母親節+五月之星生日會

每年五月的第一個星期六或日,我地都會同媽媽雙料慶祝,所年年都唔多記得母親節係第二個星期日先真.


今日要返工喎...(係呀...星期日呀...都要返... -_-) 但係屋企人全部都現身去咗爸媽屋企,只係得我未見人,三家姐...二家姐...三家姐仲輪住call咗我幾次添.但係我就唔知幾時先走得.媽媽知道我未必出現仲話要取消慶祝添,真係唔好意思,好在最後都可以收工去食飯.


今日三家姐訂咗個房,有兩張大圓枱,一張小圓枱,為咗一家廿口可以面對面咁坐,搞咗一輪之後就張兩張大圓枱拍埋一齊,成個8字咁...真係好意頭啦!


其實食咗d乜都唔多在意,就在混亂中食過一餐,幾個小鬼起初都算乖,食到咁上下,就"發汔水瘋",瑩瑩同雯雯大笑,啟賢就走嚟走去,走到成個頭都濕,又係咁講嘢:一邊雙手拍面,又邊叫好嘈呀...,之後仲唱ABC歌.


後尾五個小鬼就開始玩搬凳仔,仲玩起猜拳添,我都加入同佢地一齊猜,點知同雯雯猜咗三次,我都輸咗,到第四次,佢就話:"你唔好同我猜啦,你會輸畀我架",結果係....
連輸四次 6_<~~~


羨寧都係比較好心地,佢話佢"特登"輸畀我喎,佢同我猜和咗五次先輸架,不過再猜多一次,我又輸啦...
嗚...嗚,連小朋友都"蝦"我.