阿丹停驚夢

呢排成日發怪夢,試過發夢我同四家姐要去打扙,打打吓我話要返工,之後去咗個好落後的工廠,好似d塑膠廠咁的地方(梗係媽媽成日同我提起佢細個"屈針仔"的地方,加埋我的聯想力而成的地方喇),去到又話打到嚟要走難,我同四家姐就失散咗,好傷心.

另一日發呢個夢仲離譜,我同樺爾生咗兩個BB女,一個黑一個白...黑白配.真係唔知係好夢定噩夢!

今日時間多,一次過發咗好多個夢:

世界末日:見到一張報紙報導咗世界各地的災害,內容就唔多清楚,但係醒番之後就成日諗起"阿拉斯加"...應該唔會係因為成日去旺角果間夏雪日本料理成日食的"阿拉斯加卷麵餐"所至呱?!

我去到 City U 後邊近"香島中學"同"又一居"附近竟然見到多一條路通向後山,我由後山行出嚟見到媽媽嚮對面街行返大坑東方向,後面仲跟住一個菲女傭,我想追又追唔到之後,我的同事Kelvin仲同我講話我媽媽後面跟住個菲傭垂頭喪氣咁古古怪怪,之後我哋就去到一個地方要爬一個有彈性的螺旋樓梯,飛過去另一邊先可以返City U,樓梯下面係深谷.我雖然好驚但係又唔可以唔行喎,咁我就爬落去啦,爬到底飛過去真係好驚險,因為條樓梯彈彈吓要啱時間先放得手!我去到對面手軟腳軟,好彩Kelvin幫我扯我上去...(明明我過先架???奇怪)

之後返番去讀書,要去廁所搵好耐都搵唔到(呢個時候我其實應該要醒啦,因為又去到要搵廁所的橋段...嘿嘿)見到有好多人去學校診所食營養餐,個護士話要通過呢d人再去到可以"丁"飯的地方先可以搵到廁所,我行得太耐已經唔想去!嘩咁都仲未醒喎,仲唔嗱嗱淋去廁所?!

之後又再發夢,又係夢見四家姐,嘩...佢同我變咗男仔!!!...好人嚇人的一件事,前面咁驚嚇驚險都唔醒,就係呢個夢,醒啦!