狗年的第一個工作天

今日開工啦,今年唔同往年啦,以前係坐嚮位到等收利是,今年就自己走去派利是.只係收到開工利是,Kenny話叫我生生性性,聽聽話話啦!這個當然啦嘛,我有名你叫,我叫"聽話"喎.


冇收大老細的兩個利是,都唔係乜損失,因為...都係唔講啦.Dolmen仲好快就拆開咗,就話,"嘩...乜得...咋!"


佢都係收到唔記得咗,年年都係咁講架啦.


今日多得坐我前面的Philip,如果唔係冇Annie的利是啦,Annie派利是,問:"你有冇份收架?"Philip就"幾歹"都話,"有呀,有呀".


咁Annie行到後面我個位,佢就話:"你冇啦喎你".


我就大嗌:"點解Philip有,我冇架?!"


Annie就知到中咗招啦,其實Philip都結咗婚,冇份收啦.


咁Annie就話:"好啦,有啦有啦,畀埋你啦!" 潑咗出去的"水"係收唔返架.


嘻嘻,好嘢,無啦啦可以屈老細畀多一年!大家姐就係大家姐!


不過佢己經有兩名啦,咁我都要"回禮"呢!


今日最搞嘢係個大老細楊小姐,佢走過嚟同我講:"下年生返個喎!"


我就估唔到佢會走過嚟,所以都遲疑咗一秒話:"哦.......好呀,我都想呀,承你貴言啦!"


嚇死佢呀,佢自然自語咁話:"係喎,或者你都想",佢本來以為同我講笑,點知畀我嚇返佢轉頭,可能冇人一結婚就咁快話想生仔喎,通常就話:遲D先!


Alan好似真係就嚟結婚,每年人哋都同佢講叫佢下年要派利是啦,但係佢就好取巧.


不過今年佢話,好呀,同我一齊生!嘩婚都未結就話同我一齊生,佢的思想真係前衛.睇嚟佢都好事近啦.恭喜恭喜!