遊後記 - 之一

今日出發去上海,樺爾就去剪髮,我就去買小小嘢同返媽媽屋企度見吓爸爸媽媽.只係買咗個媽媽最鍾意食的叉雞飯畀佢食晏,逗留咗一陣見媽媽今日好似好d,咁就走啦.
出發前竟然見到老師...哈應該係阿聰未來老婆蓉蓉先啱,仲同佢打吓招呼添...原來佢要做facial.

坐A31用咗45分鐘就去到機場,見到個集客隆領隊鬼鬼祟祟咁...都唔知咁驚做乜,賣團體飛都唔係犯法架~？
見有時間就同樺爾睇吓機場有乜野賣啦,哈,點知畀我見到三sprit 有50% 特價喎,仲見到Nike都有添...嘩,樺爾就買多件藍球背心送畀佢表弟,我自己又買兩件,我買咗我好鍾意的橙色Tee,$49 咋!不過另一件就原來太闊,我以前就啱...而家就鬆咗d.
樺爾去 counter 畀錢,個收銀員竟然好疑惑咁用好唔肯定的眼神望住樺爾,仲攞起個計數機打個銀碼,再同佢用英文講幾多錢...哈,佢以為樺爾係日本人頂啦...我就同樺爾講吓嘢,個收銀員先好唔好意思咁用返廣東話講嘢.
唉,入到東方航空的機艙,見到架客機咁細,不其然有d驚驚地...起飛降落都好似唔係好平穩咁,好彩都平安到達.
一出上海蒲東機場,我仲比樺爾先認到佢的舅父(juju),舅父真係太客氣,買咗一束花送畀我,原來今日係農曆七月初七,中國情人節,我當然到舅父家就第一時間代舅父送畀舅母(juma)啦.
舅父接我們到蘇州,兩小時多就到他們家了,那時已經差不多12:00am了.之後就睇吓我地的結婚相,雖然佢地一路的對話都係蘇州話為主,所以好多都係聽唔明,又或者估估吓,但係舅母的讚美說話,就絶對聽得懂,哈哈!反應就只好...傻笑6_x.
沖完涼就瞓.佢地仲讓咗佢哋張床畀我地瞓,自己就同都已經大個仔的仔仔一齊逼響一張五呎床度!如果唔係改咗行程,我地就唔駛舅父佢哋咁辛苦啦...舅父怕我哋哂錢,仲叫我哋繼續住添.好彩之後幾日我地都訂咗酒店唧.