陰霾

藉口 - 周杰倫

詞：周杰倫 曲：周杰倫 編曲：周杰倫

翻著我們的照片　想念若隱若現　
去年的冬天　 我們笑得很甜
看著你哭泣的臉　對著我說再見　
來不及聽見　 你已走得很遠

也許你已經放棄我　也許已經很難回頭
我知道是自己錯過　請再給我一個理由　
說你不愛我

就算是我不懂　 能不能原諒我
請不要把分手 當作你的請求
我知道堅持要走 是你受傷的藉口
請你回頭　我會陪你一直走到最後

就算沒有結果 我也能夠承受
我知道你的痛 是我給的承諾
你說給過我笑容　沉默是因為包容
如果要走　請你記得我
如果難過　請你忘了我


擱淺 - 周杰倫

詞：宋健彰 曲：周杰倫 編曲：鍾興民

久未放晴的天空　依舊留著你的笑容　
哭過 卻無法掩埋歉疚
風箏在陰天擱淺　想念還在等待救援　
我拉著線 複習你給的溫柔
暴曬在一旁的寂寞　笑我給不起承諾　
怎麼會怎麼會你竟原諒了我

我只能永遠讀著對白　讀著我給你的傷害　
我原諒不了我　就請你當作我已不在
我睜開雙眼看著空白　忘記你對我的期待　
讀完了依賴　　我很快就離開

relax 的一晚

上星期同Kathy報名參加一個私辦的瑜伽班.她們兩人以前都曾經學過,而我就是第一次學.今晚是第一次一齊學瑜伽,唔知點解佢地兩個都好似好興奮同期待咁.我就唔知頭唔知路,都係咁學啦.

一班大約八人,經過導師一邊示範一邊講解,由熱身到舒展(其實係好緊...好梗)再休息,雖然唔係個個動作都做到,但係都可以好放鬆咁進入一個較輕鬆的心情,身體放鬆.不過我雜念太多,導師一邊好似催眠咁講好多嘢,放鬆呢度,放鬆果度,都未想得到,又下一句,因為太嚴肅,反而成日忍唔住就笑,點知呢個時候,導師話連面部都要放鬆,搞到我個肚抽住抽住笑....


唔知係咪真係會幫助入睡呢?真係希望好瞓d啦,同埋放鬆我條腰就好啦.

靚妹玩電話

上個星期六去探三家姐一家人,三家姐畀咗我個手機號碼畀瑩瑩,短短廿分鐘,瑩瑩就打電話搵咗我三次,都係因為佢啱啱學識打電話畀爸爸媽媽以外的人,而我就好榮幸成為佢的第一個試驗品.


正如好了解佢的丈丈所料,噚日同今日我都收到瑩瑩的電話.真係估佢唔到,一朝起身就搵我啦,佢話,我打"C益"呀,又同我講起星期日畫的衫衫,講起雯雯,仲問我點解我講說話咁細聲添...但係我就唔知點畀反應.因為好少同靚妹講電話.


今晚又收到呢個靚妹的電話,今次佢就問我放工未.我一話未,佢就話"你同你老細講放工啦",我心唸,靚妹,你媽媽可以同佢老細講,因為佢地係好朋友咋,我反問番佢媽媽收工未,佢就話"未呀,媽媽返工呀,佢可能同你一齊收工啦"

講講下,佢忽然就話"我唔同你講住啦"...咁就收線啦.唔知佢聽日又會幾時打畀我添.

現報?!

真係呀....生命它給你一些,不給一些...


今日事情如不順,今日問題如不盡....


天呀,請給我一點時間...休息可以嗎?

我的新notebook

今個月頭公司有HP Notebook 特賣,雖然我算不上是呢間公司的員工,不過HP反正都係想去貨,點理得我咁多呀.

HP Pavilion dv2725TX Entertainment Notebook PC

($9980 street price, discount to $8780 including 4GB HP Memory flash drive, and 2 cinema tickets)
- Intel T7250 Core 2 Duo Santa Rosa CPU 2.0GHz
- Windows Vista Home Premium
- 2 GB DDR2 RAM
- 160 GB 5400rpm SATA Harddisk
- 1280 x 800 Wide screen
- NVIDIA GeForce 8400M GS (up to 895MB total graphics memory with 128MB dedicated)
- 8X DVD+/- RW Super Multi with Double Layer Support
- Weight 2.5 KG
- All in one, build-in camera, HDMI output, fingerprint etc.

今日收到新機,返到屋企試下功能,都唔錯呀.速度算幾滿意.不過有HDMI都冇乜用,因為無論Notebook定係TV都唔係HD....BUT...個Notebook的畫面超靚.係我好喜愛的反光玻璃面,立體感同層次感都好好.睇碟至啱.

今日仲有意外驚喜添,買的時候都唔知,以為要好高級的Model先會有的Remote Control, 呢個Model都有喎!
仲有個Pad Pad係特別設計架,個Scroll bar 真係一個bar,唔係碌碌架.正!

不過呢,都仲未搞清隻4G手指係點換領添...

哈哈,最開心莫過於,呢份禮物可能係上天可憐我呢排好辛勤咁工作,多謝天父,賜我玩物...哈哈.

細佬啟賢

今日又見到細佬啟賢...唔係,應該係係君君同羨寧的細佬啟賢....今日有多d時間同啟賢玩,佢睇到我地玩UNO,佢又想玩埋一份,碧碧姑姐就問佢,你識唔識玩架,佢就話:我識!


跟住叫佢數數目,佢可以由1數到11,真係叻叻,不過應該係"念口王"果種,仲講得唔多正果種,好過癮.點知佢數到11,之後就跳到15,哈哈,一路派牌仲係成日講"4, 15..."喃喃自語咁.


佢係反轉d牌咁睇住嚟派架,派派下,佢派咗隻"+4"畀我,我就問佢,"你做乜罰我呀?!"佢就笑笑口話:唔係呀...點知佢又派"+2"畀我,我又問佢,"你做乜又罰我呀?!"佢都仲係笑笑口話:唔係呀...睇嚟佢真係唔想罰我,只不過佢睇住d牌嚟派姐...


睇睇下,佢仲有個小動作,好似要打咗咭先派咁.真係唔知呢個小鬼嚮邊到學返嚟.睇佢一d都唔似兩歲半.佢可以講到好多說話,仲有完整的句子,真係好叻架.

虛無的航天展

早幾個星期同樺爾睇咗"2001太空漫遊"呢套經典的電影,估唔到今日走咗去圓方附近的一個露天"中國航天展",其實都係機緣巧合,因為同三家姐一家人一齊去,又想帶媽媽去行下,於是無無聊聊就去咗.


一去到,見到瑩瑩玩得好開心,佢剛剛玩完充氣的果種兒童遊樂場,裏面成個焗爐咁,玩完成個面紅耳赤,紅粉菲菲,好靚女.


原價要100元入場費,今日特價20元都覺得唔多值.估唔都咁少嘢睇,展品有得睇,冇乜得玩,有得玩的仲冇乜好玩....-_-,去太空館好過.幾個展覽館都好似蒸籠咁,得少貓幾隻人都已經快要窒息,再多d人就真係死得啦.


逗留得最長的地方,竟然係禮品館...因為今日同行的是三家姐!

約會

今日樺爾約咗我去跑步同射籃,以為佢只係講下,點知真係成功出發,仲一打就打咗個半鐘,不過都有抖下架,唔算太攰.希望咁樣可以好瞓d啦.


今日試咗拍住個波打圈咁走,不過就似追住個波多過真係"控波",今日又試下"擦板",不過就似"彈板"射球多d,至於"走籃"呢...真係唔好意思嚮小朋友面前獻醜啦.都係射下波算啦.


呢排流感咁犀利,如果一個星期可以做兩次運動,應該都可以防一防既.不過睇怕都冇乜呢個恆心啦.

過敏症

早排煮咗兩次飯,換來成半個月都患上過敏症,隻手癢到飛起,好彩終於都好得八八九九啦.多謝哥哥的藥,我好乖呀,食足一個星期的療程,加上媽媽的涼茶,好好瞓咗成個星期.


不過到底我因乜事敏感呢,到而家都係一個迷.

歡樂時光

這幾天重遇了相交相知多年的好朋友,好同事,傾著傾著,忽然就像坐談會說起工作上面對的困難...


開心的時光過得真快,其實還有很多說不盡的話題,總覺得時間不夠,或是在趕什麼的,希望下次可以找個地方再談談心.

生日願望

上年的生日願望,基本上可以講達成咗,雖然唔知係好定唔好,不過,至少都成真了...(係呀,係你呀,其實,唔關我事架,不過當時果刻,只係想到呢個希望),至於其他....希望大家都可以成真啦.


今年呢,因為有兩次吹爉燭的機會,但係好似都係同一個願望,希望真係會成真啦.


另外,今年收到很多人的祝福,真係好多好多,有收咭,SMS,電話,見面都唔少,真係萬二分多謝各方可愛親友.


另:...

忽然想起近來看的一部電影,嘿...睇戲喊下就算啦,千祈唔好咁樣.

我的生日會 Part II

今日到屋企人同我慶祝生日,飲茶之後再返屋企食蛋糕.雖然今日哥哥一家人同大家姐佢地都唔得閒,但係有咁多人(同兩個小鬼)一齊慶祝都已經好開心啦.


雯雯仲揀咗一張金粉超多的熊仔生日咭畀我添,佢仲畫咗個雙手放後面的女仔添,小朋友畫的畫真係好可愛,笑得好天真無邪呀.


唱完生日歌,兩個小鬼就幫我吹爉燭,之後仲有三輪熱烈的"濕吻",瑩瑩鍚鍚鍚鍚...成個面都係口水,之後我抺好,又到雯雯嚟鍚鍚鍚,之後瑩瑩又再嚟一次,真係又wet又warm.


三家姐仲話,今日同瑩瑩揀生日蛋糕,瑩瑩本來想揀個芒果蛋糕,點知即刻畀人買咗喎,之後想買hello Kitty蛋糕架,但係媽咪又揀咗另一個朱古力mousse cake,之後瑩瑩就對住個sales姐姐喊啦,因為佢想買個可愛d的Hello Kitty但係就買唔到啦....Wooo...


真係傻妹嚟架...今時今日五歲的小朋友都仲可以咁天真已經好少見啦.


今晚走的時候,佢仲約我長假期的時候去佢屋企過夜添.唔知復活節得唔得呢?

我自問

呢排工作,日日做到冇停手,但係連午飯時間都要見老細,無啦啦有餐午飯食,咁都好呀,有免費午餐,不過對住"生補"的人就唔多講嘢,悶悶地...自已食,休息多d仲好過.


我好想快d做完今日要做的事,點知趕頭趕命之餘仲要傾續約的事,我一d準備都冇,同新老細講講下佢就提到年紀問題...原來佢真係估細咗我幾年...佢成日話"睇你個樣唔似"....


咁究竟個"樣細"有乜問題呢???

好攰呀

呢排冇覺好瞓,有一晚仲要改篇唱"等"呢首歌添,返到屋企又冇得好好休息,第二日又再返工.


我快要死啦....


天呀...我需要一種特效藥...我很頭痛我很煩惱....回憶最好通通忘掉....


瞓瞓瞓....唔瞓得著?!

吻別的位置

這三數日 隔天見面
怎麼共你 細數幾年
.... (克勤演唱會延續篇 .... ?!)

同你傾咗好耐,聽到你的事,真係覺得你真係長大了.


臨走時,本來只是想抱一抱,碰碰面,估唔到竟然會"鍚鍚"添.好warm...好耐都冇同你"吻別"啦!


好開心同你傾咗一晚.

世界末日的早上

btw,打下呢首歌先...雖然歌詞...呢個作詞人通常都有d怪怪地的字嚮中間,不過意念新鮮..


世界末日的早上 - 克勤
想聽呢首歌,按這裡再按上面Play掣



世界末日的早上

曲:阿卓 詞:... 編:褚鎮東

我 頭髮梳理整齊
還剃好了鬍鬚
隆重的打上黑色的呔
我 拿著一扎紅花
沿著空曠長街
沉默的走過 黎明和日出
來到這荒廢超市內
攜著你平時喜愛蛋糕走過來
送達你的家裡 盼望門一打開
有一聲喝采

過幾個小時 即使一切倒下
還是想抱著你一起怕
趁尚有一口氣抱緊起舞吧
聽著一街警報聲來伴舞吧
到終結之前 假使很怕的話
還是可以為你講笑話
浩劫中躲不了 但我至少可跟你
含著笑的告別繁華

聽 何事苦難情景
還有手電鈴聲
遙遠的好友 相繼告別
聽 誰在家裡嚎哭
誰在家裡狂歡
而我只需要如平時幸福
和你依偎這沙發上
如渡過平凡的假日一般正常
揭著那天跟你旅行時的彩照
你喜歡哪張
過幾個小時 即使一切倒下
還是想抱著你一起怕
趁尚有一口氣抱緊起舞吧
聽著一街警報聲來伴舞吧
到終結之前 假使很怕的話
還是可以為你講笑話
浩劫中躲不了 但我至少可跟你
甜蜜到死也沒記掛

過幾個小時 即使一切倒下
還是想抱著你一起怕
趁尚有一口氣抱緊起舞吧
我為你哼首愛歌來伴舞吧
這幾個小時 即使間太短暫
還是可以下嫁給我嗎
直到死不分開 讓這世間的終結
停在這種美麗年華

克勤演唱會

噚晚同Mabel,樺爾,阿Dee同媽媽一齊去睇克勤演唱會,今次又有新搞作,係一個櫻花形的搖鼓,未正式開場就玩呢個搖鼓warm up,跟住打拍子,打都hot先開場.

唔知係咪呢場係本來的尾場,加上噚晚又有錄影,觀眾都好投入,原來鼓聲節拍就係第一首歌"夏日之神話"的beat,真係好好玩,好好氣氛,跟住又有搖鼓人浪,克勤又轉凳,好型,真係估佢唔到.今次佢仲跳咗好多舞,真係有好大的進步,好明顯係有畀心機佢學架.佢仲自彈自唱咗一段花落誰家添,真係好大的突破,good try...


成個show加加埋埋唱咗三十幾首歌,仲有幾首fans好鍾意的歌,


"十年前後"...上次冇唱,今次唱咗,但係點解好似少咗d嘢咁呢?原來係冇咗小提琴聲...唔緊要啦,都ok呀.佢今次唱"我不會唱歌"唱得好好呀...讚!


當聽到"世界末日的早上"真係喜出望外,不過佢就唱錯咗兩個字,我同阿Dee因為太熟啦,相視而笑...其實佢都唱得好好架.不過到後尾佢唱到"一個人飛"果陣走音,見到克勤自己都搖搖頭,我同Mabel見到都戥佢唔開心呀.整體來講真係唱得好好呀.唔好搖頭啦...


估唔佢會唱"大時代",之前聽呢首歌都有想象克勤的演唱點夾呢首歌,本來只係一首好普通的歌,原來夾起嚟都幾好呀.之後又有同"假人小剛合唱"歲月風雲",又有同靚女高妹跳舞,好搞笑,真係幕幕高潮.唱住"小寶寶"又播佢個仔Ryan的相,真係好Cute,呢個係13號亂咗rundown之後冇播架.唱完呢首歌,唔知克勤係抺汗定係抺眼淚呢.


結尾的"命運符號"同"好戲之人"的melody就跟住我返屋企,不過返到屋企竟然想起古巨基的歌..哈..

兩個人的生日會

今日好開心同Mabel,Pui Yee, Giny, 一齊慶祝Iris同我的生日,第一站Outback,第二站到我屋企,幾乎全程不斷食食食.

Mabel仲買咗個好可愛的米奇芒果蛋糕,我同Mabel,Iris對住佢猛咁影,要影返夠本先放過佢.



之後仲有我第一次整的腐竹雞蛋糖水,其實一向都唔好食糖水,所以連D好基本的糖水知識都冇,只係知有腐竹同雞蛋,白果我又唔食,所以想用豆腐代替,不過最後都冇落到.因為我買錯咗一d鮮腐竹,所以要滾耐d先得,好彩有幾位高手敎路,原來要將腐竹滾到散哂先叫做Ok,加咗幾隻白烚雞蛋同冰糖就搞掂啦.不過我一向都唔喜歡太甜,所以味道就應該淡咗好多,希望下次會好d啦.


今日好忙,夜晚仲要去睇克勤演唱會添.

攞命情人節

其實情人節呢d商人"煲"出嚟的日子真係好唔想中計,不過,就當係一個機會對下佢好d,呢排成日OT,乘機早少少收工咁都好丫. 於是ghost又叫我快d走啦.


平時成日出街食,可恨呢類日子,連出街食都要搵位,仲幾搵人笨.既然早收工,就自己煮好啦.


幾乎成一年冇煮大茶飯,買起餸就最頭痕,之前見Kathy介紹的菜式好似幾好咁,雖然未試過煮,膽粗粗就試下啦.


買買埋埋一大堆....



結果就有加左料的羅宋罐頭湯,同煙腩肉露筍卷拌意粉,另外再加一碟菜,味道都似返出街食.



不過煮咗成個幾鐘,真係好攰,最攞命係食完大把嘢洗!

新年先嚟執屋

哈哈,呢排因為好忙,本來以為早兩個星期可以執屋,點知每次都係執到一半就停咗.搞下搞下,搞到新年先真係有時間執屋.

呢幾日準備咗個環保全盒,因為冇去買全盒,所以就搵咗樺爾以前送的禮物盒做全盒,好簡單,倒哂d糖入去呢個心型盒就搞掂.裏面有Hello Kitty糖,可樂糖,姆明糖,super lemon "酸到喊",珍寶珠,加埋Berry一粒抺茶糖(搵得到就奇),仲有Kathy送的鴨腎,咖啡粉做背景,一對Bear Bear 做前景,好似糖糖浴池咁.



買唔到合心意的揮春,索性就唔買,不過早兩日總算搵到幾個新的"咕o臣"套,免強有少少新年的氣氛...