今日放假探姪仔

本來都想打吓我今日一齊去探吓姪仔的事,但係又忍唔住入咗佢哋的Blog,見到阿Dee同四家姐都寫咗好多關於姪仔的事,我想都冇必要多提啦,不過我今日就充當個實地記者,目的就係去拍吓Video 同影吓相,得到既第一手資料,冇理由嘥咗佢架,咁就係咁易Post吓相啦.睇吓佢個樣,嫲嫲就話佢個樣似君君,我當時淨係掛住影,好隨意咁答嫲嫲.佢媽媽蘊德就話佢有"酒凹"不過就唔同佢的阿dee叔叔的dimple.三家姐就話BB的頭髮真係多.

第二幅相就係大家姐君君幫佢的爸爸媽媽同呀妹影既相,幾叻,君君大個女啦!
我哋一行十幾人來來回回幾次出出入入個ward,連蘊德都出入個Ward添...喂,聽講做完手術生完都係唔好咁快行喎...唔通我哋的大家姐真係咁好手勢?!第二日就行得,勁!
今日二家姐又冇嚟,所以好乖的雯雯都冇得見添,其他的 BB 就唔係好乖,皆因個大姐姐君君帶埋兩個細的(羨寧同瑩瑩)一齊玩,追追逐逐,叫極都係停一陣再玩過.咁我又影呀影呀,影吓又畀吓佢哋睇,羨寧見到君君同瑩瑩霸咗個有利位置睇相,就插住袋,一副漫不經心,冇心所謂咁走咗去,其實佢成日都係咁禮讓的.
探病時間得一個鐘,我哋咁多人,每人都係睇咗蘊德同個BB一陣,不過,我出出入入的次數就最多,因為我成日嚮到影相.D姑娘原來唔係叫人去架,佢哋會用個"叮叮"叮走我哋架,唔通見到克勤叮人叮得咁過癮佢哋又係咁,可能呢個叮叮係最唔會騷擾到 d BB 呱?講起呢樣嘢,瑩瑩就用一隻手扮個叮叮,另一隻手就扮拍個"叮叮"同我哋講"佢哋係咁叮叮叮叮叮"呀...
臨走喇,蓋蓋丈丈就對君君講:"你做大家姐啦,之後要好做個好榜樣啦",君君就無啦啦一時感觸喊咗出嚟,嘩,原來咁細個都明白好多嘢架啦,唔通佢真係嚮到感懷身世,以後又多一個人同佢爭寵啦.

我都未知姪仔叫乜名,尋日同樺爾講起話姪仔係"齊"輩,要用有關個"齊"字的名.
諗又諗唔到,忽然又想起哥哥話要改個多個三個字的名,四、五個字的名,最好就有別名,咁我就諗吓...哥哥以前好鍾意的"方天畫戟"唔知可唔可以做名呢...又想吓"方失失奇兵"都唔錯喎,唔或者"方圓五百里"呀...(今日同三家姐講,三家姐都諗到呢個喎!)...改D咁既名都真係"方天下之大謬"!

去完探BB就跟咗去睇三家姐的新玩意.個wireless router就好快搞掂,但係個so call 的wireless webcam monitoring system 就真係搞到一頭霧水,Hareware 話咁快駁好,咁啱四家姐就打電話嚟話去唱K,我仲叫佢哋要間大d的房等我哋添.點知要將個Cam capture的影像放上網就整極都唔得.打咗電話問個sales,個sales仲老點你,叫你set個錯port,跟instruction玩咗一輪都冇起色,唯有唔跟佢,我哋有我哋試,於是乎就用我哋想當然的方法再試,過咗一陣,樺爾就figure out 到咩問題,原來要用返Port 80,嘿...咁寫乜鬼叫人開Port 6000, 同9001呀!再試一陣,又發現好似只係within same network 先得.點搞架...唯有出動 Edmond 的手提上另一個 Wireless network 再試吓睇唔睇到,點知佢平時可以嚮三家姐屋企度上返自己Network,今日又唔多work,唯有走去 Edmond 屋企又玩吓佢的Mac 機(仲有iPod Nano,仲有 PSP添),一試就見到個Web上高的IP Address 竟然同樺爾set的唔同,唔怪之得個DNS map 唔到 IP...哦明啦...咁所有都通啦!
其實我就覺得三家姐安裝呢d嘢都冇用,如果你請到個唔好的女傭,有冇都係一樣...最差的一樣嘢係,話就話唔駛駁電腦,但係個Wireless 其實都要駁住一對Power Network Port socket,都係要lung 個 socket,咪又有電線!...wire乜鬼less啫.
今日見到瑩瑩好用心咁"油顏色",三家姐又畫老鼠,又畫青蛙,又畫蛋蛋畀佢油,佢油油吓就楂住同我哋講佢油d乜,之後我又同佢一齊油,佢見我三兩吓就油完,就命令我話,"你唔好油咁快啦~"之後佢又油樺爾畫的小公雞,佢本來都油得好好地,點知油油吓過咗火,用咗黑色嚟油,變咗冇頭雞!佢仲笑喎!
搞個Wireless cam 到嚟,都食得晚飯,瑩瑩就話要"油顏色",點都唔肯一齊出去食,冇計啦,都唔知係唔係個咀妙妙的"印印"教佢咁講.食到咁上吓,瑩瑩打電話同佢媽媽話佢發夢呀,夢到"油顏色",油緊啡色喎...(唔通係... s...)發夢都掛住油,真係油上腦囉!