想唔講咁多嘢,但係,可能自己唔係好識得迴避問題.我只同佢講條腰咁耐都未好,想多d休息,所以想快d放個假.而且屋企有d事要我去做.工作悶都係其一....云云.


老細話如果我想抖,就可以放個長假,停薪留職,又或者返Part-time,但係冇提過可以加人工.


可能佢唔係好明我的重點啦,如果一個"需要休息多d"的人,仲要來來回回,又或者屋企都仲要做嘢,咁始終都要成日坐.


佢的offer,我話考慮下先.因為我唔想佢認為我未諗清楚先會咁樣.


不過食完 Lunch 之後,老細又話或者畀我Home office之類,但係,我今次就堅決d同佢講.我想試多d新嘢.新環境.可見的將來都係一樣咁做嘢,好悶...雖然佢話可以畀我多d做programming工作...但係我唔可以放低image exporter / HTML clerk 的工作的話,咁就只會百上加斤....都係算啦.決定咗,都係走啦.


咁就入正提講,我可以點走法,我應該有四個星期的大假,老細話規矩係唔可以用大假扣番工作時間....但係考慮到我想抖下,佢都肯畀我放咗一個假先.


我就因為未交低個website,同其他的事情,都係想留多一個星期再講.為咗個website可以launch得smooth D,我都畀咗d意見.而老細都唔想我冇咗d假的錢.所以就畀我返一個星期放一個星期,再返多個星期之後就有三個星期的假.


就係咁,我辭職啦....雖然老細同我講,星期一改變主意,可以同佢講,但係我都應該唔會改變啦.

決定了就做吧

就這樣吧.


不要再畏首畏尾.去吧!


希望我帶畀佢哋呢個驚喜,可以令我開心地離開.


明天是你的last day,又可唔可以都係我的last day 呢?

第一次燈光攝影實習

第一次燈光攝影實習,因為太禮讓,唔夠人地爭位影,有d相如果係大頭d就好d啦.


不過其實係咁上下架啦,都係over咗同under咗,D位又"咩"咗角度又就唔到,又有d穿崩,影咗都唔係好知影緊乜咁啦.


D相愈睇愈唔順眼,delete咗一張又一張,7x張得返2x張,仲想再Delete....


真失敗....希望我之後可以影得好d.



Canon 300D 17-55mm

全程都係用 ISO 100, 1/125 s

http://333.fotoc.com/dunkey6_6/v/lesson01/

敏感

上星期開始敏感,呢幾日隻腳開始有d水泡,但係我都知因為戒口戒得唔好.


今日敷藥,醫師叫我真係要戒清口,因為佢見我敏感嚴重咗.而且,我的腰同腳好似因為對藥物吸收得慢,所以仲有排先好得返.真係有d想喊.


樺爾打完波同佢朋友輝仔食,我乜都唔食得,真係冇乜心機食,不過就無啦啦發現咗旺角呢間金太郎都幾好味,仲買咗張優惠咭添,$20一年,以後可以有八五折都幾好丫.


同輝仔say goodbye之後,本來想同樺爾行街,但係樺爾又要返屋企沖涼,我醒起要買個電熱水壺畀Earma,所以買完就啦啦聲返屋企.希望Earma見到會開心啦.


今日行程真係好緊密,返到屋企,又即刻同四家姐,佢朋友,樺爾的朋友一齊睇"魔怪屋".好在係英文版啫.畫得好靚,聲音都配得好細緻.故事雖然簡單,但係都幾緊張...仲真係有d恐佈架.可以一看啦.....3.5粒星啦.


做媒人真係唔係咁易做.最緊要就係d男仔要真係知自己想點架...機會畀咗,都要自己積極爭取架.唔好下下要我地做太監先得架.

又一個星期

好似都係原地踏步咁.咁又一個星期啦....


公司果個image exporting 的project接近尾聲本來以為今個星期就搞得掂,但係有阻滯,加多一日唔知夠唔夠.


今個星期,我的腳開始敏感,好癢,死啦,唔知食錯咗乜,咁耐都仲係咁既...雖然係咁,但係我又好似唔多痛,咁樣敷藥仲要捱多幾多日呀?我好想放假呀.


我同四家姐朝三暮四,朝秦暮楚咁揀相機鏡頭,始終都係未揀定買乜鏡,但係又要上堂啦.
所以今日終於同四家姐踏出第一步,買咗個Body先.好在可以搵三家姐的朋友幫忙,去佢屋企試下佢的Nikon collection,再試多幾試先考慮買乜啦.買相機計劃總算實行咗一半,另一半的行動又唔知要幾時再出動過!


因為呀Sir叫我地唔好用同一個Brand,學少咗野,所以,為咗敷衍呀Sir, 就好在借到二姐夫的Canon 300D玩下先.就當畀個機會我再睇多Canon一陣啦.


其實...玩過新的攝影器材,以前的一哥機種,依加都要企埋一邊,兩三年的轉變實在太大分別.唔知D200可以玩幾耐呢?


同四家姐揀機,已經用咗我妤多空閒時間啦.溫書?冇地位架.

數碼燈光人像攝影(一)

今日同四家姐一齊上攝影堂.第一課係簡介燈光攝影的器材設備.


聽到頭一段的簡介真係以為自己中咗招,上咗搵笨堂.基本光圈快門的知識,唔用physics的角度去睇都明咗N年.但係因為唔同學生的Background,所以好似都要講一講咁.


之後講咗其他設備同使用技巧,就進入正題啦.點樣用測光表,點打燈,唔同打燈方式有乜唔同效果.唔同色調表達怎樣的主題.如果改變燈光以突出主題...等等.


都算學咗嘢啦.

瑩瑩同雯雯

呢兩個令我同樺爾神魂癲倒的小公主們.真係令我地好開心!!!


噚日三家姐臨時要返工,所以唔可以同瑩瑩換身份證,三家姐諗住媽媽入咗院,四家姐要standby,所以就搵咗我同樺爾返媽媽屋企度"湊"瑩瑩去換身份證.


落住雨咁同樺爾一齊拖住瑩瑩,唔知可唔可以扮係佢Daddy同媽咪呢...個樣都唔似...一睇就知係假冒架啦.
樺爾又好細心咁擔住把傘,抱住瑩瑩,嘻嘻...睇落樺爾應該可以做個好daddy呢...不過...我就....只可以做個姨姨添...可能同小朋友玩,要好開心好投入先得.

我同瑩瑩講,你知唔知你要去邊度呀,我話:你要去人民入境事務處換身份證呀...瑩瑩竟然講咗句:"你講得真係啱啦!"真係人細鬼大!


冇受權書真係唔畀幫姨甥女做身份證架...唯有轉下晝時間,等佢的Daddy,Mami親自去啦.
本來以為可以睇做瑩瑩影相相添...真係呀...冇得啦!!!唔制呀...


之後同瑩瑩一齊行街,佢見到好多公仔,不斷好大聲咁講d名出嚟.好彩d舖頭未開齊,如果唔係唔知會唔會忍唔住買d畀咁可愛的瑩瑩啦.不過其實瑩瑩都冇拗計要買,好天真架.


為咗獎勵佢咁乖,我哋又未食早餐,咁就去咗McDonald食嘢,樺爾仲特登買個開心樂園餐,因為送閃電王呀.
頭先啱啱同瑩瑩睇完玩具,咁啱又有反斗車王的主角閃電王.瑩瑩一睇到就尖叫...成個McDonald都聽到呀!


之後瑩瑩又用"樺爾"唱歌,feed in 咗成首Mary had a little lamp.真係氹到丈丈幾鬼開心架.


點知返到媽媽屋企,同樺爾走啦,瑩瑩淨係錫我唔錫佢喎!真係好奇怪呢..


*****************

今日四家姐打電話搵我,佢話雯雯好掛住我喎,真係心都甜啦!!
之後同雯雯傾咗一陣計,雯雯仲話佢"發夢掛住樺爾丈丈呀!"(應該係夢見樺爾啦...)


哈!!!樺爾,雖然噚日我哋噚日走果陣瑩瑩冇錫你,但係雯雯都好鍾意你,開心番啦?


雯雯同我講,佢去咗星加坡,好掛住丹丹姨姨呀,好掛住樺爾丈丈呀...又話第日同我地去游水添.


佢又話佢同瑩瑩去睇閃電車王呀,好開心呀...瑩瑩係咪因為樺爾噚日送咗閃電王畀佢,番屋企都鍾意到發咗癲呢?


雯雯係一次睇電影架.開心到成日都閃電王前閃電王後添呀!

生活一周

呢排同樺爾都各有各忙.佢的工作量不斷增加,我等候佢返屋企的時又就愈來愈長.


因為敷住藥的關係,我都唔想四處走,返屋企又冇嘢食,一個出街食真係好唔慣.


星期一至五,我已經自己一個人食晏,好悶.但係又好趕,返公司休息一陣就開工.


星期六就要上堂,個course話就話唔多嘢,但好多tricky的問題,要好熟書先可以搞清楚,堂堂複習上堂講的課題真係好懷疑自己有冇好留心上堂.好似乜都入唔到腦,唔通真係記憶力衰退?其實應該都係因為冇溫書啫.


星期日都要去敷藥,樺爾就同佢好朋友打籃球,之後仲一齊食麵,本來想行一陣,但係腳又唔聽洗.都係返屋企啦.


返到屋企,同樺爾的蘇州親人上QQ傾計(QQ係大陸好盛行的網上聊天工具),雖然唔知佢哋講乜,好多都唔明,但係睇到佢哋個個笑到見牙唔見眼,真係好"鄧"佢哋開心.樺爾媽媽返咗蘇州真係笑得開心好多.樺爾婆婆仲話好掛住我.見到舅父舅母都好開心.真係好感動.

"Ah bu, Chi Jin Dog!" (阿婆,好掛住你呀) ....

嘻嘻...叫樺爾教咗我成十次先記得.

出院

媽媽入咗醫院,做咗心電圖,不過就唔係唔舒服的時候做,唔知咁係咁check唔到D乜.又做咗電腦素描,哥哥陪媽媽出院,睇咗d報告又話冇事喎.


到底係唔係媽媽因為感冒先會咁辛苦,手腳冰冷,自己嚇自已呢?還是係未做夠檢查呢?


雖然醫生都話媽媽冇事,但係我就覺得佢應該都係唔多妥.因為都唔知佢會唔會係仲有其實問題.


媽媽真係一個唔乖的病人.佢唔駛去洗胃,真係算好彩啦.點解係都要咁樣令人擔心呢...


佢的腰又話唔舒服,都冇做X-ray檢查,唔知會唔會係腰骨影響,令佢好攰...(因為我自己都係咁,所以感同身受)加上佢又感冒,週身唔自在啦...


講真我依家的腰同左腳都漸漸好轉啦,醫師話我就嚟好番,我自己都知我正慢慢好轉.右膝都好好多啦.


如果媽媽真係腰骨痛,我真係想叫佢去睇我睇果個醫師,佢真係好掂架.不過因為我哋都冇第一時間去醫返好佢,醫的時間自然會好長.要佢日日去敷藥真係好難,佢又會嫌遠,又會嫌醫得耐,仲成日自以為自己食乜嘢會醫好自己.畀佢知咁貴,實唔肯醫都似.其實最重要就係可以醫得好,能力做得到,佢要醫幾多錢我都願啦.

疑病驚魂

媽媽噚日無啦啦話唔舒服手腳冰冷,心口又壓住壓住咁.仲以為佢好似爸爸咁心臟病,真係擔心死人.


最怕就係佢係咁幾個循環咁不斷咁試藥.食完珍珠沬,又食自己煲的感冒藥,話好d,之後又無啦啦手腳冰冷心口又壓住壓住,之後又食甲狀腺藥(佢話係心臟急救神藥),都唔知好d定係心理自以為好d,但係又聽爸爸話食五寶丸醫傷風.......其實都係唔得,食咗藥冇耐就話得同唔得.又係自己以為得,死頂.


佢又話自己早幾日上朋友屋企睇到隻貓嘔,唔知係咪中咗招....唔會係禽流貓呀嘛....我又唔係醫生,點知佢咁的病徵應該點做.勸佢去睇醫生,就成日話等一陣先食埋乜藥再睇吓添.硬係唔想入醫院check!真係激死人.


第二日又想再食多個循環.....一早打電話畀佢又怕佢未起身,返到公司打畀佢,聽到佢又唔聽話亂咁食藥,仲講d好灰的說話,一時又話條命係自己既,都已經咁老....真係好激動.


我就只可以叫佢有病去睇醫生啦...佢又再滔滔不絕講佢食藥的cycle,又再講佢同個朋友做乜....(講就好似幾精神)不過講講下仲話同我講到好攰,氣喘添.


以為佢又自己死忍啦,不過之後就無啦啦肯入醫院啦.唔通真係大鑊?!


**************


星期六,本來約咗Berry同Kathy,四家姐去綠田園耕作,但係媽媽咁樣,真係冇心機去.我自己又未好返,都係咪去啦.Berry,對唔住呀...我都唔想甩底架.

做啦!死亡筆記

呢個故仔好好睇架...終於都上影啦.


L就幾似,但係個月就唔夠靚仔喎.


冇興趣去睇都可以睇呢個介紹先決定啦,有興都係直接去睇啦:


http://www.atnext.com/jp/deathnote/

苦浪漫

本來打咗一輪苦水,但係唔知係因為太苦,電腦都選擇忘記... Hang咗...6_o?


唉.今日你同我都係咁...最啱打呢首歌.聽吓呢首歌,希望會放鬆d啦...


苦浪漫 - 古巨基想聽呢首歌,按這裡再按上面Play掣
曲: 馮正 詞: 周禮茂 編: BILLY CHAN

夜已爛 朋友轉眼

已經鳥獸散
一個人 像值班 快樂極有限
獨自歸 未願返 深宵太媛慢
不經意 望見你雙眼
在角落 神態雖淡
卻寫滿怨嘆
一個人 獨自撐 痛愈難發難
*恨願分 怒願擔 心傷既同患
一起去 渡最冷的冷*
容這夜晚 少兩個弧單 營造甜又苦浪漫
你要哭 我聽你痛哭 只須哭得比我燦爛
夜暗淡 人世多冷 慣不慣去慣?
失意人 別落單 切莫原處站
REPEAT*
容這夜晚 少兩個孤單 營造甜又苦浪漫
你要哭 我聽你痛哭 只須哭聲中再現歡顏
容這夜晚 少兩個孤單 投入甜又苦浪漫
我要哭 你聽我痛哭 只須哭聲中散盡憂煩
容這夜晚 少兩個孤單 投入甜又苦浪漫
兩個哭 最終會結束 即使只得一刻不怨嘆
這一夜 知不會循還
仍衷心希望你 快樂仍能習慣

乜我真係咁悶咩?!

放工返媽媽度,教四家姐photoshop....


乜我真係咁悶咩?!


我以前d小朋友都唔知幾鍾意我...


我真係冇以前咁熟 Photoshop 6...因為公司都轉咗用PhotoShop CS2啦...


請原諒我太多口水啦...講唔到重點, 不過,爆肚講係咁上下架啦.


嗚....下次唔同你玩啦....嗚....嗚....嗚....


mami...家姐蝦我呀.....

忙裏偷懶

今日繼續做個JSP有關的copy and paste + color matching change project.


本來接到呢個job,以為係好機會學嘢,不過事實總係好現實,唔係冇野學,而係冇預時間你畀你學.只係想你用幾日課仔,改一改個名,改少少內容做另一個內容.改個menu....


我知點解assign呢個job畀我做.因為改樣呢家野最哂人時間,所以用我呢個無聊人的時間係最好架.其實主要係想我做過 d Image button 同 menu image.....而唔係畀機會我跟個project.


其實...佢地都唔多當我係一個programmer.... rather, a graphic exporter!


改樣,我冇say,因為我都唔知乜係好乜係唔啱老細口味.但係轉咗老細,老細的taste都唔同.而且,佢唔會理會一個經常撘做 image 的 programmer, color matching 會幾受限制.總之,有個人會搞掂D images就係啦.


冇色盲的人唔代表識得點襯色.識用個photoshop唔代表有美術天份.


有時候唔知點先叫唔同....同樣的擺位,只係想改少少,但係想同原本的look唔同.改得多又睇唔慣,改得少又嫌"悶咗少少".


我都知乜叫做順眼,因為好主觀.但係suggestion可以有千萬.萬變可以不離其中....


solution?


原來係加個假的 banner,話會有個banner, 改咗少少色咁又無啦啦收貨.


哈.....


今日無啦啦有個舊同事 ICQ 我, 問我Quote價.


佢每年都會搵我一兩次關於 Quote價...其實係想睇吓我做唔做 freelance.


但係我真係好懶.唔想做.不過佢搵一搵我,我同佢搵咗一陣料,咁樣仲學多嘢過號稱做公司果個JSP project.


到底係我冇心學...定係我唔識學...要學,其實幾時都可以學.


吾生有涯...而知也無涯,以有涯隨無涯,殆已. (呢個係我的口頭禪)

豐富晚餐

今日同四家姐一齊買SD card,帶四家姐遊花園,平時佢帶住我買衫,今次輪都輪到我帶佢去揀電子產品啦.不過我就冇上次咁爽快,因為想同四家姐行一下佢一向好少去的電腦商場.


我上網夾好咗價,Kingston 2G Elite Pro SD card應該係$370架嘛....但係搵咗星際3樓最平果間都係貴咗$5!因為上網的通常係公價,所以貴$5真係唔係咁順氣.為咗$5的婆仔數,我又同四家姐去咗旺電夾下,一夾之下先知旺電仲貴,$390 - $430 不等.真係有冇咁大分別!!!好彩上次我買CF係平咗$20架啫.


之後我地又睇相機袋,睇咗一輪,咁就睇到成八點.四家姐同我都好肚餓,於是就去咗女人街果間水道橋食晚飯.


呢掛日日大出血,但係我都冇好好量入而出,因為反正都係負增長,我再點慳都慳唔番.所以又呢個負負得正.食番餐好既.


叫咗兩碟等住樺爾一齊食,三個人就食咗咁多嘢啦:

1. 三文魚壽司 (Tue special) :
ok la....但係好似唔係咁多人叫,所以好似唔係最新鮮咁...夏天都係唔好食咁多魚生啦
2. 牛油蘑菇帶子鐵板燒 (Tue special) :
呢個幾好味,帶子好鮮味,唔會太鹹
3. 軟殼蟹炒飯 (四家姐話太淋啦)
4. 海鰻薄餅(呢個好香,好好味.一定要襯熱食呀)
5. 雞軟骨餃子:
幾有口感,有咬口
6. 三色刺身(是日推介.....又係"孔子搬家",寫嚮收銀的黑板好似都唔想有人睇到咁)
估唔到會有三件三文魚,二件唔知乜魚,二件甜蝦,OK啦...
7. 什錦海鮮石頭窩巴:
我第一次食呢道菜咋,原來燒到個石頭窩熱騰騰,再加入青口,蜆,蟹柳等海鮮同米通,再加入辣汁就會係咁滾,都幾得意.食落都幾好味.


埋單都算係咁,平均100落樓.食飽飽啦.

休息一天

噚日同四家姐去咗Show Room,所以冇中午之前去敷藥,等到下午七點先去敷.成廿個鐘冇敷藥睇下成效係點啦.


答案係:日日去敷的腰同左腳都好好多啦,至少行的時候唔駛就住就住,同埋唔係咁痛啦,不過當按摩時都係會痛痛地,都知係未好番哂.


點知上個月同樺爾阿Dee打籃球整親的右膝呢幾日好似突然痛多咗.本來想等醫好兩個患處先再醫呢個,但係都忍唔到啦.就算claim定唔claim都係醫埋先算啦.


同醫師講,我話我帶唔夠錢,佢都畀我"些"住先都得.醫就醫啦.如果呢頭醫番左腳,右腳又痛,咁搞法真係沒完沒了.


今日一次過敷三個患處,敷完都係好好留嚮屋企抖下,就係咁,無啦啦就瞓咗幾個鐘.叫都冇知覺.


不醒人事啦...唔知係咪D藥好好"吸力"呢?好似敷敷下會好想休息.


但係唔敷就好似已經行得好咗.希望右膝可以快d好返先啦.唔知五日得唔得呢?

死心

呢幾日同四家姐成日比較相機的功能,因為真係要買一人一部相機一齊學啦.


四家姐玩咗兩日Nikon D200,都幾滿意佢的質數同操控.只係怕太重.


我就成日怕唔知會唔會太灰,但係玩落又好似冇乜問題.(就算有問題都係自己唔夠熟啫.)


但係因為成日想睇吓顏色較鮮艷的Canon機,所以今日就同四家姐一齊去Canon Show Room想比較下Canon vs Nikon 手感.

1. 輕,都係膠造,都唔似成785g
一睇個30D的 Body,幾輕,因為用咗Bundle鏡,好輕.


1. 我唔鍾意個大dial

玩咗兩玩,因為上網揀機冇好睇個Menu點Set,一上手,搞來搞去都唔知點較個光圈.原來個快門係前面個dial,但係光圈就用機背的大dial set,腦筋好慢的我真係跟唔上,figure out 唔到.


==>大打折扣.


2. ISO點較,又係又係按住個掣加大dial. --> Just ok.


3. 較 Manual WB, confusing...點較架?較咗同個Menu顯示的都唔同既?!!!


4. 較測光mode,要一邊按按鈕,一邊dial,兩隻手指黏好埋,手指抽筋.手指離開晒按快門的範圍,唔係咁方便

==>大大大打折扣.Nikon 好易做得到

總括: Cons多過 Pros....

5. 有冇好處?都有既,色水都係ok,個User Interface,好似 bracket Mode都幾得...(in 5D咋喎)

好多嘢都要Menu度較,但係個Menu冇shortcut,水蛇春咁長的menu,唔熟要搵好耐,我咁冇記性,死得啦.


我同四家姐都唔係Nikon die hard fans,但係一楂上手,就覺得好多都唔合心意.


用D200有貼心的感覺,好似個"dump垃圾掣"就好方便,按兩下同一個掣就得.
相反,Canon就要用個大dial轉去OK度.幾慢.


光圈快門,ISO, WB, Qual 好易較.


就算Canon的Qualty都係咁好,但係咁煩的操控,又要拓住咁重的機,真係好吃力.



寫得好亂,好彩唔係用嚟做用家報告.


一句到尾,可能我地唔可以用d較為麻煩的機,所以先咁唔鍾意啫.


唔好三心兩意啦,D200啦....


不過,好似D200有d貨有直紋問題,check 機都係小心d好啦.


不過Canon 的Support, show room 就一定好過Nikon!!!

去Nikon 時間係Office hours!!!

爸爸媽媽

今朝一早搵四家姐,四家姐仲未醒喎,唔知係咪因為我嘈醒咗佢,佢就冇咁好老脾,激親好易唔開心的媽媽....真係大煲大...


下晝都未搞返掂,都唔知佢點收科.

(註:原來四家姐話係噚日激親媽媽,佢唔係因為我嘈醒先激親媽媽,不過都唔知啦...冤枉咗佢添...依架冇事就好啦...四家姐...對唔住呀)

不過應該都係我返屋企,所以媽媽又全情投入去買餸煮飯畀我食.仲唔小心撞親個街市的樓梯底添...個頭真係好"頭入"啦,都係我唔好....媽媽特登去買蝦畀我食,搞到佢撞親添...真係衰女包.


返到屋企,啱啱食得,好耐冇同佢哋呢個陣容食啦,以前就成日一齊生活,但係都冇乜同檯食飯,成日前後腳.今日就反而有爸爸、媽媽、四家姐、阿Dee同我,樺爾畀我放咗飛機所以佢約朋友去咗唱K...(咁都唔預埋我!哼...分身!)


我上星期都有現身架,但爸爸同媽媽好似好耐冇見我咁,爸爸同媽媽都不停咁同我講野,爸爸同我講中醫理論,媽媽就同我講佢點自己煲藥實踐(實驗)....同時間講,好似立體聲咁,真係唔知聽邊個先好.


今日四家姐爆咗我去醫腳的野,因為要同媽媽講我要戒口,媽媽知道咗冇嬲我,真係好好彩.


其實我真係好想媽媽去睇下佢的腰,佢可能同我一樣,一路都係死忍.如果佢肯醫,我多多都出畀佢去醫.但係媽媽就唔係咁信.唉!都係等我好返哂先勸佢去啦.

迷倒嗎?

今日蘋果日報講:

卡 通 電 腦 限 量 100 部


綠 色 米 奇 主 題 襯 白 色 機 身 ， 幾 有 Style 。 約 港 幣 $7,600 起

日 本 EPSON 搞 個 直 銷 網 Epson Direct Shop ， 不 過 並 非 賣 自 家 強 項 Printer 同 墨 水 ， 反 而 有 好 多 得 意 有 趣 IT 產 品 。 佢 最 新 返 批 同 卡 通 人 物 Crossover Notebook ， 機 面 全 部 印 晒 世 界 各 地 都 咁 受 歡 迎 卡 通 人 物 ， 包 括 米 奇 老 鼠 、 小 熊 維 尼 同 小 魔 星 等 ， 全 機 面 圖 案 花 花 碌 碌 ， 相 當 之 搶 眼 ， 而 且 機 內 Windows 好 多 功 能 均 換 入 相 關 主 題 ， 如 壁 紙 、 Screen Saver 、 Icon 等 ， 100% 為 Fans 而 設 ， 完 全 打 破 電 腦 一 貫 冰 冷 感 覺 ！

今 次 廠 方 共 推 出 B5 （ 12.1" 屏 幕 ） 及 A4 （ 15" 屏 幕 ） 兩 款 尺 寸 型 號 ， 硬 件 規 格 方 面 ， B5 系
列 採 用 較 低 階 Celeron M 423 （ 1.06GHz ） 處 理 器 、 512MB 記 憶 體 、 40GB 硬 碟 及
ComboDrive 光 碟 機 等 ， 機 能 算 中 規 中 矩 ， 學 生 哥 做 功 課 應 夠 用 ， 賣 價 約 港 幣 $10,900 。 另 一
A4 型 號 則 配 備 Celeron M 380 （ 1.60GHz ） 、 處 理 速 度 快 得 多 ， 其 他 硬 件 大 致 一 樣 ， 不 過
OS 反 而 由 專 業 版 降 為 家 庭 版 ， 賣 價 亦 較 平 ， 約 港 幣 $7,600 。 卡 通 電 腦 系 列 只 限 量 100 部 ，
有 興 趣 又 唔 識 上 Direct Shop 預 訂 話 ， 不 妨 留 意 一 下 香 港 一 專 賣 水 貨 Notebook 舖 頭 ， 話 唔 定
有 意 外 收 穫 。 記 者 ： 徐 影 龍

Mabel,係咪如果係黑白色配襯就諗都唔洗諗就買呢?得個外皮,好似打開冇野睇呢...不如好似日文版咁買個貼紙咪得囉....


日文的網址呀...唔知講乜...


www.epsondirect.co.jp/info/news/060719.asp

收工

哈....終於都做完啦.收工 (哈...唔係做到咁夜!!!只係呆等人收工啫...不過都係等咗個幾鐘,唔係好耐啫)


但係....其實仲有好多問題,不過又要放低一陣,因為要學新野,今次係Linux...


近排真係多野要睇.PMP Course都未夠,又要買DSLR,又要上攝影堂,話就話短期.一買SLR深似海,沉迷攝影等於倒錢落海,倒完又倒,倒完又倒.....


家姐,我唔係話你呀....可以同你一齊學,係我的心願....


不過....學琴又何嘗唔係呢....


有時乜都有興趣的我,分身不下,記性又差,想投入d都有學習障礙...係咪可以去搵Berry姐姐幫忙,輔助下我好好學習架...


開始又再語無輪次.都係要瞓覺啦.

給家人一點安慰,你會有新發現

今晚臨返去媽媽屋企前去咗OK買咗一本電腦廣場睇(又係一本廣告多內容重重覆覆的潮流雜誌,點解咁都睇?!我冇睇一排,幾乎脫節啦,就嚟連Blue-ray係點的都唔知....)


講咗去邊?我係話,咁就有包紙巾送,裏面就係呢句話:"給家人一點安慰,你會有新發現"


家人係指樺爾定係我的屋企人呢?不過橫睇掂睇,樺爾似乎都唔得閒畀我安慰.佢又忙到死.我自己就自身難保.


呢d野都係一笑置之罷啦.


今日最開心呢就係又可以返屋企啦,幫四家姐買咗2G Kingston Ultimate 100x CF, $580,唔知旺電會唔會平d呢?我唔敢行咁耐.睇到平過hkgolden.com標的$618就買咗走人啦.點知個商場有抽獎添(不過都唔會中架啦...)原來Kingston都有抽獎添喎(7/15至開始咋),買一樣嘢,有兩個抽獎主辦單位,真係好少遇到.


咦?!唔通呢個就係給家人一點"安慰",你會有"新發現"??


車...發現呢個嚟做乜?我都冇抽獎運架啦.


今日雯雯話最鍾意媽媽,第二個就鍾意丹丹姨姨,呵呵~~~開心過中獎啦!!

報告,今日情況隱定

每日去敷腳,其實真係幾悶.12:30p.m.放食飯,我就一個人去敷藥,因為每次最快都要搞成廿分鐘.所以都唔可以同d同事一齊食.


事有湊巧,其實呢排我都好忙,好想一個人靜下,一個人食,好悶.但係又幾自由.唔駛諗話題同人講.又唔駛餐餐食得貴.最好就係可以小睡片刻.不過咁真係會變大懶豬啦.


講起去敷藥,個醫師的女都係女醫師,但係敷藥的手勢就好似麻麻地.唔知係咪因為佢好似唔係咁想跟媽媽做跌打,定係點,如果跟媽媽咁多年,包紮應該都好隱當,但係佢唔係條帶唔夠長,就係紮得唔緊.又或者唔記得加大膠布.不過佢按摩位置都係好準喎.


今日同呢個女傾計,佢又問起我幾時整親,我就話最近一次係一年前,死心啦,我同你講三年,咁係咪要按比例醫我三個月咁呀?


依架好似都好轉啦,不過如果停止敷藥會唔會又差返呢?都係未知之數.不過行路比以前小心同慢咗,但係都好似輕鬆d.呢次的治療應該都係有效既.


要肉痛定係腳痛呀?你話呢? (如果媽媽明就好啦....)

朋友,久違了

經過一個一厥不振的星期,身心極度疲累.身心受創.加上養傷的關係,返到屋企都要好好地抖返吓.


左腳腳傷己經好轉,兩條根有一條好返d啦.但係另一條根因為長時間冇好好醫治,仲要多敷至少十幾天.腰脊兩節移咗位的脊骨都己經少咗痛.但係好似仲係唔係咁隱,有時好似仲係feel到有D痛.原來個盤骨痛,都係因為我個盤骨都有少少移位.所以醫師順便同我醫埋.依架果塊膏藥大到成個pat pat都包得住.個醫師話,個盤骨"咩"咗,所以腰又"咩",仲影響埋成隻腳,所以先會腳根咁腫.今日佢終於話睇到我隻腳好d啦.


之前聽醫師講我的脊骨移位得唔係咁正常,仲叫我搞唔好條腰,唔好準備生BB,如果唔係會好麻煩.....當時聽到真係幾驚,所以返到公司想搵樺爾傾吓,但係又搵唔到佢.咁又打畀四家姐,但係四家姐同爸爸媽媽飲緊茶,唔可以畀佢地知....


不過睇多佢幾次,聽佢咁講又唔似係作到我個病情好壞,危言聳聽,嚇我買佢d藥喎.佢提起的大補丸時,我又冇乜反應,佢之後就冇再提,佢只係話我梗係怕食藥啦.(佢畀位我say no,我當然話係啦),佢話,如果可以就食多d有膠質的食物,好似花膠(好死貴架...),又或者豬尾骨...(唔知乜嚟....),或者係幾隻雞腳喎.


如果真係好似醫師所講,我睇多兩個星期應該可以搞掂啦.希望真係得啦.

第四次敷藥

連續去咗尹太到敷藥:

第一晚:
畀佢推幾下,隻腳好似掂地踏實d之外,畀佢推正返背部脊骨之後,夜晚返屋企,好似好瞓咗.

第二日:
星期六晚上完堂,又去三家姐度過夜睇世界盃.德國最終都有個安慰獎,好過冇啦...C 朗仲要插幾多次水呀...

第三日:
等到瑩瑩醒,佢一早又跳舞啦!!
同佢玩咗一陣.佢仲著"高哏鞋"送我哋走呢,真係好可愛呀.

雖然冇好好地瞓過覺,但係都好似冇乜問題.真係好似有重生的感覺.真係好多謝佢!!
今日樺爾陪我去,尹太先知我結咗婚,講起如果想生BB就要搞返掂條腰.(呢個都係我其中一個想法嚟既,但係唔知我仲可唔可以救返好呢?)


食咗午飯都唔敢返去見爸爸媽媽,怕佢哋會"哦"我.好彩媽媽入咗屯門.冇諗住見我.


四家姐就返而嚟我屋企添.有貴賓到,"係咁二"都要執吓屋啦.執吓執吓,又好似有d攰.

同四家姐,樺爾一齊出街食.去嚼江南食,食一次鬧一次.又細碟,又落味精,多油,又貴...


第四日:

依家每日去佢到,佢會同我按摩背部同腳踝.但都唔知自己要幾時先好返.


聽佢講好似手尾幾長.佢話我兩節骨向內凹,唔係咁正常的傷法,但係我又行得走得,會唔會佢想嚇吓我呢?等我同佢買藥呢?
佢仲同我講佢有間藥廠,可以親自為病人製造小還丹,對調理身體好d...(佢係咁睇d孫玩得金庸群合傳多???)佢話如果經濟許可,就試下啦,一服藥,成100包小藥丸,但係價錢唔係咁定,有時幾百,有時差唔多成千.


睇佢好似都幾好人,佢係好心?定係生意要緊呢?識佢幾日,都唔知佢係乜人,佢係咪想捉我想好返哂的心理呢?


應該聽佢話好呢?定係點呢?

第一步

我呢個長期病患者,今日終於都肯踏出第一步啦.


幾年前因為唔小心跣一跣,就咁就搞到隻左腳腳踝扭親,但係又冇即時去睇跌打,隻腳腫咗,只係用藥酒"卒吓卒吓"消腫之後就算.但係之後其實成日都痛.搞到做咗X-men,擁有先知腳,翻風落雨仲準過d曱甴昆蟲.有時行得多,夜晚就會痛d.有時仲臨瞓扭嚟扭去都冇個姿勢瞓得好.(好彩有人會同我扭吓,按吓...但係其實起初都唔係好敢同佢講....)


其實好耐之前四家姐講過佢的舊老細介紹過一個跌打畀我.我明知嚮公司附近,但係搵過幾次都搵唔到.砵蘭街又不宜久留,結婚前後都有想過去"整返隻腳",但係又怕己經咁耐,都應該冇得救瓜,又唔知會唔會咁遲先去,個醫師會唔醫.又怕依家都仲行得走得,唔整唔整,整咗仲唔知會唔會仲差過唔整,想吓東想下西,又唔係成日好痛.如是者過一年又一年....再一年.


呢排以為多d游水會可以做下水療啦,但係其實游緊就好d.但係姿勢又好似唔係咁啱,游得唔係咁順暢,舒服一陣,返到屋企又打番原形.


上個月仲諗住跟樺爾同阿Dee打籃球減下肥,點知一打,連右腳膝頭都整親,之後連上落小巴都要好小心.所以就行少咗...咁又再肥d....


呢個真係極度惡性的循環呀!!!我唔可以再咁落去啦!!!!!!!噚晚又瞓唔著啦!!!!


我要"的"起心肝啦...我要好番,我要好好地行路,我要運動修身... 我要轉工...


我要好好用功讀書,長大了要賺多多的錢,來買大大的房子囉!!!


(哪~為什麼你小時候不好好用功讀書??)


原來第一步,就係先要身體健康!!!


希望今日去做呢個決定係啱架啦.醫師尹太都幾好人,一睇就知我傷咗好耐,仲知我點的姿勢扭親添.(我唔敢講傷咗三年,只係話好耐,成年咁耐).


原來我成日就住嚟行,搞到腰骨都有一節移咗位,佢再同我推一推隻腳踝,敷咗藥,又敷背脊.每日都要去換藥.我問係唔係好嚴重?佢又話佢唔會講到好嚴重嚇我.不過要睇幾日先知咩情況.就算咁樣一整親,就要成個星期先好返.我咁樣就好睇我對d藥吸收成點.


醫師其實唔係收得好貴,只係我自己搞到腰都有事,先要收兩個部位啫.佢話因為係熟客介紹,本來460,依家收360就得啦.我依家要戒口添.所有酸性食物,蛋,牛肉,糯米,豆類食物都唔食得.咁飲品呢??真係唔知啦.


醫師摸到我手腳冰冷,仲畀咗粒大保丸畀我食.我問係咪跌打丸,佢話,乜睇跌打就一定只係畀跌打丸我食咩?!佢都幾風趣架喎.佢話本來要30蚊,不過就送畀我食啦.


唔知呢個係咪試吓我信唔信佢呢?無啦啦令我諗起細個睇粵語殘片d橋段,食咗果d蜈蚓丸定咩老泥丸,一唔聽話就可以打鼓,吹簫,食咗的人就會碌地沙,唯有聽聽話話咁做牛做馬.


我食咗啦...唔知呢好似個肚怪怪地....(嘩~~唔會咁呱...真係好心著雷擗.)


唔知我仲要見佢幾多次呢?希望可以快d好返啦.


但係我依架咁樣就唔可以游水住添....點算好呀....

遊呀遊

噚日游呀游,今日遊呀遊....


魂遊~~~ 飄呀飄呀飄隨晚風...(克勤填詞架...<<浪漫長路>>唔係好啱feel添...)


打邊隻歌好呢?


呢隻都幾好架....打吓死去的人的歌啦.


飄飄飄飄 - 陳奕迅想聽呢首歌,按這裡再按上面Play掣

曲:柳重言 詞:林振強 編:李漢金

遊戲人間 人間遊戲
我往日未嘗認真
對於一切也抱去玩的心理
笑稱束綁只會教我飛不起

無掛無牽 何等完美
卻發現實沉悶到死
還幸你看破心中的隱秘
和用唇邊的翅膀載我飛

讓我可… 飄飄飄飄進愛的海
然後以後離不開 你贈誠實的愛
令我牽和掛 和認真期待
當我心真正著緊 我真正存在

飄飄飄飄進你風采
無論我如何不好 你亦全部裝載
把你的純真 抹我的塵埃
讓這濁流 流進清海 真是可愛

遊戲人間 人間遊戲
過去覓自由是借口
其實不敢交出因此只嬉戲
忘掉人真的愛人至懂飛

讓你我… 飄飄飄飄進愛的海
然後以後離不開 我贈誠實的愛
學會牽和掛 和認真期待
當我心真正著緊 我真正存在

飄飄飄飄進你風采
無論我如何不好 你亦全部裝載
把你的純真 抹我的塵埃
讓這俗人重見精彩 天地可愛
真是可愛

游呀游

今日同Kathy,Berry去翠豐台游水,因為呢排游得密咗,所今日真係敢游多d.


今日lunch落雨,搞到冇得去買泳鏡同泳帽,唯有一放工就9秒9去買啦.好在冇雨,如果唔係又冇得游.


去間舖一問,畀Kathy的泳帽就好快揀到,但係一問泳鏡要唔要有度數就啞咗.係喎,好似Kathy要有度數呢?我仲想一買就買三個.等我地可以三個一齊玩....(幾有團隊精神!!)Berry會唔呷醋呢...我都想買個泳鏡畀你架...因為時間唔係好夠,所以都係擱置計劃先.



雖然今晚又要睇世界盃.因為要減肥的關係,點都要游夠盤先肯收手.所以我就游得比佢兩個多.(阿Dee我有聽你的忠告架啦!!!)


起初都唔係咁多人,不過游游吓愈來愈多人啦.冇計啦.都差唔多游咗50分鐘.又怕踢到人,望嚟望去咁,好阻水,游游吓都係收隊啦.


今日精神都唔係咁好,所以煱桑拿都唔敢蒸咁耐.嗱嗱聲走人啦.


之後三個一齊去食麵,其實唔係傾咗好耐,仲唔記得自己講過乜,成日重覆講自己之前講過的野添....(唉,好似成日話當年...唔通我真係老啦??)


死啦....語無倫次.抖返陣先起身睇波.


(克勤同好多英格蘭球迷一樣,唔想C朗的葡萄牙贏,但係佢幫邊隊就邊隊出局.法國有難啦.)

世界盃唔狂熱地狂熱

真係好啦.聽日又約咗Kathy Berry 游泳.不過半夜起身睇波,唔知頂唔頂得順呢.


其實我唔係好狂熟,但係都睇咗咁多晚,冇理由唔睇四強架嘛.


聽日唔知起唔起到身呢.本來應該依家去瞓覺覺豬,但係唔想又做大懶豬.所以都嚟留吓言先.


之前成個星期,其實係唔係咁開心,所以一路都冇心機上嚟留言.過咗個週未開心返,我又返番嚟啦.


其實...日記,都要有心情先記,咁算唔算唔係咁真實呢?

大大大懶豬返嚟啦

上個星期因為掛住睇世界盃,成日瞓得唔夠,於是一日又一日咁冇寫到日記添.


加上星期五同六晚入咗三家姐屋企睇足四場世界盃八強,星期六成日留咗嚮三家姐屋企,同佢哋一家人行街買衫,游水,食飯,玩大富翁,真係好開心呀.十足十渡假式享受.


星期日又出返嚟見爸爸媽媽哥哥家姐,(不過二家姐搬屋,唔出得嚟....好想同雯雯玩呀...)


其實好多嘢想講,一下子寫唔得咁多.


總之係開心週未啦!多謝家姐~~

我又偷懶啦

五日嚟都冇update個blog,係咪好掛住我d廢話呢?


同Berry Kathy游完水,其實唔係好攰,但係就好想瞓.搞到成日冇update.


都唔記得邊日打邊日,總結一週大小事啦:


1. 工作呢...個website開始埋齋.但係又有關連著的新工作...沒完沒了地做...
做咗Animated gif 做的廣告Banner放入partner個Website,唔知寫乜字眼好,勉強過得自己,做咗,修改咗幾次,交課,不過老細話:其實個Banner寫D乜字佢都唔重視.


聽到真係一個冷笑.如果廣告的"message"係咁唔重視,咁係要做個banner嚟把鬼呀?!


頂..........唔順啦....我真係好掛住Annie.


2. 一個人放工撘地鐵,無無聊聊,無意中望到一個人好熟口面,係邊個就真係醒唔起,佢好似都望一望我,見我又冇反應,以為係認錯人,過咗兩個站之後就到荃灣,佢行走咗,我先回一回神,咦?!佢係詠春師兄呀...三個一齊去學的其中一個帶埋女朋友一齊去學的果個呢~~ 哈...人真係最善忘的動物.


3. 雯雯問丹丹姨姨幾時會去探佢一齊去游水水呢?我都想呀...不過要上堂.下星期我地唔駛返學,不如一齊去搵二家姐玩水水呀?


4. 睇波啦睇波啦...睇到連返2:00p.m.都可以瞓過籠,遲到.第一堂就玩遲到.死未!


5. 話要買NDS Lite的仁兄,去到深水埗,都係一貫既"觀望態度",就等佢再望吓添啦.係咪又好似買PSP咁望吓望吓就唔買架啦?


6. 反而冇乜考慮過買的小喇叭,行咗一陣就買咗.比起平時的我要左夾價,右夾價,今日係有d失常.

好開心呀

噚晚約咗四家姐食飯行街,好少單獨同佢出嚟食飯,因為佢去開旺角先搵我.我都冇準備過食乜.所以就是但去咗"瑩壽司"食飯,今次個牛肉炒烏冬幾好味.不過個燒汁雞扒定就一般啦.


行咗一陣街,睇嚟睇去都冇乜衫合眼緣....唉...唔單止係咁...仲係因為自己太大個肚腩,冇乜心機睇衫.


行唔到d乜,又係時候返歸,點知四家姐仲請我食Haagen daz添.佢有$50 coupon,好隨便咁食咗個新口味.個芒果味咁酸既.都係士多啤梨味好d.唉,家姐,我只可以"捨命"陪你食幾啖架咋.


好彩今晚放工同Berry,Kathy一齊去游水兼食飯.因為Berry係會員,所以可以入去YMCA的暖水池游水.個更衣室到幾好呀,仲有個男女共用的"海洋更衣室"唔知係點呢,係咪可以一家大細一齊去咁呢?唔知呢.因為要係特許會員先入得去.


今日游水定係傾計呢?Half-half啦.因為我星期六游過,唔可以咁"搏",Berry同Kathy就今年第一次游,都係要就住嚟.不過其實個大人池用咗半個場上堂,所以相對地多人游,咁我哋就去咗個細池游啦.但係有時會掂到地.不過我哋志在郁吓手手腳腳,都冇乜所謂.如果有個更加好的暖水池就好啦.


游完水咁就去食野同傾計啦.講起Berry去耕田都幾得意.佢係做義工同學習障礙的小朋友一齊耕田,都幾得意呀.不過都係要頂得住晒同污糟啦,仲可以近距離接觸好多"大小動物"啦.唔知Kathy見到蟲會點呢?會唔會好似睇到曱甴咁呢??嘻嘻...唔知我同Kathy幾時可以跟佢去呢?


游完水唔係太攰.不過都係要瞓啦....早抖.

"乖女",多謝你張咭呀!

我唔知你19號寄咗e-card畀我,今日先知,好開心,又好意外,多謝你呀.


我同"Dad"一齊睇,但係佢見到"Dad&Mum"就好似有滴汗咁...哈哈..."乖女"真係乖啦.so warm.


From: bobo (CMICKEY813@NETVIGATOR.COM)


唔知點先可以放大 d 呢...好似被限制咗...

Physics人唔該解釋吓

我有個同事成日 send d得意嘢.有時間睇吓啦.好有啟發性.


點樣令咁小的物件產生動力呢?如果加以利用,我哋可唔可以用類似的方式製造再生能源呢?唔駛吓吓風力水力咁.就好似一個小小的推動就可以有骨排效應....


真係唔記得哂 d Physics啦...呢d係咪叫potential energy transfer to kinetic energy?


http://www.youtube.com/watch?v=gyuwPetrmaY&search=japan

This is for you

This is for you...


(有打過DiabloII的人應該會知呢句係分享自己執到的寶物時候,由個女聲講既.)


估唔估到出呢首呢?呢首係我最鍾意的歌之一.好warm,好有feel,留意吓中間過門的結他+小提琴合奏,好有朝氣.高據我的古巨基榜50大既首十名之內!

送給你的兩首歌

全年無休 - 古巨基

曲 : 黃鈞仁 詞 : 姚若龍 編 : 包小忪

講愛你說得那么絕對
因為確定會一生無悔
敢要你拒絕別的人追
因為我才最懂你要的那種完美

不見得天天相對
卻能感覺心緊緊相隨
體貼是不讓深愛的人事與愿違

* 全年無休最恆溫的熱情
隨時隨地給你要的暖意
我也許偶爾惹你有一點生氣
卻絕對不會害得你傷心
全年無休最敏銳的深情
你的一點情緒都能感應
你也許偶爾怪我有些約束你
但一定懂得那是保護你疼你 *
Repeat all once



呢首都幾好架.不過我就唱唔出口啦.你呀...自己留意吓歌詞啦.


愛你 - 王心凌
詞：Hwang Se-Joon　曲：Lee Young-Min　中文詞：潘瑛+談曉珍+陳思宇

RAP：
yo yo yo yo Cyndi, what~what’s wrong with me? (愛你)
yo yo Cyndi baby, what’s wrong with me?
Cyndi, give me your love, you make me sneeze all the time
Now now怎麼我一直狂打噴嚏　在凌晨三點二十六分
let me sing let me sing a song陪妳入睡
what is love嗯哼我正在聽　妳要什麼都say yes
Cyndi I really do love you so

如果你突然打了個噴嚏
那一定就是我在想你
如果半夜被手機吵醒
啊那是因為我關心

常常想　你說的話是不是別有用心
明明很想相信　卻又忍不住懷疑
在你的心裡　我是否就是唯一
愛　就是有我常煩著你
*oh~baby　情話多說一點　想我就多看一眼
表現多一點點　讓我能　真的看見
good~Bye　少說一點　想陪你不只一天
多一點　讓我　心甘情願~~愛你*
（多一點　才會慢慢發現　因為你　讓我心甘情願）
喜歡在你的臂彎裡胡鬧
你的世界是一座城堡
在大頭貼畫滿心號
貼在手機上對你微笑
常常想　我說的話你是否聽得進去
明明很想生氣　卻又止不住笑意
（Oh~）在我的心裡　你真的就是唯一
愛　就是有我常賴著你

**就這樣　一天多一點　慢慢地累積感覺
兩人的世界　就能夠貼近一點*

小聚

呢排成日都唔記得嘢,星期四唔記得帶電話返屋企都唔知.但係返屋企又會記得叉電,第二朝記得拎返"舊電"出嚟,但係又唔記得換返電去個電話度.出咗門先知原來自己唔記得帶電話.返到到公司先發現,原來個電話嚮檯頭喎!唔通我患咗阿茲海默症?


(可能睇得太多次,我係用果套<<擁抱這分鐘>>嚟"煲機"做測試.大大話話,個file開咗十幾廿次.依家可以成功播哂成套戲,都冇hang機,開咗IE同播住片都係45-48度CPU,情況尚可.應該可以安排"出院手續"啦.)


哈,講得太遠啦.個多星期前約好咗Kathy同Berry星期五食晚飯.點知完全冇咗件事.今日仲有電話,冇電,Berry放假,Call極都搵唔到我.長期飛返屋企.真係好似失蹤咁.


好彩Berry有我公司電話,終於放工前搵到我!


去到旺角...(我成日去旺角,但係都唔知有乜好食的地方)


約去雅蘭,但係最後又去咗兆萬.最後真係好似我之前諗住同Mabel去的果間藏元食晚飯.


叫咗4碟3碟都有d驚喜.海鮮沙津估唔到咁精緻,內面有五件刺身添(賺哂啦),不過有洋蔥絲唔係人人啱.軟殼蟹卷都幾靚幾好味.魷魚筒飯就用d飯釀入魷魚筒切開.都幾得意.最普通都係牛肉烏冬.味道幾好.


我哋就冇食刺身,因為幾貴,不過聽同事講,一個話好,一個話一般.
我就試過午餐平d~$45刺身定食,有前菜有湯有餐飲,有好味的雪糕甜都唔錯架啦.有時間都係自己試吓.


食得唔係話十分飽,仲可以嚟個甜品,所以就走咗去之前上網睇openrice的comment,話好味的甜品(哈...上次同你講的果間呢...)


我哋叫咗三碗糊仔...芝麻,栗子,腰果,真係幾滑幾好味.不過食食吓,好鬼"溜",所以食唔哂添.


今晚傾過一陣計,好似都係講咗小小就要散啦.不過我哋都約咗星期三好天就去游水.希望去得成啦.

74:37

人生真係無常...同個朋友傾咗好耐.關於佢家人的病.我只可以mark吓問題,問吓家姐哥哥.有乜可以幫都好.


不過呢,我的速記真係好不濟.聽力亦有問題,唔知可唔可以真係轉達到問題呢.


希望佢哋可以少d風浪啦.快d得到醫治,好好哋休息吓啦.


講講吓,就嚟到結婚一週年,身邊的朋友都會關心吓我呢個唔多稱職的老婆有冇好好準備d驚喜嘢.


哈哈...唔話你哋知住...因為...我真係未準備呢.嘻嘻,多謝你哋咁關心呀.


有乜好提議歡迎直接搵我教吓我.

點樣貼膠布

點樣貼膠布

http://youtube.com/watch?v=FhklMGA01Gg&search=urawaza

真係幾聰明!

Proud of you!

After last night fighting for sister's computer, I'm already exhausted. I'm so sleepy and really want to take a rest ... ha...ha... sick leave again?! No way la...


I received this message at around 11:00 this morning, it really cheered me up!


Wondering why he email me such PowerPoint stuff, I opened the file, just 2 unremarkable slide... before closing it, hey, a familiar name come across my eyes.


"Pacific Recognition Award
1st Quarter, 2006

Notable Achievement (1 out of the 3...er???)

RA/QA Analyst Programmer
He has developed a traceability program now used in Korea and being trialed in China, and created and manages the GPRD RA/QA Database used by all Stryker divisions throughout the world. Besides, he constantly performs an excellent job, with extra requests handled efficiently without any question or concern, e.g. Pacific Management Team database, helped organizing annual staff party, etc."


Though we are both in the same field, our job is quite different. Actually I don't really know what he does these years, he had to work overtimes sometimes, and we "talk" less in office times this few years. Working in the same company for years, it's not easy to keep up good performance. It is nothing better than your excellent job is recognised by others. I'm really so glad!


Hey, want reward? Hmm... a meal for you tonight la. (luckily mother give me some food on Sunday!)

Forget the basic!

I'd already reviewed most of the component...


onboard sound card... why can't install the driver and tools!


Display Card is a trustworthy component, if it's not working, you simply can't see the screen!


OS installed again for twice.... With different setting for N times!


Until I finally review the CPU Front side bus (FSB) and the DRAM frequency of my DDRII 533MHz RAM! (which is the foremost setting! ... if it's not setting properly, the CPU just burn out!) I never doupt the AUTO setting of DRAM frequency set by the motherboard, it should be the safest mode without overclocking the CPU.


In the old age computer, there is no auto mode or jumperless mode, you should configure the jumper on board in order to set the correct clock speed. What you have to do in the past, is to find out the reference table for those setting for the target clock speed from the motherboard manual, then set the jumper accordingly. The invention of jumperless mode make overclock easy, but make dummy a headache when problem found! Why? Because, you can never find a reference table easily in nowadays manual!!! For advanced user, you can simply try it out with your own calculation. For those dummy like me, just use the default "AUTO" mode as suggested!


Ha... and that's the problem!!! I can never think of ....

Why? it's not the best setting! a DDRII 533MHz has been overclock to 800MHz with 200 FSB!! Yes, the clook speed come up is still 3GHz. P4 630 internal clock frequency is indeed 800MHz! but my RAM is just DDRII 533MHz. It has been stepping up too much! the RAM is overheat that cause to restart! Unexpected bad default setting for this motherboard!!


setting it to 667MHz on 266 FSB and make up to 3G Clock speed correctly, seems works overnight! Cheerful news to 4th sister?


Hey, I know "using default setting" is not the golden rule for some motherboard company.... but it's ASUS, a user friendly branding, should have tested the setting thoroughly. why it's still like that .....dull!! 6_@!


I think I'm closer to success, but it's already 2:00am this morning! I still need to take further investigation though...


Oh...France vs Swiss 0:0 ... it's time to sleep.

數得出的第三次晚餐

咪以為好熟就會成日見面,成日一齊食飯.


原來我同你只係單獨食過三次飯!


今日講講吓就變咗傾家事,其實有D好似都聽過,只係我的記性差,有d唔係記得咁清楚.


傾咗兩個幾鐘,但係Mabel同我好似都未夠喉.佢以為講咗一個鐘咋!


今日好開心,因為終於都畀咗本藥典畀你,仲一次過畀埋之前幫你買落的克勤演唱會DVD,同K DVD,(無啦啦收咗你車馬費,下次會唔會唔敢叫我買呢?)


買二送一,有一本好似幾啱你Level彈的琴書連示範音樂.有我好鍾意的"三千零一夜",又有"七友","三角誌"的音樂都幾好架.唔知你有冇聽過呢? At 17 的The Best is Yet To Come都幾好聽架.


希望你真係會The Best is Yet To Come 啦.

我終於聽話啦.

明知咁係好浪費時間,明知係咁費時失事.


我真係冇心機再糾纏落去.至少,我都算盡量嘗試過唔同方法.


放棄啦.....


暫時放低用cheap方法啦.希望快d甩身算啦.


我受夠啦.

雯雯好返d啦

上星期本來係君君生日,我有去影相,但係都冇時間執相分畀其他人.


見到雯雯因為敏感出到成身紅斑,之後幾日都冇心機打d乜.


好彩雯雯飲咗涼茶好好多.今日見到佢好d都放心啦.


雯雯今日同樺爾講電話,好得意,係咁叫樺爾過嚟屋企見佢.


樺爾丈丈:落雨呀...唔過得嚟呀.
雯雯:擔遮啦...
樺爾丈丈:我沖咗涼唔想出街啦.
雯雯:一日有沖一次涼就得架啦.
雯雯:樺爾丈丈呀~你過嚟啦,我有嘢畀你睇呀,你今日嚟我就畀你睇,你聽日嚟,我都唔畀你睇架啦.
樺爾丈丈:你叫丹丹姨姨影張相相畀我睇啦.


雯雯仲想講落佢架.講咗成五六分鐘,真係有d喋喋不休.哈哈.

睇相相

今日好開心呀,因為可以睇Kathy D結婚相.


睇到佢終於都嫁啦.拍拖七年,終於都開花結果.真係又開心,又唔捨得.(唔知點解打打吓字,忽然想起上年Mabel話見我嫁會好唔捨得.哈...傻婆,我又唔係又走)不過佢就真係會走...唔知係唔咁,所以真係幾唔同感覺.


因為Kathy想揀相去晒相整相簿,佢叫我同佢一齊揀,真係太睇得起我啦.


成個結婚過程只不過廿分鐘.之後再去附近同海邊影相,成輯相三百幾張.有花心機執相的只有七八張做咗tiff,仲要唔知點解揀果幾張.又執咗幾張黑白相,算係咁啦...(哈...郭可盈!!).


不過我睇咗幾張就開始不斷係咁彈...唉,點解會個面有樹葉影,面黑黑.而且好多相,都有明顯的問題,室內相都仲ok,戶外的相,背光,頭上種樹,唔水平,半白天半藍天(冇用偏光鏡-PL,冇用減光-ND),總之就曝光都唔係咁正常.連構圖都唔係咁正常...原來係日本人攝影師...唔通係唔同民俗風格所至?


到有d相ok嘞,就到多咗d路人甲乙丙.而且好多因為太晒,所以好多張都皺眉,都已經四五點鐘,仲咁好陽光.


我都明要影到Kathy最靚的一面,要好識得捕捉佢曇花一現的笑容.(但係應該都可以影得好d),唔知係咪未warm up,要屋企人睇住影,其實都幾唔自然...唔知會唔會成日相同佢哋一齊影吓,唔夠專心.


睇完成輯之後發覺,其實室內d過程相都算係OK架啦,至少係夠光...


唉...點解我係咁彈呢?我覺得可以好d囉.


個頭set得好唔好,唔講我都冇注意,都set得幾好呀.
新娘裙靚唔靚我都唔係好知點分.睇緊d相,淨係掛住睇個表情同動作.
見到新郎哥都幾自然,幾開心呀.新娘係咪太怕羞呢?哈~~~Kiss kiss, so sweet!!點解唔揀得喎!!!嘻嘻.


恭喜哂你哋呀....希望你哋白頭到老.好好哋生活啦.

行街睇戲炒麵

今朝晨咁早同四家姐阿dee樺爾一齊睇"達文西密碼",我冇睇過書,同事話會好睇d.好多人都睇咗,我都好奇想知講乜.但係可能明知呢類片係玩過程,個故事的目的可能好低能.宗教目的引起的殺人事件真係幾無聊.


唔好講佢宗教意義的問題,我只係當一部劇情片咁睇.最初都會估吓佢哋搞乜鬼,邊個係奸邊個係忠.明知個僕人同個主人夾計,但係都估唔到佢就係"Teacher".畀你估到晒就唔知叫好.所以我都幾enjoy前面3/4的時間.不過後尾半個鐘,真係唔做好過做.敗筆.


睇完戲返去見媽媽.好耐冇炒麵啦.好在仲有四家姐同媽媽幫,如果唔係真係幾雞手鴨腳.


樺爾真係乖,今日做咗"拖地貓".唔知爸爸媽媽會唔會因此可以開心一兩日呢?


之後仲同四家姐行街.好耐冇行.所以一買又買咗好多嘢.但係我就好著數.因為四家姐年年都話:"唔駛畀返錢畀我".真係我敬你一尺,你敬我一百丈.有咁多個家姐真係好多著數!!


今日去買衫,又睇到唔想睇到的情況,唔通真係咁肥?乜衫都唔啱著.唉...


最終都買咗三件橫間衫...應該都可以頂住檔著住先既.係咪好瘋狂呢?唔知以後四家姐會唔會一見到橫間衫.就會想起我呢?!

世界盃

今晚開始有世界盃睇啦,但係我冇有線或者Now,冇得睇,不過都冇乜所謂,因為我唔係球迷.


講真冇睇好邊一隊,段估大熱果d有實力的隊伍好似巴西,英格蘭,果d應該都可以出到線呱.話哂有個郎拿癲佬同美男子嚮度...其實佢幾人強馬壯,唔贏就真係唔啱啦.


不過傷兵太多的球隊好似荷蘭呀,法國呀,可能幾強都變弱隊,係扮受傷做秘密武器定係真係傷到出唔到,真係到時先知.


之前睇過荷蘭的聯賽都幾好睇.門將雲達沙應該都幾好架.個譯音有個丹的既果個呢,到底今年臨掛靴之前有冇好戲畀人睇呢,就真係要拭目以待啦.冇咗主將施斯,唔知會打成點....唔好咁快就出局呀.


不過我唔係話特別鍾意邊一隊,邊隊贏對我嚟講都冇所謂.勝出的果方只要係有實力,有氣勢,有策略咁贏,唔好出茅招打人傷人,或者搏大霧用上帝之手,球證咪偏幫,咁就己經好好睇架啦.


呀~呢個Game係同事send畀我玩架,都幾好玩,一齊玩啦.
世界盃1

黑雨

天文台在上午11時15分發出黑色暴雨警告信號取代紅色暴雨警告信號。


遲唔掛,早唔掛,就係返咗工你先嚟掛!


冇午飯食,出街食又唔知邊度有位.叫外賣,又冇人送.想餓死人咩~~~

Zip時間

呢排成日出街食,返到屋企就睇Death Note,冇乜時間上網.加上四家姐部機一厥不振,真係唔想寫嘢.


其實我放得工架啦,只係樺爾好多嘢做,搞到我好似晚晚罰留堂咁.


工作真係冇做得完....仲要唔係做緊自己個project...


又fix?!就算唔係我果part有問題,如果我果邊fix到,始終都要變咗我做.
唉...講到尾,如果我唔係做執頭執尾,我當然可以調番轉牽人哋個鼻子走啦.


冇前途又冇錢圖...


到底應該再等多幾個月讀埋書,考完試先走呀???定係嗱嗱聲走呢?


等吓樺爾放工,咁就留堂發噏風.如此這般,咁又過一日.

我是L

因為連續追睇<<死亡筆記>>,我的黑眼圈好比L!


我的同事對我說,看這漫畫要很花時間,因為要動腦筋.


我看卻還要花精神用腦筋轉換繁/簡體文字!!!


看到三十四了,小休可以嗎?

666 狂想

之前有兩個好朋友提起有關666及一個喜歡6的朋友(大概知道是你....和你...嗎?)


不其然想起,與6有緣當然不是碰巧,但我為什麼刻意與6有緣呢?


家中排行第6的我,生日日期也有著6的數字.小學的學號也曾是6,可是從小喜歡的數字卻不是6.


當初的6,是我首次在ICQ中用6_6作表情符號(Smileys),就像是一雙憂鬱的眼睛.申請網絡上使用的用戶名稱時,往往沒法直接使用DUNKEY這個名字.乾脆加上6_6就可以了. 就這樣,我成為了6.


庸庸"六六",勞勞"六六",六合彩又唔見我"附附六六"中獎喎!唉~~


一但用上了6,一世也與6有關...

生於12月6日, 另一個6的出現!!!

當6遇上另一個6....第二個6,可能會有第三個6出現??

密切期待!!!


(哈,似嗎???死神召喚,上腦了!!!)


(為了要有三篇有666的文章出現,刻意地分三篇文章,又分三個時間....太刻意.也不是一件好事.)

多謝支持

05年6月6日開blog至今已經一年了,我竟然寫了313篇!

為慶祝本博客一週年,現在正式宣告暫別!!


半日咁多啦!


多謝各位常來探訪又"摸門釘"的朋友們!

零六年六月六日六時六分六秒

零六年六月六日六時六分六秒的時候,我正在做什麼??


當然是睡覺啦!!Zzzzzz Zzzzzz 哈哈!!

中毒

噚晚同爸爸,媽媽,四家姐,阿dee,樺爾,一行六人一齊去屋企附近的一間屋村式酒樓食飯.


入到去睇到大部份人都係打邊爐,$58位任飲任食,似乎幾抵喎,不過爸爸又唔鍾意打邊爐,所以都係照叫餸啦.

都唔好講d伙計的服務態度啦,屋村生意就係有屋村式服務"態度"架啦...怪唔知呢個位置的食肆又開又倒閉啦.

真係第一次見到有"裙著"綠色的豆腐乾,媽媽仲撐d食到d菜入面的牙籤!!其實我影咗相...係唔係可以告佢架呢?

返到屋企,好似都冇乜嘢.以為冇事.點知.... 有冇試過?....真係會有"腸熱病"架.

今日請咗病假抖吓.睇咗"死亡筆記" 2x集...中咗毒添.

希望幻滅

今日又搞機,見到四家姐的主機板有新update,update咗之後都唔得...


本來以為已經搵到原因,搞咗成日,得個吉.


天啊......我冇乜時間啦.大限將至.何不好心行個方便就給我最後機會?!


唔通唔關sound card 插得唔好?莫非真係RAM的問題?


四家姐,唔好意思,睇嚟我呢個廢柴都要收山啦.都係回水畀你算啦.