服兵役

去到媽媽度,當然又係留嚮度食完飯先算啦.今日又見到三家姐同瑩瑩,瑩瑩又肚餓,又病咗,加上眼瞓,佢就唔係好乖,仲成日用命令人既口吻同你講嘢.


我見佢肚仔餓,話炒蛋佢食,佢就好惡咁講"我唔鍾意食蛋!".


又叫媽媽唔准嘈住佢彈琴.真係冇佢收.不過佢瞓醒覺,完全正常番啦.


食咗午餐,阿Dee都返咗屋企,想同佢傾吓計,不過爸爸又要我幫佢做嘢....整理佢個中藥檔案.


爸爸見到我同三家姐唱K,就成日逼我,要我幫咗佢先,就好似軍訓咁,好似服兵役....其實要做佢d嘢要靜靜哋咁做,咁嘈都冇心機做啦...不過爸爸叫到,佢話"你有時間玩,但係我冇幾多時間"....聽到真係有d心酸,其實,我都好對佢唔住,因為成日都唔返屋企,佢想有個人幫吓佢都冇.我就掛住玩唔理佢喎.


三家姐走先,咁就好啦,可以開工同爸爸做嘢.我唔想樺爾留低浪費時間,咁就叫佢走先啦,(點知佢走咗去搵Jacob貓畀瑩瑩喎.不過都未搵到)


爸爸好鍾意講,佢做就要做好耐,我做就一陣間.其實只不過係狂Set Font & font size,都冇乜話邊個做快d囉.因為佢先清楚乜嘢打乜嘢嘛.不過,爸爸督促之下,最終都做完啦.真係好啦.


爸爸同我講佢,話唔知可唔可以去讀中醫,去考試呢.唔...其實爸爸的心願一直都係去讀中醫.佢想完成,當然好啦.如果可以,我真係想陪佢讀.不過,要放幾多時間先可以讀得識呢?中醫的理論真係幾奇怪架.又要識五行,又要識氣候變化,仲要知好多藥.我自問就唔係咁有恆心.可能幫爸爸搵吓料先啦.


就好似我自己,其實好想學音樂,唔知係唔係又要老咗先有時間,但係老的時候又怕時日無多呢.


就係咁,我又留嚮媽媽度食晚飯嘞,我好乖呀,我去洗吓碗,媽媽又開心.雖然咁又花咗一日,但係都係好值得既.