貓弟弟廿一歲啦

今日其實係29/8,好遲先寫返呢一日發生的事...其實好想記低,因為呀敏大個仔啦...而且我哋好耐冇一齊唱 k 同行街啦.

今日同呀敏去唱 k 慶祝生日.同行的有媽媽,大家姐,蓋蓋,四家姐,樺爾同我.
可能人多d,可以畀我哋唱耐d,都唱個夠啦.媽媽今日把聲特別好,唱<<往事只能回味>>唱得真係好.
阿dee 就唱首<<不死傳說>>唱得特別起勁,皆因未唱過就會有心機d唱呱...之後又返番去"古巨基暨李克勤金曲秀".

同大家姐唱親k都係蓋蓋畀錢6_#,不過如果畀完錢仲繼續唱落去,大家姐就會好唔好意思猛嗌話要走6_-其實又唔係話賴死唔走,唔好咁介意啦.

唱完 k 就同阿敏執吓d 裝備,去宿舍當然有對涼鞋方便 d 啦.我哋去咗平時成去果間綠楊Mirabell分店,唔知今日個Sale屎做乜鬼(咁屎差的服務態度,就唔好學人做 Sales 啦),我哋問吓佢第二間分店有冇新貨,問佢係唔係千色店度攞過嚟啫,咁就畀個黑面我哋,之後仲Ignore我哋,唔理我哋...真係有冇搞錯,貓弟弟今日生日,你咁樣掃佢興?!真係呀,我哋都係諗住自己走一轉唔駛佢走咁啫,個Sale屎就好似覺得冇咗單deal做唔成生意就發我哋霉氣,好彩我哋都係 d 好脾氣的人啫,如果唔係唔想鬧到咁鬧彊,真係同佢玩嘢,port到佢飛起啦.
冇佢咁好氣就自己去咗千色店的分行再問過,揀來揀去,人太多,等都有排等,都叫咗阿敏你早d 去買啦.搞到依家斷哂碼,冇你要的藍色啦.其實橙色係最靚架,買啦!
買完鞋,仲有時間同佢去 Colombia 度揀短褲同T-恤添,好彩$300 Cash coupon可以用得著,三個item 仲有15% off,嘩,找數都係$70. 好抵嘩~!

阿Dee話,好似冇同我去行過街,其實係冇同我行街買衫,以前同阿敏去行街,通常都係去睇電腦同睇戲,之後跟手去 M 記度食個麥樂雞餐,阿敏次次都狂點茄汁,我點點吓就慣咗用甜酸醬去點...上次我去 M 記買個包餐,收銀問我:"你要唔要茄汁呀?"我真係有個衝動同佢講話我想點甜酸醬!