瑩瑩生日會Part II

上星期同屋企人開八月之星生日會,今次的主角就只有瑩瑩,家陣d小朋友好幸福架,成日會有生日party去玩.不過就真係辛苦咗佢地的父母啦.


三家姐本來都唔想搞Party,不過見Yumi咁多朋友仔,幾年來都冇搞到,今次就要盛大舉行啦.
瑩瑩之前話想去KFC搞,不過可惜又Book唔到場地...所以就去咗佢地的屋苑搞生日party啦.


三家姐成個幾星期就開始準備呢個生日會,又做咗個靚靚back drop,各式食物,回禮等等,我同樺爾都有幫手去訂個三磅的Hello Kitty Princess生日蛋糕.嘩~原來係咁大個架.足足可以畀30多人食架.


因為三家姐姐夫同樺爾都要去攞食物,我就聽三家姐的吩咐去咗會所到佈置場地.只係得返20分鐘就要開始啦,但係我見到個場地先想到,我對佈置場地一點經驗都冇,小朋友都陸續到達,但係我只係放好椅,吹咗幾個汽球,同貼咗個Backdrop,至於安置個相機位置同叫小朋友簽名我都做唔到.好在呢個時候四家姐都落嚟一齊佈置.


不過我一開始吹波波之後,小朋友就不斷問我攞波波,吹都吹都冇氣啦.好彩媽媽,三姐夫同四家姐都加入一齊吹咋.


我估我大大話話都吹咗十幾廿個波波.有個肥仔問我攞咗一個玩玩下唔見咗,又問我攞喎,一問仲問我攞兩個添.我叫佢地搵返個波佢又好似冇反應,見佢都叫做有禮貌d,就畀佢啦,其實我都唔知點拒絕d小朋友.


另外兩個女仔見到心形波波就猛話要.後尾就連四家姐吹畀君君的心形波波都搶埋.搞到君君好唔開心又喊添.有一個細路直頭當我係工人咁,呼喝我叫我吹一個畀佢,我直頭唔鬼騷佢,不過三家姐工人就幫我吹咗畀果個冇離禮貌的細路,遇著d咁的細路真係唔知點理佢好.


後尾呢個細路仲打到君君,君君只會同返我地講話果果男仔蝦佢.相比其他小朋友,我地屋企的小朋友真係好純,可能會經常畀人蝦添.我就唔想敎君君去搶去鬥...不過咁又係咪應該咁教佢呢?有乜事都係搵大人同佢出頭,又成日畀人蝦.


.....想得太多啦,呢個世代的小朋友真係唔打唔得.....


三家姐的回禮禮物好特別架,就係教小朋友一齊畫靚靚衫.十幾個小朋友一齊畫,估唔到佢地都肯靜落嚟畫畫喎.三家姐仲準備咗一d填色模畀小朋友填色,好多小朋友都好開心呀.真係一個好好的親子活動.


三家姐同四家姐果然都係美術天份好d既人,三家姐設計的熊貓衫大受歡迎,而四家姐就好叻執生,連君君畫得唔好的衫都畀好畫返靚靚,真係好叻叻架.


今日的主角雖然係瑩瑩,但係唔知點解,佢好似好靜咁,影相的時間仲好"嗲"d男仔添...希望佢大個d知道乜點叫男女受受不親啦....可能呢個concept都係不合時宜啦.


忙咗一個下午,好快就過咗一日,同小朋友一齊玩真係好...鬼...死...攰架.