(生日會)

今日係五月之星生日會.媽媽,大家姐,大姐夫,二家姐都係五月生日.但係因為通通都係大人的關係,晏晝又食得太飽,冇去買生日蛋糕.生日仲要自己"暗荷包"請我哋食晏,生日會都唔似生日會.


都係我唔好呢...之前又冇好好訂喎,冇四家姐去買生日蛋糕就係咁架啦....


今日啟賢有新髮型,因為蘊德同佢剪咗胎毛,好可愛架...只可惜,我連相機都冇帶到...


係咪好奇呢...我咁鍾意影相,冇理由冇帶架嘛!!!咪就係掛住抬自己部機去同四家姐部壞鬼新機去移形換影囉.都唔知乜事,總之帶返屋企同佢check吓先.


今日同阿妹羨寧講多咗嘢,但係唔係好事....因為我以為佢霸住個望遠鏡,唔肯畀瑩瑩玩.又要佢同人一齊分享.點知原來個望遠鏡係二姑姐分畀佢玩.我要佢哋輪住玩.就好似將佢擁有的物品充公(土地改革?!).羨寧當然唔肯啦.但係佢又唔知點同我講.因為就算係屬於佢既,都應該同人分享,所以佢又好似知自己唔啱,但係又想話係佢既.不過就係唔識點表達.


我就急急忙想起上次媽媽用猜拳果招,我就同佢講,咁猜拳睇吓邊個贏就邊個玩先啦.點知佢就猛話:"唔係呀...唔係呀...."唔肯猜.咁我就唯有話,你唔猜咁就最尾架啦,點知佢都唔肯猜.(嘩...阿妹好可憐呀...我都唔知我咁就蝦緊呀妹啦)


瑩瑩同君君就即刻猜,君君贏咗.咁佢可以睇先.其實位位睇五秒,根本睇唔到乜.到呀妹睇,佢就又話:"唔係呀...媽媽...媽媽..."真係搞佢唔掂.好在佢叫咗蘊德嚟主持大局.


蘊德入嚟,一睇就知乜事.佢話個望遠鏡係二姑姐啱啱送畀羨寧,佢就同羨寧講:個望遠鏡係你既,但係你都要同人分享架.你唔肯分享,咁我就唔畀你帶返屋企啦."


嘩呢招果然使得!都係媽媽先有咁強的本事!


點知後尾玩兩玩,個望遠鏡條掛繩個釦爛咗,我就即刻幫佢整番,將功補過.我整番好,叫佢多謝我又得,叫佢鍚啖丹丹姑姐又得.爽嘩~


今日睇完北京之旅,因為忙住整番個望遠鏡釦,都冇時間睇大家姐的瑞士之旅添...唔知幾時可以睇返呢.


返屋企,坐三家姐架車,瑩瑩每次眼瞓就會語無倫次,今日就話:"我唔鍾意佢哋返屋企呀...我唔想佢哋走呀..."


係喎,唔記得講,今日雯雯著得好靚呀,又好怕羞喎,含羞答答,好得意呀.