今日又去見瑩瑩

呢排成日見到瑩瑩,皆因幫三家姐個新 set 既 Router 唔知做乜鬼上唔到網,再上去望一望,承機又有多次見吓瑩瑩的機會啦.我想樺爾去見瑩瑩仲比我興奮,佢早過平時放工,7:00咁上下嚟接我,撘地鐵再轉西鐵,去到元朗都係七點九!快!

撘緊車,瑩瑩就打電話嚟,同我哋講:"丹丹姨姨,我今日捐錢呀!",我好意外,就問"捐錢畀邊個呀",佢話:"捐錢畀D小朋友呀,佢哋冇水水飲,好慘架~~" (唔係係呀嘛,邊家自願機構咁"冇蔭功"向小朋友埋手架)

入到門,瑩瑩就第一時間攞住個unicef盒,叫我哋捐錢啦,瑩瑩今次講得冇禁有文有路,我仲同佢錄影添.

樺爾話咁快就幫三家姐 Set 返好個 Router,好啦,見你咁好,就好好報答吓你啦..嘻嘻.今晚同你一齊玩NBA啦.

其實去三家姐屋企,通常都會去埋佢朋友Edmond屋企,佢的朋友煮嘢食,好過出去食.我哋成日都佢嘆佢的手勢.點知今日Edmond 切親手,煮得比平時慢少少,阿加斯都有嚟,仲整咗佢最嗱手的"三色蒸水蛋"添,不過同三家姐掛住玩PSP Golf 對戰,唔記得較時間掣Alarm,搞到唔知蒸咗幾耐,失咗少少手添.不過食落都好味美.

今日有泰式冬蔭功"聖旨"(點寫架) 6_o?? 有香葱大蝦,齋牛肉(好好味),魚啦,仲有青紅蘿蔔湯等等.
瑩瑩就同阿加斯鬥快食,成日講,"我快過你呀"
食完飯就成日扮個PSP Golf 叫人快d 的說話,叫樺爾"Hurry up",但係又唔叫樺爾喎.
之後我同佢玩"小明",同佢猜拳,佢好似明明地點樣玩"包剪搥",我教佢"包住你個搥","搥爛你個剪","剪爛你個包",佢都知道點叫做贏點叫做輸,但係佢就冇意識到呢個循環關係,我同佢話"包住你個搥",佢只係識做出嚟,其實對於個三歲的小朋友都算好叻叻架嘞.
玩玩吓瑩瑩又攞樺爾個背囊玩,仲Fing嚟Fing去,我拍Video畀佢睇,佢笑到收唔到聲,好High,之後又扮佢本書入面的 rabbit 捧腹大笑,後尾阿土打佢Pat pat 話佢唔乖,佢就抱著樺爾的大腿,就話"我要 O 住你",哈~呢個講法都幾新鮮! Edmond 叔叔成晚掛住煮嘢食,見到瑩瑩成日黏住樺爾丈丈,就呷醋喇.我叫瑩瑩快 d 去氹返Edmond 啦...6_- 其實我都呷醋架喎...咁邊個走嚟氹返我呀?
時候都唔早唯有走人講Bye bye,瑩瑩一邊話唔捨得我哋,但係又一邊攞我哋的袋畀返我哋.
今日見到的瑩瑩真係好可愛,佢會講d好得人鍾意的說話,好似"我好鍾意你同我一齊xxx","我開定門等阿加斯你架",佢見到Edmond 叫的Technician 入屋幫佢整機,見果個人走,仲話"我肯同佢講bye bye!"
聽到都開心,如果佢唔係聽日要學英文,我留嚮三家姐屋企打地舖再陪佢玩多日都願呀.