倒數 -距離還有30日時間

約好四家姐同樺爾放工後到WA睇相,點知仲落雨添...我怕四家姐又病多次就真係罪過...匆忙間想買把傘都係唔係咁易.好彩擾攘左一輪都冇雨啦.遲上加遲...
入到去WA見到好多pair都坐左係到揀緊相,樺爾又未到,咁就由我同四家姐揀住先啦.
聽講好多間公司的手法都係一樣,要你分類揀相,要你先揀一Set,著少著少咁揀,希望你要的比唔要的多.不過我地揀相,就算你一次過定係分好多次,揀來揀去咪又係咁...唔合心意的,或者好鍾意的唔會走漏眼,但係麻麻地或者場地差唔多的,有同冇都差唔多,要同唔要都冇乜所謂.
揀左小碎花鬢辮頭造型的o個一Set,樺爾就到,再Screen一次都係要o個十張...不過其實有幾張落選的都幾好架...不過要$96一張...好似就浪費左少少...都係唔要佢啦.
如是者個小姐一set一set咁俾d相我哋睇,第二套婚紗有個好大的羽毛頭飾,睇落都幾成熟,唔係太喜歡. 樺爾仲不時話,呢張似章子怡,o個張似鞏俐... 6_@,四家姐仲話有張似吾湯吾水o個個黃淑儀!@#$#@!$ 都唔知講乜好. 即刻掉哂去...雖然佢哋都係靚女..但唔係我嚟架嘛...
到第三個金色晚裝造型時...响車外的相都唔多好,床上面的相...樺爾又唔係好自然.之後又睇到民族服的相,個場地同個人物的比例又好似有d問題咁.而且動作又怪怪地.始終個攝影師都係"撘"影幾張,同之前對左半日的攝影師當然係有d出入.
三對對裝相,只有一對可以收貨.不過就揀多左一張樺爾的相.個花樣年華look都幾好.我其實好鐘意個場景氣氛,不過同樺爾影o個張,佢的眼俾眼鏡框遮住左...唔要得6_~.
哈,好似成日講到係樺爾唔爭氣咁,其實個攝影師主要都係影女仔o個邊,男仔就成日企埋一邊.所以女仔d相可以揀到好多.但男仔d相一唔好就冇其他選擇.好多相的感覺都好好,只係個人唔靚或者有d唔自然啫.
睇相睇到呢度,都覺得好似唔止咁少相架.原來車入面的相,同戶外某d場地都影左一d特別校果相.(據聞話要特別收Charge先有得影,但係個攝影師就特別影左好幾張呢類相...咁先可以呃你多d架嘛!)不過感覺好正,加少少錢都值得啦.
睇吓睇吓,只係剩低我哋仲揀緊相,個小姐都好耐心咁等我哋.都幾好態度.
就咁樣揀咗三十幾張相...咁少?!係呀....其實多幾張都得,不過如果夠既,多幾張校果差唔多的相咪又差唔多.本著要好相,但又唔要太多心的精神,都唔可以好好醜醜乜都要哂架.
一講到話要加Coating,個小姐就好俾心機介紹嘞,加左Laser或網紋的校果都好似嘛嘛地....加左一倍價錢就係為左個珍珠Coating同普通磨沙面.其實明知道出面街價平好多,但都冇理由人哋好好地為你影,你就度住度住又要煩著去俾其他公司加Coating.唯有自己呃自己講句:"其實都值既!"咁啦.
可能係"自投羅網型",個小姐都俾返好多"優惠"我哋,送多對對裝相架可以選用校果相,個大相又可以加珍珠Coating,結婚證書套都有張相.仲送d銀包相添,不過勾吓勾吓,鍾意的相都勾左出黎做其他野,唔知到時留低响相簿的相會係點架呢?