又係整機

終於有假放,好開心,本來想執屋,點知四家姐又話哥哥返咗屋企,個個星期唔係呢個返媽媽度,就係另一個,個個星期都想見佢哋....d細路,個個星期都鬼死咁唔得閒.


但係去到其實係要去整四家姐部電腦...冇乜點同君君,羨寧同啟賢玩.啟賢成日"眼仔碌碌"對相機鏡頭好有反應.又成日笑,成日蹦蹦跳.今日阿妹羨寧講多咗嘢,入咗四家姐房到搞咗一輪,佢又問四家姐張檯上的嘢,又搞Keyboard,又搞電話,問吓個笑臉公仔係乜,又問個2000澳洲奧運Memo紙鎮夾係乜嚟....係咁問係咁問.比起之前好cool的阿妹,今日大個女啦.


今日唔知係唔係做錯咗決定,之前樺爾有一個公司送的Bear Bear公仔,我仲記得君君之前都鍾意bear bear所以轉送畀佢同阿妹玩,點知搞到君君同阿妹爭著攬,令佢哋不和.


嫲嫲平息呢件事的方法都幾得意,叫羨寧同君君猜包剪錘,五盤三勝,贏咗就玩先,君君猜包剪錘幾叻架.所以就贏咗喇.


我都同君君猜,但係君君同我猜到二比一就好似唔敢猜落去,因為我再贏一舖,佢怕我攞咗佢個bear bear公仔.唔知佢係唔係咁諗呢.


阿妹其實幾奸架,佢見君君同我猜緊,佢已經襯家姐唔覺意搶咗過去.但係君君都係大力d.都係佢攞返.


呢個時候都係要媽媽調庭啦,點知蘊德一叫君君,君君就話:"你都係想講我蝦阿妹d嘢咋嘛!"


舅父都忍唔住話咗君君一句:"你都知你蝦呀妹咩!"


其實君君係幾純真,其實知自己唔啱,但係想要的嘢就要攞,明知自己要同阿妹分享,畀人話,就會走開邊喊.

************

佢哋走咗,我就繼續整電腦.樺爾都己經好有耐性咁等我,但係我搞得太耐,搞到十一點半先走,佢都有d餓,走咗去7-11買嘢返屋企食添.佢仲好搞笑,扮瑩瑩講嘢:"貓貓要搵嘢食!"


我知,其實佢好眼瞓,但係我搞好耐都唔肯返屋企,佢又嬲我唔落.


嘿...下次唔敢啦.哎...唔通真係要換底板?! 真令人氣餒 -_-