回尾槍打到嚟

點解要花個半鐘返屋企?!


因為要先讓乘客下車,所以下車讓人下車,連自己都下了車! 花咗半個鐘搭地鐵.

因為要排隊搭小巴,當有人遇到認識的人時...佢地會...


等等下車,見到阿聰,佢好乖好守秩序,冇"打尖"架.用咗45分鐘先上到小巴,唔知為乜要咁辛苦,不如留低做嘢?!!


好矛盾,本身今日我都病病地怕凍,可以早放當然好啦,但係今個星期做唔完的嘢,下星期咪又要交功課啦,點都要OT,算啦,走就走啦....


呢個柏布呀,走咗又返嚟,唔知係咪遇到蝴蝶,一齊玩合體,一個"屈尾十"返嚟再打過.有冇人可以講解下呢個天文現象呀?


btw,司機真係好偉大...個個都返歸,但係佢地忙到死.

沒有KHC的日子延續篇之四

哎......冇心機呀......返歸啦....


這個白痴 ......... 沒智商 得個痴 時常被騙極容易
.........
這個白痴 受你蒙騙亦可以 受你點 給你指 到最終的那時
事已至此 誰會最易 .......
oh...其實詐蠢 全為你付出的機智

沒有KHC的日子延續篇之三

今日個Server Down 咗成朝,我冇心機做,就搞過另一個project的手尾.


日日都會匯報情況,為咗唔想畀個假希望 (false hope)畀老細,我又老實地講...係冇進展既...(點呀...)


不過其實情況唔係想象中簡單,又或者我又想多咗啦.


Anyway~~~我都係要死出嚟架啦.


今日中途加入開會,一入門口,老細就問我同另外一個同事有冇壓力.都唔知點答,只係隨便講,"唔知呢..."


其實唔係有冇壓力,只係未解決啫.(6_@:唔係會有異味果種喎...)


忽然另我想起星期六入元朗同三家姐一家人食飯,三姐夫講起"壓力"呢兩個字,佢就同瑩瑩講,話佢唔知乜野係壓力,點知瑩瑩竟然語出驚人:

"我真係知乜嘢叫做壓力架,壓力係好重好重,壓住好辛苦咁架"

沒有KHC的日子延續篇之二

我唔想日日都要九點走....


嗚嗚....


原來個Vendor仲有好多嘢未做,就算用得返大部份的CODE,可能都要Fix其他問題.做唔到,唔洗諗住做其他工作,如果好彩寫得完,又會加新工作再做多D呢個Project的嘢,唉,開始有見唔到盡頭的感覺....


我想放假呀....

沒有KHC的日子延續篇之一

KHC要搞VISA的關係,所以又離開香港一星期,雖然佢臨走已經盡最大努力,希望一齊完成果個MI.


只係我地始終都欠缺一些經驗.而呢件工作,連Vendor都好似想側側膊唔做,偏偏又要趕快完成.哎...何必偏偏玩謝我?


今日玩XSL,呢個Technology唔係新,只不過我冇樣精,搞咗半個下午,好似都冇乜起色,搞到我發呆,Dum地兼抓狂...不得其法.個God Dxxx Server又成日停,試到好似得,又其實唔得.


嬲嬲地走咗去問XML/XSL勁人,係喎,點解我想唔起Restart個Web Server呢,真係令我"茅薩頓胎"

今日冇乜特別

星期六又入去三家姐屋企,今次只係想見下剛病好的瑩瑩.


臨入去之前,忽然想起之前同四家姐睇中的一對情侶戒指,今日終於都有機會同樺爾一齊去揀啦.其實以前都睇過幾間飾物店,但係覺得靚的,好型的個圈圈就好厚,我地大家都戴唔慣,成日覺得頂住,有礙打字.


我同樺爾揀咗之前同四家姐揀的果隻,再試多幾對,但係始終都係第一對啱D,佢好似幾薄咁,希望之後可以經常帶就好啦.


哈哈...左揀右揀,原來第一眼睇中的戒指,如果戴得上,就咁就一世啦...

本Pair

今個星期的工作,又急又難做,又唔識做.本來返到屋企仲想搵料,但係都已經冇精神,所以星期二就走咗去同KHC游水,見到好多好笑的嘢...嘻嘻,笑仲多過游水.


不過游咗水又好似精神d喎.如果日日都游水,個人會唔會清醒d架?


呢排見咗多KHC,但係下星期佢又走過....唔,得返我一個人,唔制呀...

終於Launch咗個project

呢兩個月密密做的project終於Launch咗,好在有Kathy同身邊兩位同事幫手,如果唔係我都冇辦法做得完個project.


本應可以再smooth D,只係因為本身應該一早就check好的嘢,我冇好仔細睇.真係對唔住Kathy,佢本來約好朋友唱K,不過好彩佢都唔怪我,又好細心咁幫我一齊搞.只係我都有點介懷,應該要加強工作效能,同工作效益....
希望我可以改一改.


搞到十點幾先同Kathy + Den Den + 小音符唱K.今日雖然可以嗌下但係已經冇乜氣.


今日好搞笑,我地唱完K,一路話陪小音符搵通宵巴士返屯門,點知搵唔到,累佢白行之外,我地行到油麻地,諗住去佐敦撘小巴,點知夜果頭,得返元朗屯門小巴,上車一刻先知我地大家都洗光洗淨d錢,好彩kathy仲有廿幾蚊"神沙".去到麗城先可以搵間Circle K用EPS買嘢攞錢撘的士返屋企. 6_*

呢頭做好個project以為可以抖抖,點知又有另一個麻煩的project,又要勾起我早幾個月的回憶.學海真係無涯,不過我好似有學習障礙...點先可以消除佢呢?

終於打到籃球啦

今日好充實,朝早6:xx起身,6:30am出門上山打籃球,點知連個細場都裝修,好彩去到荃景圍公園有半個籃球場.一朝早,只有樺爾同伯伯一齊打波.


打到8:00am食早餐,返屋企沖涼,抖一陣就入去元朗同三家姐瑩瑩睇Keroro大電影二.個故仔的笑位,好似得大人先識食.見瑩瑩頭果半個鐘就好興奮,之後好似好悶咁.


之後去咗目黑食壽司,瑩瑩就話手卷好似ice-cream咁.原來佢同我都鍾意食蟹子架.


一講到去游水,瑩瑩又好開心啦.同佢玩水上捉迷藏,叫佢數十聲之後我地捉佢,佢問"係咪我地會游水嚟捉佢架",點知佢數數下去到池邊上水,走咗去,真係鬼馬.玩鬥快游去我度,佢就同媽媽講不如鬥慢啦,咁就鬥慢啦,點知我游到去佢度,佢捉到我,就忽然話自己贏啦.


今日見瑩瑩畫Bomberman,同各式各樣的bomb,好得意架.

KHC返嚟啦!

成個星期都冇時間update呢個blog,皆因手腳又慢,腦筋又唔靈活的我,搞少少嘢都要花費好多氣力...


KHC返嚟真係好....


見到KHC好輕鬆就解決問題,慚愧....應該要改變一下自己的依賴的性格.


不安,依然存在...聽日又要交功課...唉...好煩.

做乜鬼運動

上次同樺爾用咗好多cash dollar,買咗個新籃球,加$17就買到.本來星期一就想同佢去開齋.點知又落兩,到星期三好天少少,點知冇場地...

今朝想早d起身,10:xx去到個球場,依然係有人鬥緊波...點解咁對個波呀...佢都想有人打下佢架嘛.


因為我好想游水,又想入去元朗同瑩瑩游水啦...本來叫咗四家姐一齊去,佢竟然去行街喎...媽媽二家姐都唔得....


我同樺爾入到元朗先食晏,最終係"游咗"(行到好濕呀)元朗個大圈,去咗千色廣場,合益廣場,一路行到去咗新元朗中心,冇戲啱睇,又去返千色...

等到瑩瑩學完琴,返到佢屋企,就變咗打NDSL.....(我同瑩瑩都好想游水架...不過,算啦...都係下次先啦...)


今日同瑩瑩玩炸彈人,佢又想重施故技,叫我入洞洞啦,佢似乎當我地唔知佢奸計...好抵死,如果同樺爾咁佢就唔好玩啦...所以....我走咗去,點知唔小心炸死咗佢.好彩咗好乖冇發脾氣唧.個傻妹玩到忘形,成日都當黑色的炸彈人係樺爾...成日叫:樺爾唔係殺我,樺爾你今次要畀我贏...我只不過係一個幕後代玩咋...6_<~~ 嗚嗚...


之後同瑩瑩跳舞,睇佢食晚飯,又睇佢唱歌的movie...佢好叻架,成首溏心風暴插曲,"My love will get you home"都唱到.好好聽呀.


今日仲一齊睇熊貓節目添....本身我都唔鐘意熊貓,但係原來都幾得意呀.

沒有KHC的日子--第三天

今日搞好咗一份Document,不過臨尾仲要改一改先可以出街.今日係星期五,心情反而好緊張.因為如果今日的事辦不完,下星期的所有工作都會更加趕.所以唔可以鬆懈,搞到八點先走得.

其實我經常會想,係唔晚上的休息唔夠,又冇去做運動,令到自己冇乜活力.噚日如果唔係落雨,真係有個衝動想去深水土步游泳池游水.....

好想去游水呀....................... 游水.......


*********************

晚上同琪琪,阿易,阿聰去旺角稻香打邊爐,本身唔知佢地約打邊爐,叫咗樺爾一齊去,我地遲到,去到都仲要呆等半個鐘先有得入座,到入座已經八點九,同個侍應姐姐講咗幾分鐘,問佢當九點入座都唔得,九點鐘過後每碟平$10加埋一,即係$11...你話,差咁遠,我地唯有再等15分鐘啦,好彩個侍應姐姐都好有口齒.九點過少少終於有得食啦.


見係琪琪約,所以都冇理過食乜.仲以為佢有囍事宣佈添.不過聽佢講,希望下年會聽到佢的好消息啦.


夜晚唔飲得提神的飲品,所今晚就飲咗一支生力啤,佢地話我好High,我其實只不過係開懷咗少少咋嘛...


講真,呢排星期一至五都好悶...開懷d,唔好咩?

沒有KHC的日子--第二天

今朝唔記得咗帶眼鏡返工...(唔係戴...因為我只係對電腦先會戴架咋)成朝都唔舒服.


下午Lunch都係嗱嗱聲走返屋企攞眼鏡,用咗成個lunch time,點知一出地鐵落好大兩,搞到有遮都冇用.


其實我咁大頭蝦,有冇KHC都係咁架啦...不過...好似好多嘢都係原先係佢做,但係佢一唔係度,兩三個人先夠follow.所以都暗暗佩服佢.


冇法啦,鬼叫我成日咁鬼慢手腳咩,好似好多嘢逼到埋身咁添.好想抖一抖,但係咁又一個星期...點算呀?

沒有KHC的日子--第一天

今日打後的一個多月,KHC都會Out of Office.本來成個Project都有佢照住,我可以唔駛理d阿哥阿姐.依家又要做document,又要開始理佢地添...


今日冇咗KHC,其他同事都不斷提起佢,講起.Net,又講個Framework,又講佢做開的Project,又講下新的Project點做Interop....


我睇到坐我隔離的小弟弟今日好忙.阿哥阿姐都要直接搵佢.聽日就要交工課,但係個so call 的Framework又@#$@%,又要fix爆Bit問題,搞到佢由叫媽媽到開口講潮州話,再夜就要PG家長指引.足足搞到八點幾都好似未得.聽佢講食飯之後仲要返去再做.


我都唔見得好佢幾多.見到份份document都好似要寫好耐.都唔知點頂.唉,仲無啦啦要理Word convert to XML的問題...可恨我唔夠Technical....

回歸與我

回歸對於我嚟講,只不過多咗一日補假,慶祝節目都係留返遊客睇下啦,遊行咁逼人,都係咪搞我.


前晚入咗去元朗同三家姐一家人玩,打NDSL打下打下搞到留過夜.第二日又繼續打,加埋三家姐的朋友,又打Wii,又打NDSL,四部至六部機連線一齊打爽解,炸彈人.真係打機都打到傻.


同小鬼瑩瑩打機真係好開心,估唔到佢五歲都未夠,可以打機打得咁勁(叻過我好多!可以同大人一齊玩都唔死!).佢成日叫我地同佢玩炸彈人,佢會叫我地唔好自殺,唔好殺佢,不過就算我地唔小心殺咗佢幾多次都會原諒我地喎.佢又會出鬼主意,話:"樺爾丈丈,你入去個洞度呀."之後,佢就行去個洞口放個炸彈,炸死咗樺爾啦.真係畀佢笑死.


本身係打機低能的我,經過佢地特訓之後,我好似冇咁遲鈍啦,唔知之後會唔會又打回原型啦.

攤到凍的house warming

約咗好耐話去Kathy屋企玩,五月又冇時間,由六月頭約,唔係我唔得,就係Kathy唔得,約約下搞到今日先入到屋.本來話想買份好d的入伙禮,講下講下又變咗冇買啦...真係失敗.


Hehe...不過今日真係幾好,又睇咗天台,好爽呀...有得種花,真係好啦.


間屋雖然細細地,但係好舒服,好整潔.我幾鍾意個廳同廚房四四正正.


玩咗Wii...91 Pin Bowling,好好玩呀...


睇咗Kathy的結婚相簿,好靚呀本相簿...天色真係好好.哈...我真係衰,因為之前睇過晒佢d相,所以都冇果種好奇的感覺.不過,晒咗出嚟的相比起嚮電腦入面睇,始終都好d.好實在.


今日第一次同Berry,Kathy打Wii,Kathy打得好叻呀,Berry應該係未習慣啫,我就一向係打機低能,都係兩個男仔打得叻D.


打咗幾次Wii,雖然好好玩,不過我又開始諗緊,係咪唔應該買Wii,如果好似PS2咁,玩咗大半年就唔多玩,咁都好浪費囉.算啦,第日再算.


今日最開心的係Kathy為我地親自下廚,有好好味的"椒類"套餐,食咗包唔會焦慮的青椒紅椒洋葱煎蛋(我想食蕃茄同腸呀),豉椒排骨啦,馬拉盞小白菜.Hehe...不過,我成日搞住Kathy,搞到佢好似美女廚房咁添.


唔知係咪因為好好味的關係呢...好似唔係好夠喉咁...飯後仲有竹蔗茅根馬蹄紅蘿蔔糖水添...飲完真係飽啦.(不過唔知點解今晚,我好似好大食咁添,返到屋企...都仲想食...食...食...但係個肚又脹脹地喎...)


講講下,我想食個杯麵...但係食咗又可能太飽喎...點好呢?都係瞓覺啦.

其實我地乜都冇做過

如果冇記錯,上年週年前夕親自下廚煮咗一餐外,正日要返工,好似冇慶祝到添.講真都好似唔多記得做過乜添,所以今年就有心想記念一下...不過都係冇乜好記添.


~ 12:xx pm
噚日瞓瞓瞓,有得瞓就好瞓啦.好攰呀...由朝瞓到中午,不見天日.


食糭做午餐,本來想出街,但係夏日炎炎,打狗都唔出街...唔想中暑,所以又繼續瞓瞓瞓....

6~G
>(-o=)<
^^^

出到去奧海城,都已經5:xxp.m,本來樺爾想搵附近的一間食肆,點知冇開添.


行兩行就肚仔餓,唯有去奧海城搵食,入咗"甘味",又揀咗日式嘢食添...
牛肩飯餐,有湯...水咗d,有沙津...得粟米咋?!
關東煮...普通啦
烏冬...可以啦
帆立貝...熟的..仲熱的...
comment, 唔覺得抵食,又唔係唔飽,不過冇滿足的感覺...好似掙咗d乜咁....
服務一般,食物一般,冇驚喜.


噚日終於都買到樺爾幾個月前想話要買的東西,一件恤衫,一條呔,因為之前自己行咗好多間都揀唔落手,今日算係好好成績架啦,至少都搵到一條合眼緣的呔...樺爾仲話要Hello Kitty呔,咪玩啦...


話就話係週年,除咗會出去荃灣以外的地方行下,基本上都係同平時一樣咁過.


(平時都係咁好,所以都冇乜分別架啦... 呵呵 6_~ )


唔...講真,每年呢個時候,就會比較結婚前後的分別,又會想起以前...畢竟又過咗一年啦.


今日樺爾仲冇啦啦提起佢的朱哲琴...呢果隻"阿姐鼓",想起都嚇到我打冷顫.真係不懂欣賞.

又一年

本來想寫一寫兩週年的感想,但係上MSN見到一個好朋友,又猛咁傾添....


咁又一年啦,唔知聽日(係今日先啱)...會點呢?

假如有一天...你未瞓醒

假如有一天...你未瞓醒,

你可能會一早起身慢吞吞,
你可能會見到巴士都冇氣追,
你可能會有小巴都唔知要上車,
你可能會因此遲到,
你可能會唔記得買早餐,
你可能會主打開會都釣魚,
你可能會唔想做嘢,
你可能會唔想食嘢,
你可能會亂跟人叫嘢食,
你可能會因為做得慢而要罰留堂,
你可能會唔知時日直到肚仔再次打鼓,
你可能會唔想食嘢但係又想是但搵間食,
你可能會去咗間你平時唔去的食肆搵食,
你可能會唔想返屋企,
你可能會返咗屋企反而唔會瞓,
你可能會開電腦上網打blog,
你可能會一邊打blog一邊同人MSN,
你可能會收到好耐冇接觸過的人的相片,
你可能會手快快打開咗來歷不明的file,
你可能會無情情部機會Hang一Hang,
你可能會無啦啦Send咗一句冇意義的說話,
你可能會花上兩個鐘先fix到條Worm,
你可能會嚇到當堂醒哂,瞓唔著...
你可能會一邊同夜鬼Chat一邊等個夜歸人...唉...


[今日見聞遭遇報告完畢.]

假如有一天...你未瞓醒...就請繼續睡覺...唔好起身.


佢終於都返嚟啦.....可以瞓啦.唔知聽朝會唔會瞓醒呢?

斷絕來往

呢排同一個人講起佢的愛情故事,覺得呢首歌都幾啱佢聽,希望佢自己想通咗,放開d就好啦.


斷絕來往 陳柏宇想聽呢首歌,按這裡再按上面Play掣


作曲：歐建星
填詞：黃凱琪
編曲：Johnny Yim
監製：金培達

或再不配合　共你一對
都想當老友伴隨
始終兩腳難後退　太不識趣
單向地愛下去
別這種態度　極之乾脆
約見面藉口諸多　說要推
如果不想再面對　慘遭負累
無謂再做朋友　便告吹

*我會消失　讓自己一個抑鬱
道謝你絕情　絕得送上這種惡疾
來日裡　你與我各自賣醉
再也不知你於週末怎麼生趣
盡快消失　為自己一個呼吸
若令你動情或者我永遠不及
即管退隱　誰人令我這麼固執

或有種隔膜　沒法攻破
都可否念於當初　吻過麼
如果騷擾你是我　不勝負荷
寧願斷絕來往　就這麼

Repeat*

偷生過每日　日夜都因你抑鬱
念盡你絕情地放棄愛我
是千夫所指的過失
純情願憎多一個人　不接受憐憫

下雨天

一落雨就冇心機.


今日想留嚮公司食午飯,同Kathy幾個同事一齊叫外賣.佢地話OK,咁都好D,最怕大家唔啱口味,咁就罪過啦.


食完飯,本來想小睡,不過就變咗陪一個成熟的小妹妹食三文治.見佢唔多舒服,真係怕佢行行下會暈低.


下午又收到電話... 一返屋企就唔開心. -_- 下雨天真討厭.

High Tea?

今日終於去咗用樺爾上年Annual Dinner抽到的三獎,去四季酒店食Tea,因為一向唔多鍾意食甜品,講下講下,半年都冇去到,臨到就嚟過期先去.(其實之前抽到果陣就諗住當係結婚週年記念啦,咁大個都未試過乜鬼High Tea喎,如果唔係一早送畀d鍾意食甜品的人就好啦.)


以為Tea唔係好多嘢食,之前仲食咗個好豐富的Lunch,3:00pm前去到都唔多想食Tea,行咗兩三個圈IFC,咁High的地方一d都唔想行,點知去到又話Full咗,原來個Lounge都幾細,冇得book枱,又要First come first serve... #@$!#@%


又再逛IFC,終於等到啦,成4:00鐘先入去,真係唔多高興.見到入面其他食客,外國人居多,仲有幾身型龐大的鬼婆,嘩...成日食呢d嘢,就會好似佢地咁,一個當我兩個...so terrible...真係一山還有一山"寛".


因為係Tea Set,所以只可以揀一杯可以refill的Coffee or Tea.其他乜都乜得揀...睇menu,要成$350 (for two)!


三碟甜品,有三文治,蛋糕,果撻,朱古力,睇個果撻個樣,唔多新鮮,睇到都唔想食.其他又甜,都食唔到幾多件就唔想食.到走啦,都有多個一半的食物冇食過.真係罪過!


不過,因為可以坐窗口位,可以靜d傾計,坐得比想象中舒適.睇在都好耐冇出街"玩",咁都當係一個活動啦...結婚週年記念都係搵其他地方慶祝啦.

唔...又一個星期啦?

呢個星期唔知點解好似唔知自己做過乜...


星期一至五都係返工,但係好似冇做過d乜.雖然早咗放工,但係都係等...等....同等...


上星期仲唔記得帶鑰匙,好在約咗Berry食飯,如果唔係又唔知去邊到等,不過估唔到,11:xx返到屋企,佢都仲留嚮公司忙緊.最後都係返咗媽媽屋企到等...本來想多d休息...但係又冇好好休息...


星期六,預祝劭君生日,大個女啦....6歲啦,但係都係一樣會無啦啦就喊.希望佢再大d會堅強d就好啦.


本來都想買禮物畀佢...但係唔知做乜好好瞓...瞓過咗籠...乜都冇買添.-_-


同幾個大BB一齊玩NDSL,瑩瑩話要玩呢個game,雯雯又話唔玩果一個game,劭君就霸住玩,我一個人應付唔到三個...救命呀...
羡寧玩完Wii又加入戰場,都係瑩瑩乖肯讓羡寧玩...
羡寧都幾有耐性,就算玩唔到,都會試多幾次.
雯雯玩到攰,又想放低,又要玩...(呢個妹妹大個可能會好貪玩添...)


見樺爾同佢地玩扮車車....玩到癲.相比之下...我好似唔識同佢地玩咁.唔通係我失去童真,唔識同佢地玩啦???細個同阿Dee玩都冇咁難既?

嘩~原來咁靚架

同Berry約好買入伙禮物畀Kathy,仲要問埋kathy要乜...佢睇中咗張沙灘椅可以放天台到.點知上網睇咗IKEA 2007的目錄都睇唔到係點.網上版好難睇...好鬼慢.


問返Kathy原來係呢本07夏季的小冊子喎...
07夏季


嘩~原來咁靚架...橙籃白色的橫間布真係幾好喎,好陽光,好開心的感覺...正正正!呢本Brochure"正"的係...開心的氣氛.好似呼吸到開心的空氣.


嘻嘻...張小摺凳都好可愛喎...嘩,如果有靚靚燈飾圍住個天台...夜晚都幾好喎...好呀....如果可以睇到星星就好啦....


下星期就可以上去望下啦...唔該...我要一晚晴天呀.

新生活

每轉一份新工,都好似會轉變生活模式.之前習慣20:00收工,依加可以19:00前就走得,真係唔係好慣.樺爾就反而愈來愈遲收工,依加我放工之後反而唔知應該去邊好.

唉,希望樺爾可以早d收工,咁我又可以試吓下廚,煲下湯,休養下身體....腰骨會好d啦....


好耐冇同Kathy一齊返屋企啦.唔知點解,原來同好朋友一齊工作的時候,感覺真係幾得意,工作時係新同事.放工之後,又變返係好朋友 6_^? 自已心理上點解好似溶合唔到同一個人咁?或者,我仲未適應呢個新的角色,又或者,我希望工作唔會影響我地之間的友情.固執地希望一人分飾兩角.其實咪又係同一個人? 樺爾同Donald,都係舊同學+同事+好朋友.... 我都傻架,唔知諗乜.


去到呢間工司,第一日的感覺都幾得意,原來依賴電腦管理公司運作會產生一個怪現象:愈高級的人,反而經常要為雞毛蒜皮的事操心.乜鬼嘢都要Approve一餐.萬九幾樣嘢,唔知佢地係咪成日就係對住個電腦,成日收email,不停按Approve架呢?

返來啦

之前失踨一段時間,都係因為返到屋企冇乜心機開電腦.


噚日第一日返新工,好開心,又好緊張.因為可以同Kathy一齊做project,不過真係有d壓力,感覺上,好似係一個新同事,但同時又係認識已久的好朋友.有點怪怪地...不過,工作時工作嘛.慢慢就習慣同"新同事"一齊玩,一齊做事架啦.

Last Day in Uneasy

好啦...仲有一日,希望明天有新的生活,新的開始.

最後一日,應該還是為忙而忙...交功課的日子終於可以告一段落.


希望新的一份工作唔會又係玩呢個把戲就好啦.


好期待同你一齊工作...但又有點壓力..最怕我太遲緩的動作會令你不奈煩.hehe...


希望我的舊同事可以一團和氣啦.唔好再"唉唉死",又"呀喔"啦.

Goodbye to "uneasy"

本來以為六個月好快過,剛剛完成一個項目,又即刻開始另一個新工作,唔好話OT O到傻,用到盡都要休下息架.


又唔識做啦....又唔夠時間學,就算我肯學,身體都已經投訴,精神又唔好,何苦呢.


好彩呢度都遇到有好好的戰友,只係因為工作太忙,無太多時間傾計.為免陣亡,我都係退下火線算啦.


走,其實好容易,留低的人真係好唔簡單.希望佢地都可以成功完成應該做的工作啦.


仲有漫長的一個月,希望見到 "baby" 出世啦.


(話時話,今日知道消息,真係為佢太太擔心...真係好希望佢...可以成功做爹哋啦...希望佢太太平安就好啦.)

上班...下班

朝九:
跟隨返工人潮...


晚九:
放工沒有鐘點...


這個星期...幸運地巧遇她...和他...忽然感受到朋友帶來的一點動力.

忽然想起一首以前唔喜歡的歌.原來幾寫實...

世界末日 - 克勤

曲:周啟生 詞:克勤 編:周啟生

世界似末日 我每天 朝九晚九
佈滿急燥步伐 煩悶工作 太是難受
人潮內 沒法子可停留
人浪裡 沒有知心朋友
到處充滿現實 燦爛美夢終沒有

世界似末日 名和利 充塞四周
你我仿似玩物 權力爭鬥 更是難受
難道是 沒法子可抬頭
難道我 像個空心木偶
我最討厭現實 這個惡夢已受夠

* 遠離束縛 遠離工作
遠離都市 是最大最大快樂
遠離工作 遠離束縛
誰能料到 在那日閉幕
凡塵內 是太多的寂寞
塵俗裡 太多悲歡幻覺
我卻嚮往淡薄 你在那日醒覺 *
Repeat *

測驗結果

http://www.geocities.com/gadogry/e_test1.html

測驗結果:


第一型: 改革型 理性正直, 力求完美 5分
第二型: 付出型 和藹慷慨, 富同情心 5分
第三型: 成就型 精明能幹, 重視形象 2分
第四型: 自我型 與別不同, 自成一格 5分
第五型: 思考型 好學不倦, 機智過人 4分
第六型: 忠誠型 忠誠可靠, 警覺性高 5分
第七型: 活躍型 活潑好玩, 興趣廣泛 5分
第八型: 挑戰型 權威自信, 敢作敢為 0分
第九型: 平和型 隨和豁達, 樂天知命 5分


首先每一型的得分代表你在那一型性格的傾向。在每一型性格中的最高得分是八分。

如果你有一個性格的分數非常突出的話﹐那應該會是你的基本性格。如果你的最高分數出現同分﹐或有幾個性格分數非常接近的話﹐建議閱讀該幾種性格來判別你的類型。根據性格形態學的理論﹐每人只可以有一個基本形態﹐不可能有兩個或更多形態的混合體。

而如果你基本性格兩旁的性格中得到五分或以上﹐那就會是你的側翼。例如你的基本性格在第九型﹐如果你在第一型得到五分的話﹐第一型就是你的側翼性格。記住只有你基本性格旁邊的兩個方位才有可能成為側翼。例如你得分最高的是第八型﹐其次是第三型﹐那麼第三型不算是你的側翼。不是每一個人都有性格側翼﹐而也有極極極少數人同時擁有兩個側翼。

另外值得留意的是你得分特別低的形態(一分或零分)。那某程度上也是你性格突出之處。


如果根據測試結果,我算係一個怪人....點解咁多個5?
不過第八人格...都算啱喎.

到底我係乜人?

Progress Report

呢兩個星期好似經歷咗人生的另一個大起大落,而且真係有今日唔知聽日事的感覺.辛苦咗成個星期,好似過咗成個月咁.


本來第一日返工,見到工作環境相當惡劣,已經想調頭走.加上本身個project係已經delay一年,冇document留低,走的走,炒的炒,上頭話要重新整頓成個project,但係要保留舊時的"怪獸",發展新的"怪獸",不過又想表面上係"王子",唔方會得閒.


不過返多兩日又到新年,又未知有乜做,所以又唔想咁就走咗去.過咗年之後,剛入伍又大執位,成team搬咗去"鬼屋".個位同未搬之前相約,每人的佔地有一尺半,不過間房細d,冇咁多人,冇咁嘈.總算可以清靜d.


Requirement都係估估吓,要由"怪獸"到推測本身的requirement....今日話1,聽日係2.不過後日係未知.


工作的範疇可以廣泛到,今日叫你寫backend,聽日frontend,今日寫Java,下個星期寫.NET,不過好彩最後都冇咁安排,因為有源源不絕的新人加入.不過又炒人啦....


呢個星期只係完成到4/5的工作,不過好彩都過到關,本身預計要用一個月完成的工作,半個月內要完成,好似入咗"精神時間房"咁.不過我就好冇精神.雙目更無神.到夜晚好似睇唔到嘢咁,做咗一個星期已經有呢個情況,想去睇醫生,不過星期六休息一日又冇乜事.大家姐話我係circular muscle fatigue.


話咁快,我已經做咗呢份新工作一個月.估唔到我可以做Java I/O,最感動一刻係......真係有糧出架!

Happy Birthday to me!

今年我只係得一個生日,因為唐曆西曆都係同一日呀.


今朝一早到晚收到唔少電話,SMS,MSN...多謝你地的祝福.


雯雯,多謝你唱"生日蛋糕"畀我聽,希望你快d好返啦.


今晚突然之間想到....


如果我有九十歲,已經過咗三分一.
如果我得六十歲,我仲有半條人命.
我冇死神的眼睛,只知生活要盡興.
唔需要活得精彩,只但求無愧無憾.


所以.....


今日同樺爾去旺角買多一部NDSL...好嘢...可以大合奏啦...00036 "大合奏兄弟"好好玩架.


哈...我今日自己買咗生日禮物畀自己...之前好想買的DVD終於都買咗....好滿足!

瑩語錄

呢幾日同瑩瑩見得最多,畀佢的說話笑死:

瑩語錄(一)

"我好想daddy,mommy生個哥哥家姐畀我"
(6_6: 生唔到哥哥家姐畀你架喎,只可以生到細佬妹咋喎)
"我唔食飯咪得囉!"
(G_G:咁你唔食飯咪會死囉?)
"講下笑咋!"


瑩語錄(二)
年廿九:
"我返屋企瞓覺啦,我要發個好夢,你地今晚都要發個好夢喎"
(咁你想發個乜嘢夢呀?)
我要夢見同Daddy,mommy同丹丹姨姨,樺爾丈丈一齊...
年三十:
(6_= :我噚晚發咗個噩夢,我夢見樺爾丈丈垂死....) [都係瑩瑩,我好夢發唔好,仲發埋d咁既夢添,仲發夢新老細唔畀我報course學嘢...呢個應該都係Mabel"過料"畀我喇....]
(6_^:瑩瑩你噚晚發咗乜嘢夢呀?)
我夢見同Daddy,mommy同丹丹姨姨,樺爾丈丈一齊...
(G_G:我都想控制到發乜夢...-_-BB都冇句真...)


瑩語錄(三)
年初二:
我真係好唔捨得你呀...樺爾丈丈同丹丹姨姨....,你地同我一齊入我屋企啦...
(6_^:我都好想架...不過唔可以呀)
我初九唔駛返學呀,我問准mommy先,睇下可唔可以買個生日蛋糕畀你,同你一齊慶祝生日呀?
(6_<~:太感動啦....)

新春如意

今年好似係最忙的一個新年.由年廿九忙到年初八.


年廿九
年廿九入咗元朗同三家姐一家人一齊行元朗花市,之後一齊食糖水.同瑩瑩行花市好多趣事.


年三十
真正的團年,所有人都一齊玩,相聚.


年初一
同阿Dee四家姐唱K,好耐都冇同四家姐一齊"玩"啦...希望以後又可以多d一齊就好啦...
之後去拜年,同壽星小朋友慶祝...真係好可愛,佢自己唱"Happy Birthday to Me"架....
之後再去大家姐屋企,提早團拜.多謝大家姐的生日"大禮"...咁我年年都有大利是囉?


年初二
一家人又見面,今日唱K,Uno Spin,君君寫"大吉大利",好叻叻啦.


年初三:
休息一天


年初四:
開工得個吉


年初五:
好彩有開工利是,如果唔係...哼...睇下我地開d乜工畀你....


年初六:
今日做咗孤兒仔+阿嬸...搞到遲大到,生日會都只係得一個鐘頭!唔...我都唔係咁想慶祝生日囉....其實目的都係想見下朋友啫.


年初七:
舊同事團拜,雖然人少少,但係都好開心呀....希望所有人健健康康啦.

晚,又係生日會,但係時間多好多!多謝你地呀....有大豐收的感覺!
....聽君一席話,勝做十年工...我應該好好調節自己的處事方式.
仲傾未夠架...不如去camp啦.


年初八:
Pre-生日會,呢個小鬼,英文講得快而準,仲教雯雯唱生日歌時一齊用手指指住我...哈哈...超級開心!!!!!

情人節

其實我都唔係好重視呢個"節日",但係唔知點解,呢幾年會成日為身邊的人緊張佢地的感情世界.甚至覺得自己好八卦.


今日MSN同個舊同事傾咗一陣,上年已經聽講佢會同女朋友拉埋天窗,一年過去啦,都係聽唔到佢有好消息.又到咗好機會啦....唔知你今年會唔會把握機會呢?


呢排見到好多新同事...即使未同佢地熟落,就已經好想為我的好姊妹們打聽下邊個似係冇拍拖的好人,不過怕羞的我.似乎好難做月老.


講到太遠啦,其實有機會認識唔同的人已經算一種緣份,希望大家都會珍惜身邊相交相知過的人.可能,身邊的"他"或"她"已經早就出現.


祝大家生活愉快!

簡單任務

今日繼續睇前人的Document,睇睇下聽到有人做briefing,嗱嗱聲行去聽.有咗個概念咁都知要著手做乜先.不過到底做d乜都仲係未傾.


唔知點解一個99.9%完成的System要重新rewrite,聽講因為千瘡百孔,佢地話因為一個字:爛!
聽到話rewrite過心理上反而好受D.至少唔駛理前人的蘇州特產.


執咗份installation guide,本來想收工啦,先至話留低傾project...傾就傾咗,呀頭話好簡單喎~但係乜都未落實.唔知做唔做到落去呢.

天堂?地獄?

以前V記archive咗有關"豬肉檯"的記憶又再重現.


500呎單位,有成50-60人排排坐,5呎的檯要坐三個人,走廊行人chi check咁轉,空氣超悶熱(連我都覺得).


好多人都要傾project,所以好嘈,headphone唔少得.


最搞鬼,聽到某某的對話:我要落XX樓地獄(唔通有更地獄的地獄?!! -_- ...)


...以為自己做好心理準備,但係原來當堂嚇唬.


坐咗成日齋睇Document,但係冇人同我做Briefing,連應該做邊part都唔知.睇到5:00p.m.終於睇到有份叫做Briefing的物體,點知一個同事路過見到,竟然問我邊到搵嚟架?!另一個就話,唔駛睇呢D架.(佢終於同我講,可以裝乜Tools做嘢.但係己經係~5:15pm)唔知係咪收得工所以先有時間理我.


聽講今日有嘢要launch,所以冇人得閒理我 6_<~


咁啱,夜晚有Annual Dinner,本來以為唔駛去,點知話班到位可以去喎,咁就無啦啦跟大隊去啦.


第一日返工就有餐食,咁大個女都未見過呢種場面.就算點都總算見識過.

悠長假期結終

九月至今已經五個月多.人生可以有幾多個悠長假期休息?


恐怕退休都唔可以叫休息,唔通要等兩腳一伸的時候?


可以休息咁耐,真係要多謝一個人...


明天似乎有好多未知之數,希望順順利利,開始我朝九晚六的生涯啦.

我會做好呢份工

"我會做好呢份工"


朋友傳來的:....哈,好正呀...



曾特首角逐連任

搵左「我會做好呢份工！」做競選口號

如果換轉其他行業或者其他人

應該會咁講：



地盤佬：「我會鑽好呢個窿！」

氣功師：「我會發好呢次功！」

八達通公司：「我會整好八達通！」

天文台：「我會測好呢個風！」

整容醫生：「我會隆好呢個胸！」

鐘錶師：「我會整好呢個鐘！」

廚師：「我會爆好呢碟蔥！」

麻將腳：「我會碰好呢隻東！」



xx公司的專業員工：「我會五點九就鬆… …」



果然係一個好口號！

TOGETHER

如果問我點解會喜歡聽古巨基的歌,主要都因為歌曲抒情,歌詞有意思,就算聽的時候你未經歷過,已經會愛上.一旦感受到的時候,靈光一閃,腦中又響起了幾句歌詞.


TOGETHER - 古巨基 想聽呢首歌,按這裡再按上面Play掣


靜聽手錶一分一秒在顫抖　問我為何存在世上像分針拚搏
如常地每晚每日工作　倦了麼　然而又再泛起你哼的這句歌

DON'T NEED TO FEAR DON'T NEED TO CRY
DON'T NEED TO WORRY I WILL BE THERE
每當我倦了　看不見　我未來　視線沒法打開　流淚前還是記起

DON'T NEED TO FEAR DON'T NEED TO CRY
DON'T NEED TO WORRY I WILL BE THERE
也許長路裡　有這麼　一個人　便已無悔這生　這友情能伴我

TOGETHER TOGETHER TOGETHER....
WOO TOGETHER TOGETHER TOGETHER WITH YOU


"To my beloved, and all who care about me.... Thank you all."

深意花(五)

深意花(四)

深意花(三)

深意花(二)

深意花(一)

幫四家姐賣下廣告先

至冧情人節禮物-深意花!

情深說話未能講???

靚靚深意花可幫你傳情達意..

花內可放飾物及心意咭以表達愛意..


有興趣者可send email 給我查詢.

eneri_39@yahoo.com.hk

唔衰得

上個星期一見咗一份工之後,就埋首苦學去做一個入職測試,除咗星期五再見多一份工,成個星期都冇去見其他工啦.


傻架咩,又唔係請硬你,咁都去做呢個測試?同四家姐講,佢仲問係咪搵人笨寫完又唔畀銀果種?哈...你話呢?


我就反而覺得咁樣測試幾好,無錯好似係怪怪地咁,不過總好過來個即時死亡測驗咁九死一生.僱主一方面又可以容易揀選合意人選,唔需要單憑三言兩語就去決定咁"冒險",應徵者又可以知道工作性質,正好可以測試下自己的能力,不過,我如果我有份工,又點會有咁多時間去接受測試呀.


而事實上,呢次的測試,因為我本身未接觸過果個IDE (即係開發環境呀),所以要求遲d交功課,好在對方的態度好好,唔知係咪見我5:xxam交課,所以放我一馬呢?雖然遲咗三日,總算收貨.


聽日要第二次接見啦,今次不成功,便成.... 總知唔衰得架啦.


但係總係有點兒那個....云云...有點忐忑...

見工

今日有兩份工要見,一份由Agent介紹,另一份自己搵.


成日都唔記得問問題的我,又一次唔記得問一題極重要的問題.就係:做d乜架!


雖然個Agent講咗,我都唔可以連呢一句都唔問就算架.睇怕都係冇架啦.


另一份工作,其實係辛苦得嚟,又好吸引的工作.唔知佢會唔會請.


同Technical人傾計,感覺真係好好多.最好就係大家啱Channel.

關鍵的一天

其實呢個星期都冇見工,之前見Agent 仲多個見工,如果畀我見多幾個Technical,咁可能會多d機會.但係要過HR果關已經好麻煩.因為我的口才....


我的工作唔係d咁大不了,有時講出嚟,好似吹水咁.做工就靠手,搵工靠的係自信!


點解咁多人可以咁有自信?


明天應該係關鍵的一天,我都唔想繼續沉淪.

天公地道

四家姐同阿Dee都打呢首歌.可能大家經歷轉變之後都感受良多.

呢首歌好啱聽.

天公地道 - Eason 想聽呢首歌,按這裡再按上面Play掣

作曲：徐偉賢
填詞：黃仲凱
編曲：Davy Chan / C.Y.
監製：Davy Chan / C.Y. / Eason Chan

沒有際遇會預告　輪到你才會輪到
你攀不上　高貴的國度
未夠老但努力行快了半步
終於使你被稱作好事之徒

大智慧未有學到　矛盾處才會來到
最終宣判　可笑的噩耗
幻覺破滅了　現實卻使你不知所措
世界　能令你　自動變上被告 Oh...

這一刻　你壞了氣數　置身一片大霧　別期望會搏到
抖一抖　讓有變無　退出這線路　重投你喜好
兜一圈　也未算劫數　抹走這串問號　微笑裡過渡會更好
這種天國高攀不到　沒甚麼可以投訴

在哪裡獨個漫舞　流放到誰個懷抱
你總可以　輕快的散步
視野變換了　命運也不是這麼深奧
世界　仍在轉　日後再可上訴 Oh...

這一刻　你壞了氣數　置身一片大霧　別期望會搏到
抖一抖　讓有變無　退出這線路　重投你喜好
兜一圈　也未算劫數　抹走這串問號　微笑裡過渡會更好
這種審判憤慨不到　沒地方給你投訴

偏偏世界　是這種制度
越放膽說　越說越說　你代價便更高
如何突破這四面環抱
你要找的公道　雖說還未碰到　前面有路

轉一轉　你混帳氣數　撥開這片大霧　未來自會看到
抖一抖　換個嗜好　找新的去路　重投你喜好
兜一圈　你未會變老　勇敢些去讓步
在轉角會遇上更好　一生機遇總猜不到（猜不到）

轉一轉　你混帳氣數　撥開這片大霧　能勇退也未算太糟
天空海闊總可找到　為什麼需要煩躁

生日快樂

To 我兩位可愛的友人...


早幾日好Down的時候,多得你呢兩位天使,打電話開解我.哈一個22日生日,另一個就23日生日,真係"Q"啦.


唔好意思呀,我呢排仲係忙於搵工,所以唔可以同你地出嚟玩. 希望過多幾個星期再約你地出嚟見面啦.


祝你地生日快樂呀,祝你心想事成啦!


唔好話我"行"呀...哈...哈.

我冇事啦

呢個月實在太多事情發生啦，多謝各界人事關心,我會加倍努力架啦。


本來之前想記低一D重要的事同感想.只係一直因為電腦固障,無法又冇心機記錄


12/31 家庭樂遊南生圍,只欠爸爸同四家姐冇去....


01/02 本來想令媽媽開心,去咗添馬艦玩,第一次玩咖啡杯,單獨享受畀瑩瑩“Fing"咗四轉的滋味.頭暈的陰影可以畀奸詐貪玩的笑臉融化。只可惜回家途中,竟然間接令媽媽拗傷腳踝！真係一萬個該打。


01/05 代母陪弟.阿Dee又要大遷徒啦.


01/07 失落幾日, 終於有個令人開心的消息,恭喜你,你咁快就搵到工作啦。真係戥你高興。我地又可以再重聚啦。


01/09 Flash 飛來飛去的效果,其實都唔係咁難姐,不過好似呃飯食咁。


01/10 發霉中,無啦啦有個電話,令我好跖開心.但係又要多謝佢。


01/12 一話就冇人理,一係就成堆嚟.半個鐘有三個約見。唔通返媽媽間屋先會收到電話?唔通要轉電話公司?
搵大公司做練習,結果當然.....


01/13 本來想幫四家姐看舖，想佢抖氣.但係我又想去做更加有意義的事.只係原來自己仲眼淺過當事人。
"我覺得應該陪埋佢最後呢一晚“。強忍反而會令它偷偷跑出來的。


01/15 一日見三間公司,都唔知邊間打邊間.第一份當你係顧客,第二份當你做波,第三份車輪轉完都唔會有下文.


01/18 錯失會令人抱撼.跌倒後得到的關心,反而會有更大的壓力.

"陌人你可不可以,抬起頭站起來！過去就是過去,幹嘛在這𥚃徘徊?"

放過自己吧.擔心你的人太多啦.我會努力學做大傻啦。



鏡子裡的人 ﹣古巨基

有天看見鏡子裡面有一個人 好像很陌生
我問他 "你到底想什麼?"
他說他也不清楚
只是心中有點很寂寞的感覺
說出來 也沒有人明瞭

#陌生人你可不可以
抬起頭 站起來
陌生人可不可以看著我
對我說你不會怕 也不用慌
明天是怎麼樣

我還~~不能相信你就是 我的倒影
還~~不能控制你的心
過去就是過去 幹嘛在這裡徘徊
陌生人 陌生人
為何不回求答我
求求你 跟我說再見

就在這裡看著你看著我在想 "真的很無聊!"
怎麼辦? 請打破這沉默
來來去去反反覆覆
從來沒想過 我會這樣沉重
笑起來也看不見笑容

Repeat #

Sum(Cry)

看過一套令人傷感的戲->傷城
得到一個副挑戰性的機會 -> 感激老拍檔
準備一個晚餐,結果主角並未出場 -> Tamama
收到一個令人惋惜的消息 -> 朋友的父親病逝
說服一個備受壓力的人 .......

Sum(Cry)

聖誕節快樂

好耐冇update個Blog,因為成日返屋企見屋企人,搞機...搞完一部又一部,不過呢頭起返機部PIII 1G想裝個Linux玩吓,果頭就燒機...真係好黑仔!!!

至於重裝Wayi部Notebook,因為CDROM 好似壞壞地,用好多方法都搞唔到,Removable Drive又唔可以 make it bootable....都唔知有乜Software先起到機.

阿Dee仲話我打骰打唔到六點骰仔,所以起唔到機... -__-


成兩個星期都冇行街,都係要出去逛逛,因為聽日要開party,要玩交換禮物,其實一早就睇好咗,好得意架,但係因為out bugget,冇行開街,所以一路都冇買.可能係睇中咗就唔會改變主意啦,最後我同Wayi都係買咗一份 out bugget的小禮物...唔...希望大家收到禮物會開心就好啦.


其實一路睇,一路仲睇緊一份送畀四家姐的生日禮物,但係見到超out bugget,都唔知買唔買好.都係行多幾個地區再算.


今日同Wayi四圍逛,真係好耐都冇咁做過.行到好攰,本來想去睇"傷城",點知又滿坐,走咗去睇"黃金甲"... -_- (本來唔想睇張藝謀執導的戲...) 唔通真係要買定飛先得.


都好眼瞓啦...


係喎... 祝大家都......聖誕節快樂!

Tara by Mii

Wayi by Mii

Mii

今日(噚日)去咗三家姐朋友屋企同三姐夫慶祝生日,其實係入去玩Wii.


一開始就先嚟做咗自己個樣先,哈哈,要"吹雞"嚟召集人馬,好得意架.

三家姐提議我同樺爾互相做個樣出嚟.


你話似唔似呢?瑩瑩瞓醒一睇就知邊個係樺爾丈丈同丹丹姨姨啦.


因為三家姐個身已經係橙色,所以要捉住我個頭放入個改變按鈕,好多色都用咗啦,所以改咗綠色.


之後玩咗幾個Party game, 打網球,棒球,boxing,仲有冇牙兔添,真係好得意架.

玩到三更半夜,好彩有三家姐的朋友送我地返屋企,先唔駛同樺爾天寒地凍打地鋪咋.

生日快樂

我所認識的人,有三個都係呢日生日,所以....


講呢句真係好抵...


祝四家姐的生意蒸蒸日上,身體健康,開心快樂.


祝三姐夫快d升職加人工,三家姐可以全職照顧瑩瑩...一家樂也融融.


祝Joy青春常駐,Keep住咁開心,做個靚靚媽咪,心想事成!

行街睇戲食飯

唔知點解,每次我好寂寞,咁啱都係約咗你嚟搵我.兩年前又係咁,今年又係咁.又舊地重遊去到葵芳.


要你陪我買衫,仲幫我攞多個Discount,多謝你呀...哈.


睇到"街知巷聞"間餅舖,你就話自己"孤陋寡聞",畀你笑死.


一齊睇咗"一斛眼淚"...雖然女主角每次出場都差過上場咁,行路都扮得幾似寸步難行,感情表達都好過電視版的澤尻繪里香,都有少少感人,都有兩滴仔眼淚.不過就冇乜點交代內心的感受.講劇情,都係電視版好D.後尾仲好似草草收場咁...


睇完戲,食下飯,其實我好耐都冇咁同你傾計啦.好開心,好唔捨得走.所以,又雨中漫步搵巴士站,無意中變咗玩互送,一路送到荃灣,真係咁大個人,得你先同我咁癲法.哈哈!!

自閉

呢幾日終於都可以抖下啦,唔再出街,幫唔到四家姐,又唔駛避Tamama,可以靜心讀書,打下求職信...


打求職信就好似自我反省,自我檢討咁,到底呢幾年嚟,我做咗乜?其實早幾年的事,我已經好多都唔記得,但係為咗搵返我的過去,睇返以前公司的notes,好多感觸.臨走時已經無法多謝一個人...因為佢仲走先過我.


********


睇到阿Dee個Blog寫的202事件,本來想回應,但係又怕自己言詞過度偏激,都係唔留言啦.


以前讀書,讀到中六中七,都係人讀你又讀,有得讀就讀,因為咁樣行的路會最清楚,總之讀到大學先算.
但係點解要讀咁多科目,點解要讀果d內容?點解要讀識果d內容先叫識果科?點解個Syllabus要咁轉?邊個定立Out Syl?


我乜都冇諗,由細到大都係填鴨式.


基本的知識,冇法子叫人思考.


細個有冇試過問1+1點解要等如2? 我到依家都好想問...


現在經常反對用方填鴨式教學,一尾講改革,又話要活動教學,又話要小班教學,又話三改四,四改三,又話通識...以前點解又冇問題?功課多就係壓力?

如果唔想出聲的學生,你想叫佢開金口都幾難.用上所謂的活動教學,要佢多講多做,唔多出聲都唔代表就唔識思考...好唔著數.又話要減少考試壓力,但係又要升班準則,唔知點評分先叫合理. (我最討厭TAS!)


其實用乜方式教育都好啦,你點改,都改唔到學習的心態同風氣.


我做學生的時候,只係知唔讀書,會畀媽媽鬧,形成負面的學習心態,如果媽媽用獎勵的方式氹你讀書,讀書就成為交易的條件.要拿乜Grade,咁就有乜乜,慾望達不到,反叛的心理又作祟....


我想,問題的重心其實反而是"如何消除學習的障礙",從心理上的積極性,及提昇基本的知識水平.接觸多方面的資訊,從而了解自我需求.沒有自我需求,更不必談思維方向.


只不過,其實到底讀書為乜?因為要做個有用的人?

定係要"好好用功讀書,將來賺多多的錢,買大大的房子"呢?

買大大的房子又為咗乜?

呢排成日入圖書館,發覺其實好多人都好鍾意睇書.而我只係有目的咁去睇書.
不過都發覺其實我對電腦書的興趣特別濃厚,如果當初,我唔讀中六中七,一早都去咗讀電腦,
可以早兩年唔駛對住d唔想讀的科目.只不過,要到幾時先去蕪存菁,認定目標,知道自己真係想點呢?
我好似都未搵到答案.


如果我自小就喜歡讀書,我可能唔會將讀書當一件苦差.讀書肥佬,九成都係因為唔想讀書同懶散.


如果有興趣讀都讀唔識,(好似我依家咁...)呢個就係基本知識水平的問題,可唔可以返番以前再讀過書呢?


問題係,如果自幼就有興趣讀書,讀識書,識讀書,咁又會唔會識獨立思考呢?


書,讀到邊個階段先叫通識?我通通都唔識!


(我想做<<連城決>>的狄雲...唔想做丁典,好想練好"神照經"的內功.唔知幾時先可以打通任督二脈呢?)

祝你爸爸早日康復

朋友的爸爸有事入院,唔知情況點呢?希望佢休息多d,冇事出院啦.唔好咁擔心啦.

多謝光臨

今日又頂替四家姐做part-time sales.本來都冇準備叫自己的朋友過嚟探我,不過Berry早幾日搵過我,所以同佢講咗啱啱大執位.佢都會過嚟探我.


2:00p.m.返到去銅鑼灣,我係第三間舖頭開舖.跟四家姐的指示,抺窗,覆睇同熟讀價錢,一搞就已經3:00p.m.


坐嚮到冇嘢做,溫下書.唸下好唔好為四家姐做個Inventory System.同四家姐做咗個爆炸Label.又過一個鐘啦.


好悶....咁落去,就算有客都畀我個死樣趕走啦...


好彩呢個時候Berry嚟探我.佢又帶咗好香的puff畀我做下午茶.好開心呀!


之後傾吓計,試吓衫,佢揀咗五個item,一條連身冷裙,一件可拆毛毛邊的有帽毛冷背心,一條至潮短褲,仲有頸巾,仲有一件黑色花邊長上衫...佢全部都好喜歡.不過,朋友上頭都要提一提,買的時候,可能會好鍾意,但係到返到屋企,會攞出嚟著的機會就要自己考慮啦.我都唔好意思要朋友大出血.所以Berry就先揀咗連身冷裙同冷背心先.Berry話下次再嚟買其他貨品添...真係好耐都好感激佢.


多d睇唔同人著衫,我依家知道乜嘢叫做唔同人會適合或者喜歡唔同類型的衫,四家姐,Berry揀的幾件都係你的favourite呀!唔通你地的style係近d既?


哈哈,今日Berry仲帶咗一樣好靚,好好的嘢畀我:聖誕樹玻璃貼,多謝你哦...好有聖誕節氣氛呀!!貼落塊鏡好"省鏡"wao...好靚,好搶眼呀...不過後尾我地放咗左上角,因為當眼d,搶眼d.好靚...好鍾意,好鍾意...


謝謝你!多謝光臨!

今朝好開心

雖然噚晚好攰,打Email又夜咗瞓,今朝又早起身,不過今朝一開電腦收到一封Email,真係令我好開心!! 6_^


唔知你會唔會嚟"睇我"呢?不過就先打呢個留言歡迎你啦!


歡迎!!歡迎!!


我又要去銅鑼灣啦....希望生意滔滔!好客常來顧!


唔知今日會唔會有貴賓嚟探我呢?唔買都可以嚟睇吓架.歡迎!!歡迎!!(會唔會反而嚇走哂呢??)

妳是我的太陽

其實都好好奇克勤的請柬有d乜睇,又話有錄音,又相集... 多謝珮兒Send呢個 link畀我睇呀.有機會睇到真係好.............開心架啫! 6_^


李克勤盧淑儀結婚相簿(一)

http://hk.myblog.yahoo.com/jw!MWd4PamaHxXrRu1r6GgOrKxIGFWzyDw-/article?mid=1723



李克勤盧淑儀結婚相簿(二)
http://hk.myblog.yahoo.com/jw!MWd4PamaHxXrRu1r6GgOrKxIGFWzyDw-/article?mid=1726

佢地寫的嘢都幾有意思架.
呢句真係好:


"相處不一定是遷就,還有適應和互相影響"


我好鍾意呢首歌架!!寫得好浪漫,唱得又好.唔怪之得,原來寫嚟追女仔....哈哈....


妳是我的太陽 - 克勤 想聽呢首歌,按這裡再按上面Play掣

曲:Kenny Nolan 詞:李克勤 編:唐奕聰

為何每次一想起妳 暖意透心上
長長秀髮伴清新的臉 柔情而倔強
妳送我帶醉笑意 我已充滿幻想
一雙靈魂之窗(靈魂之窗) 極漂亮(極漂亮)

原來妳也偷偷想我 與我也一樣(慶幸能遇上)
為何見我會不知不覺 忘形和緊張(忘形和緊張)
暗暗裡彼此欣賞 一顆心已奉上
這點愛藏於心(藏於心) 留於心

* 像是月亮又像太陽 告訴我方向
誰是我所想 My Love
浪漫在逐漸地醞釀 但願夜更長
忘掉那緊張 *

曾對鏡說出一千次 我愛妳這話
為何碰見 卻偏偏感到
難為情 害怕
每晚也悄悄盼妳 會給我電話
彷彿隔層輕紗(隔層輕紗) 像笑話

旁人卻替我焦急 代替我說這話(愛是無懼怕)
閒來與妳的對話 是我如何瀟洒
妳說妳早感到 我心正念掛
這一切如煙花(如煙花) 閃出醉人火花
Repeat *

輕輕的挽著妳手 還深深一吻如密友
願一生分享樂與憂 My Love
Repeat * *


原來12月6日出世的人追女仔都係得呢兩招...睇電影同玩文才....仲要睇唔浪漫的電影. 6_~ 呵呵....

仿佛彷彿

發文時俾人質疑寫錯"仿佛"一詞, 於是一查之下才知道兩詞通用, 另佛字亦有三種讀音... (有興趣的朋友請點擊這裏: http://140.111.1.40/yitia/fra/fra00110.htm)

※彷彿：　似乎、好像、近似。南朝梁．劉勰．文心雕龍．哀弔：「　卒章五言，頗似歌謠，亦仿彿乎漢武也。」儒林外史．第　八回：「王惠見那少年彷彿有些認得，卻想不起。」亦作　「仿佛」、「髣」。

@#$%

本來想留嚮屋企同樺爾過生日,但係Tamama又侵略地球,唯有出外散心,去咗葵芳睇戲.


本來想睇"死亡筆記II",但係去到先知得一場兩點幾,去到都己經做完.


之後得番"沖出水世界"同"父子"係啱時間睇.我提議睇"沖出水世界",應該會可以笑吓呱.雖然我都唔係咁想睇呢類片...壽星公都唔想睇


本來想睇吓"父子"個故仔講乜,雖然係著褲城同楊小姐的戲,話哂個導演係一腳踢做編劇美指剪接好多嘢,叫做有獎攞吓,有提名吓.咁就入去睇啦.


以下係Comment:

吓....6_o!
6_# @#$@#%#$ .....
ZZZZZZZZZzzzzzzzz
HAAAA.............-_-
Ding Dong Ding Dong Ding....
Chi...............
Wa....... !#@%#$%
ZZZZz ZZZZZzzzzzzz
???????
搞錯架............
草...............
葉...............
河..............
Mother............我地畀佢呃咗"囡"啦!

樺爾,生日快樂!

想買嘢畀你,但係,好似都係羊毛出自羊身上....Handmade ... impossible!
明年啦... Give you a gift x 2!

今年....應該係我同你過的最不平靜,但又最平凡的生日.

就祝你事事順心順意.打波,捉棋,打機,乜都咁開心啦.

I'm still alive!

相信四家姐係最快轉setting的新張舖頭!呢兩日同四家姐大執位,執咗兩日,終於可以開番舖啦.希望佢咁樣坐會舒服d,客人又睇得舒服d啦.財源要滾滾來先好呀...


可能係用力過度,腳同膝又痛過,噚晚又失眠.唸吓聽日點同個電鑽搏鬥,唸吓會唔會搞到石膏板爆咗,唸吓會唔會飛鑽咀,唸吓會唔會血肉橫飛...唸吓辭咗工咁耐,話就話係為搞舖頭,好似離開咗好多同事,好似好突然....又唸吓買乜禮物畀羨寧.


亂唸一輪,終於瞓著.之後就發咗個夢:


樺爾同我撘的士去見佢公司同事,唔知點解,只係得羨寧跟我地坐,為咗留位畀Donald,所以我同樺爾都要坐車頭,羨寧就要坐樺爾大脾.


開開吓車,去到太子,我發覺我無啦啦落咗車,但係架的士冇停過,都唔知點會落咗車.我為咗追返架的士,我走咗另一條路.都係追唔到.無啦啦就去咗撘"車立",遇到一個印度人媽媽帶住個細路女.我哋就一齊入"車立",睇到我好喜歡的黑玻璃裝修,就睇多兩眼啦,點知睇到玻璃入面冇我自己個人.果對母女都好奇怪.我就問個細路女:"喂你係咪睇到我架?"佢答睇到.我就話,係啦,呢塊玻璃真係好奇怪啦.


走咗一陣,我唔知點解去到樺爾要去的目的地,原來係個沙灘燒烤場.其實我上年去佢的Annual Dinner見過一堆人,唔知邊個打邊個.同咗其中一個講,我認得你個樣...你係John,唔係...Peter...(係夢入面的心唸...定係瞓著的我心唸:咪再亂估啦...)

之後都係見唔返樺爾,忽然望一望,原來另一個爐坐住我的舊同事,舊老細.但係舊老細好似唔係好理我.我就又唸,梗係我寧願辭工同四家姐開舖都唔留嚮公司做,佢嬲咗我啦....


又亂唸之後,見到已經去咗外國的同事添...


見到的事太令我驚惶失措,但係都仲未見到樺爾,搵吓搵吓,我發覺,好似我已經唔嚮人世.


正當慌亂....我醒咗啦,原來樺爾嚮我身邊架...I'm still alive!

我到底做緊乜?

又一個星期過去啦.但係我依然都係咁.


去吓圖書館溫書,去吓四家姐舖頭,去吓行街,好攰,瞓咗成日,星期五阿Dee請唱K,咁又話咁快過咗一個星期.


打CV,發覺自己有一段時間成三年都冇進修,所以原地踏步咗三年,之後又三年,我仲會有幾多個三年?


唔通真係要講:"可以咁早退休,我要多謝一個人..."?


我自問,其實我日日都好忙,但係講唔出點解咁忙,我好攰,到底係心攰,定係體力不支?


抖咗咁耐都係時候做返d嘢啦.

部機好似冇事啦

又等多咗半年,ASUS P5LD2 終於有個新的BIOS出咗,仲連埋之前被廢的On Board Audio Sound Driver 一齊出多個Update,跟手仲畀埋Intel Processor Chipset的update.其實唔update都已經冇事,不過唔知Asus係咪為咗掩飾佢的Product問題,所以死人都拖埋Intel落水,"懶係"叫user一齊update.


當初只怪我唔知ASUS P5LD2 有Deluxe同冇Deluxe版的分別...其實我買咗呢個Version應該係初版,所以先咁多問題.鬼叫我一年都冇砌一次電腦,如果唔係我冇做多d功課,就唔會出事啦.


今次Update之後,希望真係搞掂啦.如果又死機...我殺死佢算啦.


阿Dee你要,我畀部機你啦...

克勤終於結婚啦

當克勤唱呢首歌的時候,我已經估克勤可能會結婚(馬後砲...-_-)唔知係唔係鋪排出"演奏廳"作為求婚之用啦...遲d又可以出婚後的男人啦....6_@千祈咪啦....


呢首歌,幾年前聽的時候真係好感動.身邊有一個一直默默支持自己的人,真係要好好珍惜.


祝克勤婚姻美滿啦....哈哈!(首曲好似苦咗d....不過, 有呢句:"如上世紀定了因果 今生跟我渡過"...勉強講得通呱....)


三千零一夜 - 克勤 想聽呢首歌,按這裡再按上面Play掣

曲:梁詠琪 詞:陳少琪 編:趙增熹/張人傑

相處十年定有吧 感覺多少已靜化
總算得到快樂嗎 我沒說著動人話
這段故事也昇華
走過斷崖或雪地 忙忙前路失去力氣
沿路得你同情自己 你預期我會爭氣

* 記得當天我多少 都已心死了
在冷冬 全憑你淺笑
抹去飛花在為我治療 *

# 回頭當那天的我永遠未叫座
但你的雙腳亦留在愛河
當天原來你哭過
但你不忍心再打擾我
抬頭當這天的我要快樂慶賀
但你彷彿眼淚從未留過
你太了解我 同遇那天便已清楚
不可使我難過 #

想到十年後故事
無言詞亦想你會意
誰共享我悠長歷史
每夜仍吻我一次
Repeat * #

回頭當那天的我永遠未叫座
但你的雙腳亦留在愛河
當天原來你哭過
但你不忍心再打擾我
抬頭當這天的我要快樂慶賀
但你彷彿眼淚從未留過
你太了解我 如上世紀定了因果
今生跟我渡過

長洲行雨濛濛

噚日同咗大學同學一齊去長洲行山+食海鮮.因為一早約好咗,我就算呢幾日個肚有d唔舒服都係決定去.


本來都想樺爾一齊去,但係佢想抖下,我都唔逼佢啦....有d失望.


7:10am 手機鬧醒咗都唔想起身

7:30am 起啦...起啦

8:10am 約8:10am 934巴士站等,我就真係8:10am先出門口.好在Last Minute到,巴士剛剛到站.險!

9:00am 到中環大家樂食早餐,見到有啱食的G餐就唔想再睇落去啦.咁啱聰嫂老師又係揀呢個餐喎,原來佢都係同我一樣心態.Su仲問係咪冇餐揀,我竟然用咗柏拉圖愛情哲學比喻.


可能Su正在蜜運中啦...我同聰嫂老師已經去咗砍樹啦.


柏拉圖愛情哲學-愛情與婚姻
有一天,柏拉圖問他的老師,愛情是什麼?怎麼找得到?
老師回答:「前面有一片很大的麥田,你向前走,不能回頭,而且你只能摘一棵,要是你找到最金黃的麥穗,你就會找到愛情了。」

柏拉圖向前走,走了不眾,折回頭來,兩手空空,什麼也摘不到。
老師問他:「你為什麼摘不到?」
柏拉圖說:「因為只能摘一次,又不能折回頭。最金黃的麥穗倒是找到了,但是不知道前面有沒有更好的,所以沒摘。再往前走,看到的那些麥穗都沒有上一棵那麼好,結果什麼都摘不到。」

老師說:「這就是愛情了。」
又有一天,柏拉圖問他的老師,婚姻是什麼?怎麼能找到?
老師回答:「前面有一個茂盛的森林,你向前走,不能走回頭。你只能砍一棵,如果你發現最高最大的樹,你就知道什麼是婚姻了。」

柏拉圖向前走,走了不久,就砍了一棵樹回來了。
這裸樹並不茂盛,也不高大,是一棵普普通通的樹。
「你怎麼只找到這麼一棵普普通通的樹呢?」老師問他。
柏拉圖回答:「有了上一次的經驗。我走進森杯走到一半,還是兩手空空。這時,我看到了這棵樹,覺得不是太差嘛,就把它砍了帶回來。免得錯過。」

老師回答:「這就是婚姻。」


10:15 撘船啦...不過慢船真係幾慢


11:00 開始行長洲,行經一個剛退潮的地方,有個一尺多闊的隙縫,個個都小心翼翼咁行,跟住就去到一大塊有少少"冼"的岩石....我發覺我好似男仔咁...一d都唔怕...我的腳真係好番啦.


撘小艇去張寶仔洞.但係因為大家又冇手電筒,又有d微雨,雖然一場嚟到,但係冇人敢入去,其實我上次同同事都入過去,未入過就話入去試下,入咗去,其實又好似有搵笨的感覺...本來想話,我不入地洞,雖入地洞...不過佢地都唔嘗試入去,我入去都冇用啦....就咁就算啦.


12:00 返出去長堤途中,有一隻野狗成日跟住阿義喎,唔知係咪阿義同Tiffan有養狗,所以特別跟佢地.唔通佢地有陣狗味?


12:30 入咗一間海鮮舖食海鮮,食物OK啦,除咗一碟"椒鹽搞肚魚"話冇得食,侍應竟然問我地,要唔要"紅燒斑片"...奇呢...佢可以問我地要"椒鹽XX魚"or"椒鹽鮮魷"都ok呀...但係呢碟遲加單的菜,竟然第一時間上菜....都唔知係咪佢第二檯落錯單,屈我地要咗佢.....後尾隔離檯有椒鹽鮮魷喎!


15:15 離開長洲,其實今日仲係Momo派請柬的大喜日子添.佢自製邀請咭搵人印架.真係別出心裁.要娶一個Marketing的女仔做老婆,係咪要有幾道做大場面,大製作的散手先可以娶得美人歸架呢....


返到屋企都17:00啦,本來想話同三家姐瑩瑩去影相,天氣咁差,都係算啦.


係喎,原來今日係樺爾的"哎吔"生日....我竟然一d都唔記得咗....唔怪得佢成日叫我搵屋企人今晚一齊去Regal食咗張七折coupon啦....Sorry 呀...冇同你去添.

好開心,好開心

[呢篇嘢我重覆打咗三日啦.真係激死人,唔該畀面Save得到啦.成日restart,搞到我好想放棄.]
星期四因為四家姐的好朋友就嚟結婚,要開姊妹大會,我一早就應承同佢做一晚替身頂檔.


本來下晝去銅鑼灣就係想同佢一齊佈置聖誕裝飾,但係一上到間舖又暈暈地,變咗坐低同四家姐玩拼衫裙裝飾.佢新入咗一條長吊帶的連身裙,我同佢拼嚟拼去都好似好寡咁,雖然佢話條裙好睇,但係我就好懷疑咁話都唔知點著.


四家姐走咗之後,真係又想有生意,但係又有d想唔好咁多人入嚟(四家姐唔好丙我...我只係費事我唔清唔楚,反而做壞你個招牌.)


放工時間係多少少人,不過就唔係好多人真係入嚟我地間舖.所以我先放心d.


我見開始冇乜學生客就換咗四家姐新入貨的果條裙上最面.點知真係有兩個女仔走咗入嚟,其中一個就好想試果條裙.佢一睇個價錢就即刻試身.仲著出嚟畀朋友睇,我一睇,忍唔住嘩咗一聲,"嘩,著得好好睇呀!"佢自己入面著住件大米奇水晶珠片衫,條長吊帶就剛剛好嚮旁邊.我心唸,哦原來係咁著既...真係好Silm 好fit喎,估唔到咁靚架.


個女仔試身出嚟就猛話"好鍾意好鍾意,好好睇好好睇,好開心呀."真係嚇咗我一跳,佢即刻就話要買.但係睇佢已經買咗兩袋,佢話佢冇錢,要去噤機.佢仲猛問我收舖未,可唔可以hold住畀佢.我當然話冇問題啦.但係真係由得佢走咗,訂都冇落喎.


我呢個時候真係好想打電話同四家姐講,但係又怕個客冇返轉頭.廿分鐘後,個女仔真係返番轉頭嚟買喎.又繼續講佢好開心同好鍾意.


成功啦!今日雖然個場好冷清,但係有一個反應咁熱烈的顧客真係令我喜出望外.以一個初為Sales的我,真係好開心遇上呢類客人.更加高興的係四家揀衫的眼光有人應同,之前同四家姐開舖幾日,人流真係唔好,我地仲想轉賣多d Accessories添,依家個心都定d.


真係好鼓舞.


四家姐,加油啦!我打咁耐,都係想鼓勵一下你,希望你開開心心,多d知心客人啦!

Looks good

Sigma SGM2 mouse

My NBA fantasy lineup

多謝你地

呢排成日掛著搞四家姐間舖的野,一路都冇點見吓朋友同聚舊.


但係一send email真係好多人好擁躍嚟支持我地.


一個就帶女朋友嚟, 一個就帶朋友嚟, 另外有兩個就幫我嚮網上面賣廣告,真係好有心.


唔好講睇唔睇啱我地賣既野,就係專誠過嚟探我呢一份心意就已經好感動啦.


多謝哂你地呀! x5 倍!

有你一天

今朝返屋企,阿Dee播緊our most favourite,古巨基國語同名大碟,真係太正,首首都極好聽!


樺爾夜晚無啦啦又攞返古巨基的"Be my valentine"隻碟嚟播喎,其實我都冇心機聽歌...


聽到呢首歌...雖然唔係我最喜歡的古巨基 collection 之一,不過忽然覺得聽咗可以打一打氣...!


有你一天 - 古巨基 想聽呢首歌,按這裡再按上面Play掣

曲：張佳添　詞：林夕　編：張佳添

直到風　沒法飛　都可愛你
頭上雨　淋著你　使我妒忌
就算欠運氣　相信自己
隨時在困境中找到　陽光空氣

**就如夢想怕實踐不到便忘記
亦難以相擁到下世紀

@還有你一天　便等得到晴天
離紅日再遠　也總會及時發現
還信那一天　縱使不休不眠
憑一點堅持預見　明天的笑臉
（如果肯堅持下去　仍相信有你一天．．．）

沒有燈　沒有光　也可感覺你
留在我臉頰上那滴吻　不會墮地
為了愛護你　相信自己
能在白雪之中找到　微熱的蒸氣
repeat**@

咁就做成第一單生意啦

開舖啦!


四家姐,恭喜你呀,個幾月嚟的頻頻撲撲,終於開舖啦.潮話:Wa gai leu hwan he!(我為你高興!)


祝你心想事成,生意愈做愈旺,賺多d!


祝你早日準備好你的新產品,早日面世!Yeah!


今朝11:00a.m 起身,平時可以極速出門,但係今日開舖,當然唔可以失禮啦,熨件勉強見得人的衫著,平時好少化妝的我,今日要花多咗少少時間,因為要賀一賀你!


唔知點解,今日發覺好似好多人望我,唔知係咪我的化妝有乜問題,定係我的衣著....唔通,平時我唔多望人,只係因為我今日四處望人,所以先有呢個感覺??!6_@ 嘻...咪傻啦.


開舖先嚟抹玻璃門...真係好趕呀.好彩趕到吉時開舖!


四家姐的朋友送嚟的花籃好特別,配襯得好靚呀!希望呢個花籃可以帶多d客入嚟啦.


媽媽,二家姐同雯雯都嚟恭賀四家姐呀.


好彩二家姐d字靚d,"新張期內 全店九折 兩件八五折",我寫果張抛落垃圾桶好啦.


雯雯仲為姨姨祈禱添,佢話:多謝天父,賜MeiMei姨姨可以有多d客人入嚟買嘢,舖頭細呀,客人要一個跟一個入嚟買嘢!!哈哈...


媽媽仲幫手招呼客人入嚟睇嘢,不過今日入嚟睇嘢的人,都係呢個場的朋友或者sales居多,呢頭入嚟夾價,果頭去開舖....-_-


有幾件衫好明顯好多人會睇多幾眼,有兩個女仔入咗嚟睇一陣就走咗.


我因為要買個CD架,去咗Ikea行,買完返去頂替四家姐,四家姐呢頭走咗,點知果頭果兩個女仔行完街,兩個鐘後又返嚟喎,佢試身後就買咗條裙,我真係手忙腳亂呀,忙著打個九折畀佢,差少少連紙袋都唔知點入...好彩呢個時候四家姐返嚟救我...佢仲sale到另一個買埋條頸鍊,咁可以打個八五折!真係開心啦,咁就做成第一單生意啦!


其實...打咗個八五折,希望薄利多銷,客人會多d返嚟啦.


四家姐的朋友又嚟探佢啦,我都係時間陪返老公啦...老公,唔好意思呀,嘥咗你今日請成日假呆坐家中添...


四家姐話,佢的兩個朋友買咗嘢,仲有個女仔入嚟買嘢,真係一個好開始!


明天仍要努力!天使天使加油!

可恨最美一刻我並沒在場

你的努力,沒有白費,First Honour.....可恨最美一刻我並沒在場....


mms://wms1.ust.hk/itsc/congregation/2006/day3.wmv



恭喜呀...見到你之前post的video,超速行禮 ge 過程.. 我反覆扭到 1:34:44 睇咗十次! 好開心,好似大雄用法寶不斷咁replay靜宜讚佢好叻,咁黎replay你上台果一刻, First Class Honors!!!


It's my honour to watch the video! Proud of you! My tears ran down...

7-11 Hello Kitty 祝福

今日同四家姐去入貨,買買埋埋兩個喼.但係返到屋企睇,先知有d好似比聽到的價錢貴,到底係我冇留心,定係人地講得唔清楚呢?定係...人地以為我地似新手,所以蝦我地丫嘛...


入咗好多貴貨,希望客人喜歡就好啦.



呢排成日同四家姐一齊,真係有少少忽略樺爾....
樺爾真係慘啦,放工放得夜,仲要去我媽媽屋企樓下等我離開.....


今晚同樺爾去7-11,佢又想買熱浪薯片啦....入咗去買呀買,原來有Hello Kitty祝福電話繩送喎.我估樺爾想起班"BB女"呱?所以就買多少少野啦.


返屋企一拆出嚟,我反而想送畀四家姐呀.


四家姐,噚日的去Circle K 抽到既"sad"已經拋開啦,今日就有"順利","成功",同埋"親情"


拆開咗真係好開心呀!


雖然今日好努力咁趕,但係如果未準備好,就算可能趕唔到星期六或日開舖都冇所謂啦.反正星期六日都係破日,唔好話唔信邪呀.


講真,其實大家都好攰啦,最緊要就係抖足精神先做到野架嘛.我地抖一日,好好地休息一下都好丫.

最後衝刺一星期

四家姐間時裝舖就嚟開業啦,依家進入倒數階段的最後一個星期,但其實真正的裝飾設計先叫做剛剛開始.


11/3
同四家姐去旺角行返之前冇去過的牆紙舖,終於都揀定一款又平又靚既.有好的開始啦.貨架買的買,訂的訂,好似都幾貴,不過冇法子啦.


11/4
因為好似好耐冇陪樺爾,所以成日就留咗嚮屋企,冇陪四家姐,留待四家姐自己去入貨.


11/5
阿Dee畢業成家人影相,是日休息一天
我仲要趕兩場,IPA + Linux,上完真係虛脫.


11/6
Logo + 名片 電腦初稿完成啦!
Tamama 晚上返來啦.....唉.不妙.不爽.
裝修搞掂晒啦.好嘢!


11/7
一早起床,去四家姐再覆核Logo+名片,檔案太大,開唔到!失敗!!!
嗱嗱聲再重做過,名片面目全非.好在四家姐都接受到...
送出原稿製作,完工了!


11/8
四家姐漏夜趕工,今朝搞掂更衣簾,今日好似做咗好多嘢,打掃,貨架又提早送到,買埋蒸氣熨斗,衣架,裝飾.
今日真係有"苦力"的感覺,但係係我自己攞嚟,鬼叫我話唔駛帶喼去買衣架咩,真係不聽家姐言,吃苦在眼前.


聽日就要再入貨啦.仲有其他的"lum sum"嘢,聽日再繼續啦.如果星期五開到舖就好啦.星期六日都唔係好日,大事不宜...我就覺得唔好唔信邪啦.所以都係努力啦.家姐!

離家出走後後後記

Berry 生日,我通常都忘記咗,因為十月份生日的人有好多,屋企都有三個.所以感覺上年年都好似好隨意咁同佢慶祝.我真係太差啦...


本來要同四家姐睇牆紙,但係我一早同咗四家姐"請假",其實四家姐都唔駛我同佢去啦.不過我都可以做唔苦的"苦力"既.


同Berry又下午茶(其實係lunch嚟),又去宜家傢俬行咗好耐,真係乜都睇一餐,仲影咗幾張相,想畀四家姐做參考添,點知有位哥哥仔話唔可以影相喎...咁我就唯嘥佢的紙,帶佢張catelog走啦.


行行吓,咁又一晝啦,之後輾轉間去咗好耐都冇食過的Delifrance,哈,真係好,終於有軟麵包食啦,雖知道阿婆我冇牙吃呀嘛.


真係好耐冇咁傾過計啦,就咁就傾到差唔多十一點,Berry半講笑話,叫我同佢返屋企,唔知點解忽然有個想法,想去盡d,因為我應該冇乜機會會無啦啦走去朋友屋企玩借宿一宵啦.今次都係我第一次離家出走架咋.


打咗電話畀樺爾通知佢,原來佢呢個時候先準備離開公司....(慚愧...我就走去玩,佢就開會開到11:00p.m.)


嚮毫無準備之下,我上咗Berry間屋啦,佢真係一個乖孩子,好整齊呀!!


因為大家到冇準備之下,所以都好即興咁學起職業安全鬆弛肌肉的十招招式.剛剛條腰先好返,都係唔好做咁多啦.


講起西斜,無啦啦就講起細個都係住白田,屋企都係西斜,我地仲畫埋圖,又解說,又講細個去邊度,佢細個讀秀中幼稚園,我果間白田幼稚園都"摺"咗啦.


佢有個好朋友同我係同一間小學,而我讀的小學的四至六年級,每年彌撒先會經過佢間小學一次.


臨瞓前仲睇咗好多Berry細個的相,原來好多人細個都會對住個生日蛋糕影相,可能大家都唔明點解要對住個蛋糕誓願啦.唔知係咪通常都係掛住食糖,好似"嬲包包"咁影相.Berry當時又係咪食緊糖呢?


細個的活動範圍都有好多共通點,好似石硤尾公園咁啦,真係每年都會去影相咁掣,唔知,佢去動植物公園的時候,我又會嚮邊度呢?如果拍部電影或者寫漫畫情節,會唔會好似"NaNa"咁呢?


可能係因為睇咗好多相的關係啦,我發夢仲見到佢,佢的媽媽,話一齊要去見佢表姐添!真係好笑!

恭喜我啦!

醫咗咁耐,今日終於敷埋最後一敷藥啦.


雖然感覺好似唔係咁痛啦,仲有少少少少痛,醫師話得,我都信佢話應該得.醫師仲叫唔好"dum"懶個身,快d去搵工啦.之前的右膝醫好咗都要用多個幾星期先有力,家陣有腰骨啦,依家腳同大腿骨的關節又冇以前咁大聲"呱呱聲".真係好咗好多.


今日醫師仲同睇多次我隻腳,佢話我左腳踝好好,呢幾晚腳有d唔自然,佢仲幫我"拍一拍"腳指公的關節添."拍"完好似真係幾好.希望我可以瞓得好d啦.


因為呢掛成日要行街,所以都冇好好地休養生息,呢排仲有好多事情等住我去做....第一件事,就係搵工.


四家姐方面,我都好似冇乜好搞啦,希望四家姐舖頭搞得有聲有色,咁我都安樂哂啦.


不過.....好似個人仲未ready去搵工....唔通真係"dum"懶咗個人(唔"dum"都係個大懶人啦)?點算好?

藉著雨點說愛你

呢幾個星期日都要由下午上堂上到晚上,上多幾堂真係幾辛苦.早幾次重搞到胃痛.好彩呢兩次有你陪我食下午茶,所以呢兩次先冇胃痛啦.


相識咁耐都係呢兩次有單獨傾計的機會,可能我都係習慣一對一傾計啦,有時多一兩個人,講的話題都係好大圍一齊講得的野,所以當一對一的時候,就可以講多d切身d的話題.傾落,我反而覺得太理智可能令感性的人都變得太冷靜.有時候等待未知的未來都是一種折磨,有d事唔可以不變應萬變,因為人生要經歷的事實在太多,唔到你唔爭取時間...哈哈,講乜?都係唔好講咁多啦,希望你唔會覺得我太八掛啦. (少少咁都係真架.)


半年前嚮三家姐屋企,同三家姐&姐夫一齊睇咗呢套戲"藉著雨點說愛你",佢地話呢對男女主角拍完呢套戲就結咗婚啦.因為佢地認為人生苦短,想去做的事,就唔好遲疑,因為冇辦法控制下一秒的事.錯失的機會無可能好似戲劇咁爭取返來.其實睇完呢套戲,我都領略唔到呢套戲的重點,因為呢套戲天馬行空的情節太常見,不過都會令我有少少感動.


http://hk.movies.yahoo.com/050302/32/19y10.html/

番唱

今晚有李克勤上勁歌,又唱咗一d舊歌,果首關正傑的"殘夢"都係我以前的favourite!唱得真係好啦.但係古巨基版"喝采",同克勤版"喝采"都係唔夠陳百強原唱咁好.


克勤就唱自己寫d歌特別投入架,好似<<情非首爾>>同<<婚前的女人>>,即使d歌詞....佢寫都好過林x!


果首新歌<<天水圍城>>無論個曲譜同歌詞都唔夾佢唱,又唔好聽,就算佢搵個韓國豎琴高手黎演奏都無補於事.唔知佢係咪夾"演奏廳"夾到矇咗.失望!走火入魔!有音質,冇"音功".


唔係"一輪咀"唱就啱佢唱架嘛...清唱一堆冇音調變化的字把鬼麼...


圍住了刻薄?! [講乜呀...@-@]

人擠逼中便容易退步 [真正的逆思維....]

要見步行步 無車票又怎去覓去路 [唔望你有上文下理,單睇一句都唔知講乜!!]


天水圍唔衰都畀佢寫衰! 克勤真係要小心揀歌架...咪下下玩花巧,唔記得自己唱得正,唔駛靠綽頭.


早排睇電視見到古巨基番唱以前d經典歌.(一開聲就走音...玩現場都係克勤好d)睇古巨基唱就知佢鍾意邊首歌,因為好似唱佢自己鍾意的歌會投入d,同盡情d咁.好似呢首 叫"明天還要繼續"(譚詠麟原唱),都幾好聽架!都係向雪懷d詞好多多聲.打畀四家姐聽:


明天仍要繼續 (TVB電視劇"他來自江湖"主題曲) - 譚詠麟 想聽呢首歌,按這裡再按上面Play掣
曲：盧東尼 | 詞：向雪懷

沒有去試過 怎知它錯 就算我錯了 亦必須繼續
痛苦時有眼淚去中和 沒有去愛過 怎知它美
沒有你愛我 問怎可脫俗 那管它世界未原諒我
多奢侈的夢 一朝醒覺時盡變空 [呢句唔"老黎"...唔關事架]
你看我時沒有淚容 愁懷懸在半空
明天縱多苦痛 命運繼續來
一點不放鬆 明天冷風送 面上有熱情(未動我熱仍自我)
仍流過


古巨基版好聽好...............多 !!!

改名

因為好多嘢都幫唔到四家姐,改名呢d嘢就可以大家畀d input,我始終都係喜歡樺爾幫手改的果個名.不過四家姐仲想諗多幾個揀下,我已經搞盡腦汁,都唔知邊個叫做好名.


不過四家姐就喜歡我提意的window display, 咁都有d嘢叫做做過啦.


做生意真係好難.

祝你成功

成個幾星期東睇睇西看看,睇左好多間舖都唔敢去馬,始終因為租金太貴,要冒好大風險.可能係天意啦,四家姐以前都想過租的地方,咁啱租金大減喎.真係好多人都躍躍欲試.三家姐幫眼睇過都話ok,睇黎我同佢都要忙多半個月啦.


終於都選定地點啦.希望四家姐你身體好d,可以大展鴻圖!今生無悔!


至於我呢?身體好得九成九,如果再唔去搵工,恐怕都會畀人覺得有偷懶之嫌.

旅遊醒少少﹕台北捷運免費一日遊

2006-09-26 更新

【明報專訊】由即日起，香港旅客前往台北，只需要憑香港旅行社(網站 - 圖片)所蓋章簽發之「台北一日遊捷運車票換領券」、香港旅遊證件（只限BNO/SAR護照）及機票，到台灣觀光協會香港辦事處登記，便可領取台北一日遊捷運車票。數量有限，換完即止。


地址﹕香港上環德輔道中173號南豐大廈904室
辦公時間﹕上午9:00至下午5:00（星期一至五）
查詢﹕2581 0933

網上簽證: http://www.immigration.gov.tw

收拾殘局

雖然成個幾月冇返工,但係好似都冇好好地休息過.之前一想執屋,隻手就搞到甩皮.今日又再"的起心肝"執野.但係一睇到自己的舊物.不其然又好似以前咁,又變咗睇返以前.


我有兩個舊同學講起,佢地結婚到而家間屋都仲好似剛剛搬入去咁少野,因為佢地成日都"dum"野.舊的野,冇用啦,就唔要啦.


睇返我自己,就乜垃圾都要留,但係間屋就唔可以放到咁多野...哎...


睇下睇下,見到以前同學寫的信,見到一d冇再聯絡的同學的信,聖誕咭,生日咭...發覺我的記性真係好差.


睇返呢d野,忽然想起很多事,想起以前關心我的朋友.以前的我,好軟弱.多得幾位好朋友的鼓勵.寫信最多信給我的兩位朋友,已經離開香港啦.原來我成日都唔回信...真係太差勁啦.好在佢地都冇怪我懶,仲會同我聯絡.


佢地幾個仲唔知點解畀咁多驚喜,仲會自製好有心思的生日禮物,靜靜雞咁放入我個位呀,書包咁,真係好開心呀.


睇到以前因為阿Dee唔可以"夜麻麻"睇龍珠,要jot notes講故畀佢聽,之後又成日畫比達...


睇下呢d野心情經常大起大跌,又喊又笑.


睇到以前的日記,原來11年前我已經希望學電腦....當時真係幾天真.爸爸仲曾經想同我報名讀暑期班,但係我最後因為太貴冇讀到.以前要學電腦係好奢侈,到阿Dee年代,學電腦係正常既.


想到以前屋企冇乜錢,爸爸為咗我的前途都會肯花錢畀我學野,佢對我的期望,我依家都未達到....連工都冇返.之前成日考慮自己,從來都冇想過爸爸媽媽擔心.....好似<<愛得太遲>>的感覺呢...(歌詞的意思好...不過詞彙就...算啦,無謂咬文嚼字啦)不過,其實愛得未遲呀.


四家姐話,媽媽都問起我到底做緊乜,又唔返屋企....唉...其實我唔係唔想返,係唔敢返,只不過唔想成日畀佢知我仲未好番.仲係咁頽廢.日日都冇做野.


仲要醫多幾耐呢...幾日得唔得呀?我冇乜耐性啦.


愛得太遲 -- 古巨基想聽呢首歌,按這裡再按上面Play掣

愛得太遲

歌手：古巨基 | 作曲：楊鎮邦＠宇宙大爆炸
填詞：林夕 | 編曲：雷頌德

我過去　那死黨　早晚共對　各也紮職以後沒法暢聚
而終於　相約到　但無言共對　疏淡如水
日夜做　見爸爸　剛好想呻　卻霎眼看出他多了皺紋
而他的蒼老感　是從來未覺　太內疚擔心

最心痛是　愛得太遲　有些心意　不可等某個日子
盲目地發奮　忙忙忙其實自私
夢中也習慣　有壓力要我得志

最可怕是　愛需要及時　只差一秒　心聲都已變歷史
忙極亦放肆　見我愛見的相知
要抱要吻要怎麼也好　偏要推說等下一次

我也覺　我體質　彷似下降　看了症得到是別要太忙
而影碟　都掃光　但從來未看　因有事趕
日夜做　儲的錢　都應該夠　到聖誕正好講跟我白頭
誰知她開了口　未能挨下去　已恨我很久

錯失太易　愛得太遲　我怎想到　她忍不到那日子
盲目地發奮　忙忙忙從來未知
幸福會掠過　再也沒法說鍾意

愛一個字　也需要及時　只差一秒　心聲都已變歷史
為何未放肆　見我愛見的相知
要抱要吻要怎麼也好　不要相信一切有下次

相擁我所愛又花幾多秒
這幾秒　能夠做到又有多少
未算少　足夠遺憾忘掉

多少抱憾　多少過路人　太懂估計　卻不懂愛錫自身
人人在發奮　想起他朝都興奮
但今晚未過　你要過也很吸引

縱不信運　你不過是人　理想很遠　愛於咫尺卻在等
來日別操心　趁你有能力開心
世界有太多東西發生　不要等到天上俯瞰

在家千日玩

今日樺爾有中秋節補假,真係開心.好耐冇咁多時間一齊留嚮屋企啦.不過,唔係睇戲,就係打機,係咪好頹廢呢?


唔知佢呢排點解狂睇戲,我星期六先同佢睇戲,睇果套Bloomy Sunday(布達佩斯之戀),佢星期日等我,為咗kill time,又同Donald去睇花之忍者,Donald仲睇到"瞌眼瞓"添.真係可憐....但係套戲好似係佢揀家喎...


睇完戲,又去旺角買DVD...唔通真係咁多戲好睇?


呢套"下妻物語"係都係拍"花樣奇緣"的導演中島哲也喎,所以佢就買咗返嚟睇.


我的Comment....拍得幾得意,但係睇咗兩眼空空.冇乜得著.


但係唔知點解...我反而會想畀四家姐睇呢套戲.

IPA Lesson 3 + Linux Lesson 2

依家一到星期日,我就好似d中小學生咁,要走去上成日堂.一日要上兩堂兩三個鐘的課程本來都ok,好似仲冇細個成日讀d唔想讀果d堂咁悶.英語老師講書又幽默,電腦堂的野聽少陣又怕自己唔識.


不過,我呢幾日傷風,要上成日真係幾惡頂.不過唔知點解拍咗傷風丸都唔眼瞓呢,真係幾奇.


上咗成日,只係因為太遲食,有d餓到暈...


上埋今堂,IPA的基本功,Vowels + Consonants 發音都學齊啦.理論上,查咗字典就可以讀到個字出嚟啦.


不過th音真係幾難發音. 純正的美式 r 音就仲難學.呀sir話,要學最好就係細個學,玩口水都可以悟出發音的方法架喎... ==> 結論:由細開始就要學玩口水啦.


******************


去學 Linux 七成為學,三成為買Mac mini 啦.因為個課程半賣半送個Mac mini,又話可以一部機,裝windows + Mac + Linux 真係相當吸引.


去上堂呢班人都有八成人係呢個心態報名.可能佢地都係去玩多個去學,本身可能都識識地.


不過,我就係一個新手.所以會好小心睇住"碌屎"學(喂喂,上完IPA,學咗都要畀面用架!! 係notes!!唔係"碌屎")


因為阿sir冇教到一樣野,所以我就落堂去問佢,我的問題: "x 是什麼意思呀?" (好似台灣網站a-kuei.com.tw的阿貴問媽媽某句粗口 wa kao 是什麼意思呀?"咁....)


因為我上次又問佢同類的問題,但係考起咗阿sir,阿sir就講咗句:"你D問題都幾特別下喎..."(唔駛用呢招啦,呢招只係用嚟buy time架...)


不過算啦,佢都叫做答咗我,不過我就係唔知佢的答案堅唔堅啫...

衝動 Part2

今日敷完藥,醫師話睇多我幾日先可以講我個病仲有幾多日要敷...唔,應該咁講仲有一個星期要敷啦...但係咁都好啦,我應該開始準備見工的野啦....似乎太耐冇執,真係會花多d時間囉...


食完飯就去咗剪頭髮,今次係我繼01年以來第二次電髮.因為呢幾個月醫病,完全都唔理個頭.好似好"哩啡"咁.今日終於忍唔住去理髮啦.


希望睇落會精神d啦.哈哈...

人類消失 大自然重生

【明報專訊】英國《新科學家》雜誌報道，假如有一天人類消失，不出數日地球會出現另一番新景象，屆時瀕危物種恢復生長，污染逐漸消失。數十年後草木叢生，2萬年後人類痕全部消失，但若要輻射及人為化學物質蕩然無存卻是遙遙無期。


《新科學家》指出，人類滅絕後，光污染會即時消失，這由於無人再補充發電廠的燃料，人為光線很快熄滅。接農田、街道，以至如香港、倫敦(相關新聞 - 網站)等大都會將在50年內生滿植物，建築物陸續因失修、蟲蛀、腐朽而倒塌。「假若明日天光，人類不再存在，地球軌道也會即時出現變化。沒有維修，所有風災、水災和寒夜會蠶食荒廢的建築物，幾十年間屋瓦剝落，樓房倒塌。」


此外，逾1.5萬種瀕危物種即時恢復數量﹔1000年後二氧化碳回復工業化前的水平，2萬年後人類痕會全部消失。


Source: http://hk.news.yahoo.com/061012/12/1ul5r.html

衝動

本來只係約咗朋友等埋一齊去食飯,點知經過見到上星期心郁郁想買的果部手機有優惠,咁就無啦啦帶冧把轉台兼買機啦.


SE Z610i ....I love this mobile!!


其實都明知部機好易有手指模(我手汗咁多咁濕..都幾大鑊架...),冇headphone送,得送64Mb M2,冇閃燈,個相機冇蓋,但係...因為好like佢個樣.忍唔住就買咗啦.


不過部機都有喜出望外之處,可以連拍四張相,揀白平衡,揀影象顏色,又可以用機內調校光暗,對比度.哈...部手機好似相機咁.2.0 Mega Pixels...唔知d畫質係咪真係咁好啦.哈哈....仲有哥哥好喜歡的計時功能添...玩咗20分鐘有既"初心者體驗"....可能日後會#%#$^^$%^7@#$


影片同相片都可以即時用3G送出去個Blog添....個掣太易揀到啦.但係影下一張就要按另一個掣兩下先可以繼續影喎.唔啱畀屋企果幾個小鬼用!!


本來手機就只係用黎打電話打出打入啦,但係無啦啦因為個靚字就.... -_-


好似從來都冇咁衝動過,之前有工做都冇咁"大洗",正所謂一闊三大,應該都仲未有收歛的餘地!

穿Prada的惡魔

好耐冇睇戲,因為四家姐請我就畀面去睇下睇啦,多謝家姐!!!


呢套戲個故事本身就好簡單,不過就好多名牌衫褲鞋勁晒冷,對於我呢個冇Fashion認知的人,睇咗都係過眼雲煙.


不過唔知點解,四家姐同我都會睇睇下眼濕濕,我就中間無啦啦有d想喊,佢就尾聲先嚟感觸!!奇哉...


或者無業的人睇呢套戲會喊呱....莫非無工做,無得買靚衫....無可能...有工做都買唔起果d衫啦.


對於我,只可以得出一個好無聊的結論,就係:去搵工之前要裝身!

遲咗好多嚟的好消息

已經敷藥敷咗三個月啦,身邊的人,擔心有擔心既,問候有問候既,責備有責備既,加上四家姐忽然隻手都出問題,又去敷三日又唔再敷,到底係我有耐性丫,定係佢唔信人呀,就連我都開始冇心機醫啦.


噚日醫師話我隻腳可以敷埋噚日就唔駛敷啦.我都唔敢相信,怕今日佢又話我未得.


今日真係只係條腰有事,腳就唔駛再敷啦!!! 只係股骨仲有一個位置就好返啦.

廣告時間-花樣奇緣

昨天去看了<花樣奇緣>, 說實話, 我最初睇到預告片時就已經把它歸納為一定不看一類的電影, 到看了內容簡介後我又起了好奇心, 很好奇想看看導演究竟點樣來表達... (很有趣, 如果只看預告或者只看內容簡介任何一樣的話, 都不會引起我的興趣)


在表達手法方面, 意念很新穎, 畫面場面也很悅目, 音樂歌曲十分好聽, 故事發展引人入勝, 真的我的專心程度比看一些荷里活動作片高多了. 看完之後很有一份滿足感, 同時也覺得眼界開闊了, 原來... 電影是可以這樣拍的, 不得不說一句, 導演真是個天才!!


警告: 筆者喜好通常來說比較另類, 讀者如發覺"乃野", 本人概不負責...


P.S.: 發覺原來都幾多人單拖走去睇戲...

無心機打blog...

呢排其實冇做工,應該好多時間做其他野.但係唔係主婦手,就係病未好,想執屋都只係執咗d,又唔可以執屋.又泰國返嚟,又一個星期啦.


聽日又要上成日堂,都唔知自己咁學野吸收到幾多....


如果唔係tamama返嚟,本來今個星期都算開心啦.


至少,有野學,見返d好耐冇見的好朋友.好難得可以咁樣傾計架...


不過...Kathy 又走啦...以後更加少機會見啦... sigh.....

中秋節快樂

祝你們 中秋節快樂!!


人月兩團圓!!!


心想事成!

IPA Lesson 1

之前Mabel約我同珮兒一齊去上一個英文Demo堂(Prime English),聽完都好想進修一下英文,但礙於時間同$$$關係,就算想讀好D英文,都會為之卻步.我自問花唔起成一年多的時間個個星期去上英文堂.之前職業英語有資助都冇用到,真係好嘥.如果我仲有$10000資助,都仲可能會花一年時間...花少少錢就上咁多堂,真係幾抵.不過,我就用咗嚟資助PMP course,咁就冇計啦.


之後同Mabel珮兒商量過,都係學好音標先,所以反而報咗呢一間學.(Prime English又做咗助攻手添...)


我地呢個年代的香港人,通常都冇正確學好音標同拼音.細個只係靠老師教我地點讀,只係靠多聽多默書嚟教生字,老師學錯,老師教錯,下一代都一齊錯埋.到真係同外國人溝通,聽唔明佢講乜之餘,佢又更加聽唔明我講乜.真係好樣衰.


睇到三家姐個女瑩瑩學英文學得好好,只係得四歲咋,就會主動同外國人講英文,真係自愧不如.要我同佢講英文,有時都唔知點講.如果要小朋友教返我轉頭,更正我的讀音,咁就更加樣衰啦...作為一個長輩,唔可以咁差啦...


我將會學到的Phonetics,如果我地4-7歲就學會,真係可以大大提高自學英語發音的能力.而且學其他以國際音標教學的語言都有幫助.新一代的小朋友,唔好再好似我地以前咁無知啦.


***************
今日去旺角的國際音標學會(IPA)上堂,個講師講得好生鬼,一路都冇睡意.主要的內容同之前聽過的Demo堂係差唔多.

1. 港式英語學習常見問題,又有實例
自已試下讀呢d字啦,睇下你啱幾多....
Set 1:
car, far, big, book, look, cook
Set 2:
island, debt, hour, heir
Set 3:
viscount, receipt, corps, subtle, fasten, exactly
Set 4:
ballet, buffet
Set 5:
produce, discount, control, forget, cupboard, purpose, police
Set 6:
Fiona, Eliza
(唔知自己啱唔啱?網上好多發聲字典架,咁就要睇你係咪聽一套講一套啦.)


話你知,我Set 5 的字真係全部都讀錯哂...其實同年代的人可能都會同我一樣全錯!!!點解?因為我地其實係用以知的小部份字去估其他字的讀音,但係咁樣就會好易估錯音....若果大家都來自同一個問題教育基礎上,好多冇得解釋的"exception"其實係因為本身學錯的問題,e.g. 串字相同都唔代表同一個讀音.好似foot同food咁,中間係唔同音標架!


Set 3, Set 4其實都唔難讀,但係我就成日明知故犯,用港式音,真係好錯架.


2. Phonetics 同 phonics 的分別

原來phonics係畀native speaker 學閱讀,就好似我地中國人學識字咁,圖文配對,而唔係用嚟學拼音架!

發到音就默書默得出,咁都係未必啱哂架,因為英文都同樣係一音多字架...(e.g. see, sea, C 都係同音呀.)


3. 發音基礎,Elision(元音省略的方法)等.

set 3 就全部都係呢類字啦


4. 原 Vowels != Vowel letters 架!呢個真係影響寫作能力架.
好似點解hour 係用an, hotel的兩個讀音又會影嚮佢個 articles 係 a / an !


5. 歸納Vowels的種類及記憶方法
用口形,唇形,脷前,脷後的發音分辦,真係可以聽得出多d分別啦!

今堂只係教咗8/20 Vowels...仲要學多幾堂呢...

網上示範音標發音: http://www.ipa.edu.hk/ipaNew/ipa.swf (抄個flash,冇難度!!)


真係一堂應該一早就學的課堂!


多謝Mabel!我好想學呀!...呀,仲有呀...多謝珮兒呀,雖然我對馬騮仔Monchhichi冇喜好(我有個friend好鍾意架),但係都多謝你買的筆記簿呀!