家中方一日

今日一早就去媽媽度,一來想陪媽媽去"掃墓"(其實好乾淨,冇乜好掃架咋),二來可以飲媽媽涼茶止咳,三來可以見吓d BB...唉...好彩爸爸媽媽唔會睇我個Blog唧,如果唔係睇到都幾心傷,數來數去都冇話係為咗睇佢哋呢.


點知哥哥一返屋企,掃墓都唔去住啦.


今日哥哥一家都好早到,因為佢哋下晝要去君君同學仔的生日會,所以過嚟兩個鐘又要走啦.


今日見到啟賢好精靈,成日笑,好可愛...佢個樣扁扁咁,好鬼得意架.有d似金庸,不過都係君君細個似金庸多d...


之後,蘊德抱住啟賢同哥哥一齊睇書喎,啟賢佢就"碌"大隻眼,眼仔碌碌咁睇埋一份,好似好緊張咁添.係咁望上望下,好以真係打直咁睇緊本書喎.仲個嘴好似想讀書咁.蘊德話,原來佢成日都咁樣陪蘊德一齊睇報紙架.


君君依家就好似個大家姐咁啦,似模似樣架,又好錫細佬,錫完細佬又去錫羨寧,好公平架.


今日君君話我知原來爸爸懷疑羨寧佢肚仔生蟲,所以咁瘦,帶咗羨寧去咗照超聲波,我就問羨寧有冇蟲蟲嚮肚入面,佢就話,"有三~~~~~條呀~~!!"君君竟然話有成一百條喎!都唔知佢哋講的係真唔係.不過就冇理由有成百條蟲蟲都仲可以咁好地地咩.君君依家識講笑啦.


佢哋走咗,二家姐同雯雯先到屋企.雯雯病完又瘦咗.仲咳咳添.


今日同往常一樣,要扮做雯雯的學生.佢好耐冇返婆婆度,見到有個琴就即刻要扮老師教同學唱歌喎.


唱咗兩首唔同的歌,但係我就學唔到,因為唔係好留心喎.


雯雯真係人細鬼大,學老師的動靜真係學到七八成,我都知道佢老師會點講嘢喎.


玩來玩去都係扮老師,好悶架...我唯有又做壞學生啦.


"老師,我病咗呀,我想瞓覺" "你都要做功課架~唔可以 ....."


最頂癮係:"你媽咪畀錢你讀書,你唔讀就冇啦,你咁樣,我都冇扮法教你...."


睇吓,咁樣教書,唉...其實李國章如果真係有Heart既,整頓一吓幼稚園的師資同教育質數,都未嘗唔係一件好事.


呢個雯雯呢頭仲同四姨玩緊,錫錫,果頭就撲咗我度,瞓著咗,好似機械人忽然間用哂電咁.停咗喎!


今日知道雯雯下個星期開始要做四眼雞丁添...唔知呢...唔通佢真係想做老師,連個Look都要似?!


真係怕佢唔係暫時矯視,不過又五、六百度遠視又有近視,仲有150度散光,乜到齊,唔知要佢矯視,係唔係一世都要戴眼鏡呢...


食完晚飯先走,咁又一日啦.