遊後記 - 之三

食大娘餃子 -> 與舅父同遊同里 -> 返酒店稍息 -> 樺爾呀姨輩親屬晚飯樺爾於"滄浪賓館"
"同里"呢個地方其實都幾多嘢睇,不過入場費就分好多個區域,我哋買全票,但係就冇時間睇晒裏面所有嘢.嘩,佢都真係幾識"略水",要聽介紹,就要入錢去聽.有d所謂珍貴的景物,即使用自己的相機影相都要逐張收一元,每一個觀賞區都有幾個咁的"一元位",仲有d呀嬸把守著,隨時問你攞錢,有次我就唔覺意叫咗舅父同樺爾一齊影咗張,都未準備好,我閃一閃,佢哋就攤手問我哋攞喇,真係"天下豈有此理",之後,我當然小心d偷拍,又或者唔同閃燈啦!佢哋唔會理o個 d 冇閃到的人架.

夜晚返到酒店,沖完涼都十一點幾啦,心血來潮開吓個電話,點知見到原來 Mabel 同 Pui Yee 都搵過我,本來之前約咗佢哋14/8見面,返蘇州改咗期,好應該同佢哋講一聲,點知我又冇咗件事,搞到好似"冇尾飛陀"咁...仲要兩個壽星女打電話約我,仲 Call 極都唔覆機,直頭好似失咗蹤咁.見到個留言,就即刻打個短訊啦.唔多打短訊既我,打吓打吓就十二點,一次過 Send 咗兩個短訊畀佢哋,就等一等睇吓佢哋有冇回覆啦....點知,等吓等吓都瞓咗覺喇.
又係o個一句:"日有所思,夜有所夢",真係話咁易,Mabel 同 Pui Yee 又走入咗我個夢啦,夢入面唔知我哋去咗邊度,我哋好似搞緊個乜嘢活動咁,我就好笨手笨腳咁做咗d唔知乜嘢,Pui Yee 佢就講笑咁話:"唔緊要,不過你問返 Mabel 原唔原諒你就得啦."...我醒的時候都仲似為自己見過佢哋...又發覺唔係真既,都覺得好迷惘.