蘭香園

今日冇乜點咳啦,身體都恢復.總算可以出去走吓啦.


今日同樺爾去咗荃灣一間有"茶餐廳特色"的茶餐廳,雖然我哋本來唔係想去果間,但係太多人啦,所以我哋去咗佢隔離的一間...蘭香園,不過同樣都係咁有特色架.(其實樺爾之前果晚本來都想去呢間,但係好早收咗冇得食.依家有位,所以就入咗去.)


入到去,都差唔多有十多張檯,又差唔多坐滿.我哋要咗一個常餐,一個午餐.伙計全部都唔洗寫紙仔,用腦記住就得.你叫的餐,好快就按次序出場,先來一個油多,奄列蛋,叉燒湯意.


我哋仲有個餐肉通都未嚟,本來只係想同個伙計要兩杯滑奶茶先,個伙計就己經好醒目咁知我哋仲有餐肉通未到,叫廚房即刻做.佢哋會用心記住你仲有乜嘢仲未嚟.講真,伙計的年紀都有四.五十咁上下,但係記性仲係好好,呢個就係日日訓練的成果啦....(之前去過好多間有好多後生仔女的食店食嘢,成日到遇到好多跟單跟到甩甩漏漏的人.你話呀,年齡歧視係咪對好多年長的人就業都唔好公平呀!)


我慣常動作都會用杯茶沉著d刀刀叉叉,唔知係太餓的關係呀,定係未瞓醒呀?我只係攞起枝叉,就失咗平衡,成杯倒瀉...真失禮 -_- "你咁放d刀叉一定會咁架",另一個伙計即刻過嚟搶救.真係好體貼.佢哋好似見怪不怪,呢度的刀叉真係夠份量喇.Fish~~Fish~~


食物方面,除咗個餐肉通之外(因為我一向都唔喜歡通粉),其他都幾好,油多真係幾多油架...(睇嚟又要減肥啦...)至於奶茶仲有細杯同大杯之分,最適合我又想飲,又怕飲太多的人喇,讚!


坐坐吓,仲見到有八個著住白鶴派的功夫衫的人入嚟食嘢,好似返番六七十年代咁.不過佢哋的頭髮造型都係新一代"飛仔"型.唔打得都嚇得.都係我d詠春師兄純品d.


忽然又發白日夢,你話我的三腳貓功夫對佢哋的白鶴派會係點架呢?哼...師父話要深藏不露架.


聽到有個人講要少茶多奶的奶茶,就覺得呢個地方好似好親切咁,因為佢哋可以為你做到Customise的要求.
不過,唔知如果你埋單的時候講後數,佢哋會唔會好親切咁搵"倔頭"掃把攆你走!