有抽獎呀

早幾日買咗幾張CD,有范逸臣的<<不說出的温柔>>,李克勤的2005得心應手演唱會x2...(幫Mabel買埋真係好,之前見到要$165,點知又平咗喎,$160咋.)
見到之前一路都唔肯買的古巨基2004演唱會CD版喎,$40!!忍唔住就買咗啦.


范逸臣之前三隻碟都好有水準,所以對佢的期望都幾高,但係上網聽過一兩次,好似冇以前咁好.可能未聽得熟啦.
第一首有I believe的影子.主打的不說出的温柔都ok,不過我就未想講有乜推介住.


今日拆開李克勤隻碟,原來裏面有抽獎券喎...
(唉,Mabel,你抽唔抽獎呀,31號就截止啦.對唔住,咁遲先同你講.你要,我聽日攞畀你丫!)


有乜獎?Philips大抽獎,頭獎42"Plasma電視機,2獎家庭DVD影音組合.不過,正所謂"飛利浦冇樣好",抽唔抽都罷,但係二姐夫好似對個42" Plasma有D興趣,如果抽中咗就畀佢啦....


我都冇抽獎運,所以就寫咗樺爾個名啦.


裏面其實仲要答幾條問題架,有條問題問:有乜原因買呢隻碟?


有MC揀,但係冇個啱,寫住:電視電台播放,朋友介紹,雜誌,價錢.... 之類.


喂,通通都唔啱,唯有寫其他一欄啦.畀你會寫乜呢?


我就寫:支持正版,支持李克勤!!


係咪寫得好低能?但係我就覺得呢個係一般買碟的人心態囉...我真係想寫,因為我鍾意呢隻碟,所以咪買囉.(係咪玩嘢先~?)


點解咁簡單的答案都冇?可能設計問卷的人,只會記得一d商業的原因,就係忘記咗呢件商品的賣點.如果d歌唔好聽,唔通真係會有人因為電台雜誌宣傳而影響你去買呢隻碟?以前的年代,可能仲會係咁,但係依家上網聽歌的人大有人在.要真金白銀去買唱碟,我想真係只有"喜歡"呢個原因啦.


唔係有收藏的情意結,我都應該唔會買古巨基的演唱會CD,有Karaoke版啦,同樣的歌,點解仲要花錢再買.如果價錢"合理",你有可能會為你的情意結作出你應為"合理"的做法.(所以....Mabel,你真係一個超級fans!我真係甘拜下風)


講到尾點解買?咪就係:我鍾意囉.