剝牙篇

好耐未剝過牙啦,自從當年要剝一隻智慧齒,已經相隔好多年冇"郁"棚牙啦...


其實上個星期本來好似有少少問題咁,但係以為敏感牙齒冇理到佢,依家搞到連隻呀都冇埋添.唔通我講咗大話,所以要罰我"甩大牙"? ....冤枉呀..."十一月飛花呀"...


其實我都幾怕睇牙醫,因為細個好少睇,棚牙好醜怪,唔好意思去睇牙.


本來想去之前洗牙的果間,因為之前洗牙時個牙醫都叫我最好剝咗呢隻智慧齒,問下要幾錢,好似講話要$12xx咁上下,但係我又唔覺得痛,都冇理佢.點知呢個牙醫今日嚮中環應診...唉,唯有去撞第二間.點知太遲出門,要下午先有得睇.


今日樺爾仲陪我睇醫生添,真係好感動.(不過要佢請假.真係唔好意思... 6_^),去到呢間新開的診所,門面真係好high $$..真係怕佢會收好貴,檢查都要$200,但係如果要做手術就收少d,收$80,我心知都係要剝啦...但係個護士又唔講幾錢一隻大牙喎.都係要問醫生先講畀佢"略"架啦.


原來等睇牙醫的時間係耐過剝牙好多架,個護士仲叫我去行街食下嘢先返去睇牙喎.同樺爾行咗一陣,佢返屋企我就去診所.


入到去診所,牙醫講冇兩講,就一邊睇我d牙,一邊口述我的牙齒有乜毛病.我以為係左邊上高第二隻,原來係左邊上顎的智慧齒呀.牙醫話,因為我的牙冠垂直崩出,如果我補牙都可能補完都好快再甩,所以建議我剝咗佢.問埋價錢,$1100 +$80 檢查,都ok公道啦.咁佢就開始啦.


我feel到支針"gut"咗我幾下,之後就好苦..開始有D麻痺...呢到有"黑超"戴,所以冇咁直接睇到個醫生,而且又有保護,都幾好丫.好快就搞掂,用咗15分鐘咋.個牙醫話我的牙有"倒鈎"所以難剝d喎.仲問我要唔要返隻牙留念喎.唉...仲細咩~


出去畀錢等攞藥的時候,個護士仲陰陰嘴笑我講唔到嘢添...真係呀...-_-專業..知唔知乜嘢係專業呀...


回家時只可以打電話畀樺爾,但係又講唔到嘢喎,所以係咁"唔唔...唔唔"咁講嘢,好好笑,低低能能.


行行下,仲有個人走嚟問我幾多點添,我只可以畀個表佢睇,真係好似啞巴咁.


之後仲要食唔熱的食物,諗嚟諗去,都係去食日本嘢啦.d魚會容易"趙"d,不過今日試呢間日本嘢...真係唔多好味,可能我地叫得唔好啦,只係叫咗一個魚生定食,一個壽司定食,同鹽燒青魚,以呢間店的人流,魚生有雪雪地的感覺,服務又麻麻...應該都唔會再去.