北京之旅(二) - 新北京面面觀

北京好多景點都嚮市中心,今次一行六人之所以跟康泰旅行團,都係因為機票好full,自由行的時間晚機早返唔化算,所以最後都係決定跟團,不過原來時間的確用咗四日,但係去咗的景點其實兩日半都行完.酒店己經唔近市區,每日走相同的路返市中心,遇著北京近幾年慣性的大塞車,半個小時的路程要花上一個多小時.行程安排來來回回幾個地方.見到又返回郭沬若故居幾次,都會有d唔耐煩.


不過有失都有得既,四天的時間當然無辦法行哂成個北京啦,今次遊覽,遇到一個幾有文化,又有背景,有親身經歷的當地導遊邵彤(阿邵),係個高高大大,身長6呎3吋,能操流利廣東話的北方人,離遠都可以望到佢,唔會點走失.不過佢行一步,你要跟兩步,好在我哋都跟得切,但係都唔係成日聽到佢的介紹.加上個笑聲同豬叫聲相若的領隊,大聲講話多次騷擾我哋聽書,都幾討厭.


跟團呢幾日,阿邵講咗好多好多有關北京的新政策,當中有幾項值得一讚 (唔知我瞓吓瞓吓有冇聽錯聽漏):


1. 老有所好
老人社區中心教導老人家做運動,寫書法,放紙鳶對手、腳、頸、膞都可以得以舒展 (搞到我都想買隻紙鳶畀爸爸添)


2. 老有所養
老人社區中心的經費原來唔駛由國家支付,活動的經費原來由賣彩票得嚟.每次派彩都有一個人做五百萬富翁,其餘約一半收益用作經費


3. 有產階級
以前的政策,工人的工資會扣除所有生活開資,先再發工資,所以有"做又36,唔做又36"的講法,但係依家已經唔適用啦.幾年前政府賣大包,兩三萬就可以買返自己的物業.於是人人都有自己的財產.咁樣做人先會有意欲上進,而唔係貪圖安穩架.


4. 五花八門的奇招
走在北京市大街,感覺到異常清潔,比想象中真是差天共地.雖然偶有飛箭的痕跡,整體的市容相當不錯.
如果有人放飛箭,加重罰款已經無效,因為北京人已經有錢起來,被捉住,竟然可以買多個放飛箭機會!(講笑咋嘛?!)


奇招:被找著放飛箭的人要站著直至找到下一個放飛箭的人!


5. 傭工條例
$500可以請個為你買好餸等你返屋企,個半鐘煮好晚餐的傭人,洗埋碗又唔駛留宿,唔駛支付工人的食宿.一家三口一餐$16.6平靚正!幾好!!!


6. 綠化果園

綠化市區之餘,原來所種的多數係各種可以收成的果樹,銀杏,桃樹,水蜜桃等等,由打理樹的工人享受收成成果,每月收益和自己的努力相符,種瓜得瓜,種豆得豆.妙!


7. 希望工程

教師想升職,去希望工程做兩年義工先可以有升遷條件,絕!


好眼瞓添...明天續.