姨甥到我家

早幾日應承咗瑩瑩,星期六帶佢去睇戯,所以今日就同樺爾一齊去元朗接佢.點知今日三號風球又落雨喎,乜地方都唔係幾方便去,但係既然應承咗小朋友就唔可以唔做架,所以都係見吓佢,睇情形先算.


今日帶咗瑩瑩去食意粉,因為佢最鍾意又食得最叻就係食意粉,佢好乖呀,食得好快.之後同佢講話一齊去東涌到睇戯,瑩瑩就問係咪東邊好..........長的葱?哈....咁我就同佢講,去睇"大象呀鈍救世界"啦,點知佢又話睇咗喎.三家姐都冇講我知添.咁唔睇戲,又要留嚮室內安全的地方.去邊好呢?


咁瑩瑩就話想去我地屋企啦.好啦,之前成日話想上嚟我地屋企,咁就帶佢去打機玩下啦.


三家姐同姐夫由澳門打電話搵我地,上咗MSN傾計添,原來澳門打八號風,佢未必返到屋企,今晚又咁大雨,順理成章就留咗瑩瑩嚮我地屋企過夜啦.


同呢個妹妹,睇下卡通片,沖下涼,打下機,玩下公仔,話咁快又食嘢啦,可憐樺爾丈丈要出街買嘢食,被經過的車淺起的水淋到成身濕哂.


食飽飽冇耐,瑩瑩八點鐘就話要瞓覺.同佢講下故仔,佢又不斷講嘢喎,反身反嚟反去,點陪佢好似都瞓唔著.樺爾就作"鬼故"笑死我,一d都唔驚架.


第二朝起身,瑩瑩話佢成晚都冇瞓過,不過佢就話最鍾意去人地屋企過夜.仲話其實我地已經做得好好添,話如果我地遲D有BB都冇問題啦.真係人細鬼大.