我可以玩電子琴啦

今朝約咗Mabel的同事(肥Charles)要去佢屋企搬個電子琴,唔好意思遲到,所以好早起身.原來由荃灣撘地鐵去將軍澳都只係用咗~1:15咋喎.


去到肥Charles屋企,見咗佢老婆一秒,都冇見到個小朋友,就嗱嗱聲搬個琴走.因為好唔好意思,所以都象徵式封咗兩個細利是話畀個小朋友買嘢食.


肥Charles都好健談,又好人,幫我哋搬走,幫我哋借板車,陪埋我哋等車嚟.仲有佢得著一件短袖衫就陪我哋走,得十五度,又大風,佢真係好唔話得.唔知佢會唔會覺得好唔抵呢?因為佢之前好似話想放二手,仲有親戚出價同佢買,不過佢都係選擇送畀Mabel的朋友喎.真係要多謝Mabel,不過呢...點解佢會知我中文名既?佢叫我,我都幾意外架.


撘車返到媽媽度都只不過係12:00,真係快手.個琴真係好新,係有上下兩層的電子琴,又保養得好,不過我就仲未知點彈琴,仲有好多掣,唔知點揀先可以同上下兩層出同樣的聲.好彩肥Charles話咗個型號我知,上網就搵到說明書.(睇嚟,我又要研究一陣啦...)


如果唔係Mabel,可能我仲要十五十六唔知學唔學琴好.睇嚟,我要認真嘗試吓彈琴啦.希望我唔係三分鐘熱度啦.