這個星期停工了?

這星期五也曾上去爛屋看看,蘇頭又加了點膠管,水龍頭的接駁位改了些,其他如窗花也沒進展了.到底是因為要等煤氣喉做好了才做其他工程,還是時間沒抓緊呢?

煤氣睇位

今日介紹來的煤氣師父話可以走屋內....!都唔知係咪上一次的煤氣師父想收"下欄"所以先咁講,不過呢個師父都係咁講係好難走屋內...

不過都仲未有定案,又繼續等....

收冷氣機,煤氣睇位

今日,約咗Panasonic收冷氣機,又約咗個煤氣公司的師父過嚟睇位同拆熱水爐,點知個師父話最好都係更換煤氣喉, 但係d電線喉同水喉又頂住咗,所以要走屋外先得,(只怪我地搵煤氣公司上門上得遲,間裝修公司原本仲話可以幫我地安排....畀咗諚就唔跟呢d"額外工序"囉...",連提下我地都唔提...)

不過管理處指引講唔可以走屋外,就算走屋外,都要藏喉先得,但係煤氣公司又規定唔可以走屋外的屋苑就算做藏喉都唔可以做,所以建議我地去搵樓下專做藏喉的裝修公司,而呢個煤氣師父同佢地係有聯繫的,可以夾著做.佢講要撘棚的大約一萬多,我地已經有棚的,如果用得著,可以平幾千添.

於是我地就去問果間做開藏喉的裝修公司,嘩,要成萬三!仲要先畀一百先可以上去睇睇.我地諗一諗,都係問一問我地的裝修公司先再揀啦,如果呢間肯做埋,咁我地都唔駛追兩個火頭呀嘛.


不過我地的裝修公司話佢地冇氣牌,唔做得,所以要搵出面d人再幫手,既然佢有相熟的介紹,希望夾起上嚟會易d啦.仲話可以買爐有九折添,唔知係真唔係....

搵裝修

幾星期來千揀萬揀,希望把大裝修的重任交給一間裝修公司來做,不過看到大部份的裝修公司都有一套"既定程序"來屈你加碼加裝修費用,而有一間價錢還算較低,似乎包括的工料已經最多.而且廁所廚房也合心意.不個經三姐姐的專業評估為"手工差"....哎...再搵落去其實都係一樣,因為一分錢唔知有幾多分貨.到你搵到手工好的公司,又怕佢質數好難保證,又怕佢地唔包呢樣,漏包果樣,怕佢呃你.唔通我地只得一個選擇?

感激萬分

今日係母親節,不過我地都係如常咁同媽媽一齊去飲茶,雖然話上個星期媽媽+爸爸的生日就預祝埋母親節,不過正日喎,當然都要有d表示啦.

我星期五買咗一對耳環,想襯返大家姐的生日母親節鍊垂,只不過媽媽成日嫌大粒珍珠,太誇張喎,不過我就係唔知點解,見到有對大珍珠耳環,咁就又買咗佢返嚟啦...

今朝本來以為醒目啦,一早就起身同媽媽講母親節快樂,見大家"靜應應"好似冇人打算會返屋企見媽媽,(媽媽噚晚都已經喊定先,好在後尾玩下Wii又好似當冇乜事咁.)我咪攞我準備好的禮物"氹"住佢先啦,點知.....點知畀媽媽鬧....佢咁講,好似真係唔喜歡我的禮物呢,嗚嗚.....佢咁講其實都係唔想我亂洗錢啫,我明呀...不過,即時得到既反應係咁...當然會唔開心架啦.本來想氹佢...但係媽媽就係咁真咁直架啦....二家姐送的"花"仲"無謂"所以媽媽都係"扁咀",同佢影下相先笑咋...其實都冇乜幾何收花啫,笑下啦...

今日又係去裕滿人家飲茶,真係多人,好在等半粒鐘就得啫.都算係咁...數數下,原來都有十個人一齊食.

btw,今日真係要多謝三家姐,如果不是因為你,我是沒可能一下子可以 confirm 全屋家電呢...多謝哂你呀,今日係母親節,但係就搞到你冇得同瑩瑩去玩,下次我地去影相相補返數啦....今日三家姐好"大矇",下午搵太陽眼鏡,夜晚搵銀包.三家姐真的太攰了.多D休息啦!

收樓啦

今日終於都收樓啦,等咗三個月,雖然係長交吉期,不過好好彩,自落訂之後,樓市有升沒跌,本來都可以圖小利,不過我地真係自住的,並唔係要抄抄抄. 希望呢間屋真係可以安居啦.

今日約埋個裝修師父一齊收樓,本來以為佢會好細心咁同我地睇下間屋有冇問題,不過,佢一入屋就同我地講,呢度要拆,果到唔要,成間屋,好似冇一樣嘢留得.其實一個星期之前,呢間屋仲有租客住緊,一家四口,好似話個租客都唔想搬走架.但係經呢個裝修師父一講,唔通呢到真係咁破舊咩? (就係咁,印象有少少扣分)

之後再傾落去,其實成間屋好似炸過再起咁,雖然話係大裝修,但係都唔駛乜都唔要呱?