倒數 -距離還有1個月時間

今日去WA影婚紗相,7:30 就起身,見到自己個樣就唔知講乜好...尋日額頭仲係冇腫家,搞乜鬼今日要黎影相就搞到咁.個嘴邊都腫左少少,點算? 個天仲落緊雨,唔通真係想重影?
搞東搞西,差唔多9:00先出門.去到只係9:35,好似佢地sales之前講咁樣,早到真係冇人啋你.真係好,可以抖順條氣先.
去到無無聊聊,當然要八o下,望下其他準新人的樣啦...唔想講,都要講,見到有個男的個嘴好似未用還原靚靚拳咁...唔知有冇得"猛"?
好眼瞓,剛剛心想早知就Book下一個時段的時候,就有人話可以入去化妝間化妝啦.聽阿聰講佢地上次叫的化妝小姐技術好好,而且又好人,只係有d烟味...我都試著mark話要佢化妝.見到佢個口真係o趙緊香口膠.之後換衫同補妝的時候真係有d烟味呢...可惜
佢三兩下手勢就幫我修好眉,(早知尋日就唔駛自己修眉啦).見到佢幫我化妝,真係有d慚愧,平日不修篇幅的我,要化妝小姐東修修,西補補...
又望下其他人做緊乜,見佢地都差唔多化好啦,我就因為黏眼睫毛浪費左唔少時間.
恰恰下眼瞓,望下自己個樣,真係難以置信,大細眼,高低眉,唔對稱的嘴,大眼袋完全唔見哂,額頭同嘴邊仲唔見腫.一個字:強!
幫人影相就冇乜所謂,要我俾人影,就唔係好慣.樺爾就更加唔在講,一定唔自然啦.佢又好眼瞓,個鼻又有d腫,好彩叫佢都去化妝.
攝影助手唔知點解,食完個lunch就記錯左我個名,亂叫一通.都唔要求你記得我個名,不過唔記得就問下啦.
有時唔知係我唔留心,定係佢地的指示唔清楚,又可能我的聽力仲未完全恢復,做錯了不少動作.有個印象此較深刻的高難度的動作:
手抓住鞦韆,腳踏住鞦韆坐位,腳要直立,pat pat"gut"向上,上身向前俯伏,頭向前,微微向左,打出"六四面".
個羽毛頭好似好誇張咁,我最鐘意就係o個個小碎花鬢辮的造型,應該會襯我d.金色的晚裝都幾好.又有少少"捲髮".講到個民俗服,樺爾又唔肯著蘇格蘭裙...-_- 其實個唐裝都OK啦,但係佢又話唔好睇.終於咪又係揀左個西古裝又話冇劍用喇.
成個過程足足用左7個幾鐘,總算順順利利到5:00鐘走人.响又一城逛左一陣仲見到好耐冇見的Grace,自從佢响英國返來,都未見過佢.原來佢都係住响大窩口,不過一個站頭一個站尾.

hehe...聽日就可以睇相,快過好多人,成一個月先可以睇到.只要張單寫左,佢地點都要死個期出黎.