半天家庭樂

今日抖到10:xx am,三家姐又搵我,話接我一齊去同媽媽飲茶,奇怪啦,好似咳少咗.


因為係勞工假期,又好多人會拜山前後去飲茶,所以今日茶樓特別多人.我哋都唔係Full team上陣,所以都算快啦,半個鐘到就有位.


之前同媽媽,三家姐&姐夫,瑩瑩一齊去過呢間茶樓幾次,有個點心阿姐好鍾意瑩瑩,成日話佢好得意.今日就企咗嚮我哋張檯附近到聲瑩瑩講嘢.啱啱就講緊拜山,瑩瑩就係咁話:我要去拜山呀,我都冇去過拜山既,Daddy我要去拜山呀...


Daddy真係畀佢笑倒.都話一個月之前已經去拜過山啦,但係瑩瑩就好少理..."我要去拜山呀~~~~"


好在我哋百無禁忌唧.


返到屋企,哥哥同大家姐陪爸爸去掃墓返到屋企,傾咗一陣計之後哥哥同媽媽就入屯門.


瑩瑩又繼續做笑蛋.佢畫畫真係好有新意,唔會畫來畫去都係同一種樣,三家姐話之前見過佢畫"靚仔"一定有酒凹喎.


咁瑩瑩就好乖咁畫咗一個嚮廢紙度.睇過,又真係算一個靚的男仔喎!佢畫完,舅父仔啱啱行過嚟睇,仲話呢個靚仔係舅父仔嚟架!人細鬼大,咁鬼識搞氣氛,十足十佢媽媽.


四家姐當然就唔會放過,叫佢畫多個嚮畫紙度,想留低佢啦.


點知瑩瑩好似唔鍾意畫重覆的公仔,佢就晝咗另一個人,不過就畫咗8字鼻的男人喎,當然唔係靚仔啦.


之後我哋叫佢畫多個女仔,佢畫畫吓就畫咗個曲髮的女人,但係又係8字鼻喎,佢就一指話:呢個係媽咪!講完自己都係咁笑...(三家姐當然係滴緊汗啦.)


咁佢又再畫多一個男人喎,今次就畫個粗眉的大男人,仲猛咁點嘴邊的位置,又指住佢話:呢個係我Daddy!


想叫佢畫個靚女,點知佢忽然畫咗個v字眉的女仔,佢指住個公仔話佢好嬲架,(嘩,可以表達情感,咁利害!之前睇外國有關兒童成長的節目,好似d小朋友要四五歲先掌握到喜怒哀咋.)


我哋講笑咁話,嘩乜咁邪惡既,點知瑩瑩講咗句仲奇:"君君好邪惡架!"唔...佢同表姐唔係咁Friend,但係都未至於咁講架...小朋友,表達的方式都幾直接.佢哋就唔會知乜叫做表姐妹,只係會知邊個可以搶到佢的玩具,邊個之前蝦過佢.唔通瑩瑩真係唔妥君君?!呢個公仔的高度都幾高,唔知係唔係以大欺小的象徵呢?


咁我哋就叫佢畫自己啦.佢畫咗個細細地的公仔,今次有個髮夾,佢今日戴住架.好貪靚架佢....真係可愛.


三家姐叫佢,咁雯雯呢,你畫個雯雯呀...佢又畫另一個同佢差唔多高的公仔,三家姐問,佢會唔會同雯雯手拖手架.咁瑩瑩就畫咗一條線喎.就好似雯雯伸手拖佢咁.


佢畫的公仔,可能都係我哋引導之下畫既,都唔可以作準,但係見到佢畫畫都好有心機.真係好有創意.加上佢真係表達到意思,真係好叻叻架.


如果唔係病病哋可能真係跟佢哋一齊去"冒險樂園"玩,不過,都係下次先啦.