一如平常的星期日

今天是母親節,但係同平時的星期日都差不多,因為通常都係family day,今日同四家姐一齊請爸爸媽媽阿Dee飲茶,雖然食物好一般,不過爸爸媽媽都好開心.因為我地呢個組合好耐冇一齊食飯啦.


食完飯,本來想同四家姐行一陣街,好耐冇同佢傾計啦,點知講冇兩句,同佢入咗首飾店睇嘢,之後好快又分開啦...唔...宜家佢好唔得閒啦,冇人幫我揀衫真係好唔習慣.


返番媽媽屋企,好熱鬧呀,以為三家姐唔嚟,就冇乜人到,點知,阿圖都照樣帶咗瑩瑩嚟,二家姐又帶雯雯過嚟,冇幾耐,哥哥一家到嚟到.


今日阿圖一個對五個小朋友,一齊玩scrabble,玩咗一兩次雯雯就走咗去,啟賢未識玩走嚟走去,玩其他嘢,君君同羨寧都轉玩層層疊,不過,其實係玩砌積木喎,正當我同啟賢玩緊,雯雯就走嚟搶咗d積木走喎,唔知點解,一時間我就好似小朋友咁,扁嘴喊喎,雯雯就同君君講:"丹丹姨姨好似個小朋友咁喎."過咗一陣,我地又玩"骨牌",跟住仲一齊推骨牌,一齊拍手掌添.


今日哥哥同阿Dee仲去會所到打乒乓球,我就陪咗樺爾同阿圖打美式桌球,哈,點知"負負碌碌"畀我入咗半枱波喎.之後走咗去同哥哥阿Dee到打乒乓球,真係好耐都冇對戰過,好彩上個月都打過一次,冇咁生疏,好開心呀.打到唔捨得返屋企食晚飯.

今晚媽媽下廚,雖然係家常便飯,但係我地個個都食到"lam lam利",真係要多謝媽媽,賜我飲食.