Happy Birthday to Me

(三日一記都寫唔切,呢排都幾多嘢想寫.但係又冇時間啦.)


哈,忽然好想講吓我往年的生日,因為大個咗好似失憶咁,以前的嘢都唔多記得.再大d會唔會老人癡呆架.都係寫低佢穩陣d.


細個屋企好少搞生日會,阿Dee未出世之前我就係最細,可以話要乜,通常都係讓我先,生日唔生日都係我大哂.


細個生日可以唔洗做家務,如果做家務扮乖,媽媽就真係會讚我乖喎,(丹丹格言:做乖女唔駛日日乖,要乖就要乖足一日,間唔中乖,好過日日乖,因為日日乖,有日唔乖都係要打Pat Pat.) 阿Dee,你係唔係好明白我講乜呢~_~??因為你同我係同道中人~~嘿嘿...不過你就算唔做家務都係去讀書,而我係去瞓覺啫.


嘩,講得太遠啦,都係講返細個生日,因為我細個成日嗌頭暈,但係有雞食的時候就唔暈喎,所以唔知點解生日的時候就會有得食雞脾(其實平日都係我食),有時係雞蛋或比其他人多一份的嘢食.再大小小的時候,就食雞頸喎.......因為雞脾已經有阿Dee食囉~~(阿Dee:吹水唔沬嘴!)........哈哈,以前爸爸媽媽蒸完隻雞,會攤凍嚟切,其實係因為偷食唔可以偷得咁過份,所以咪食雞頸囉~~~


哈哈,都唔知自己講乜.總之,唔係阿Dee出世,可能我哋的生日都冇生日蛋糕食.


今年好開心呀,有五個BB同我一齊慶祝生日,又同佢哋玩捉迷藏,真係好開心,佢哋四個大BB都圍著個生日蛋糕,等我影相相,吹爉燭.瑩瑩就成日問切得蛋糕未,君君就一手攞咗塊朱古力去食喎.阿妹羨寧有媽媽抱住就好乖咁等食,雯雯就好似老師咁領唱生日歌.


生日願望呢,我真係唔係好貪心咋.總之就希望乜就靈乜啦!


今日收到好多禮物,雯雯一入屋就搶住攞份禮物畀我,因為佢唔知二家姐送乜畀我,好想我快d拆出嚟.佢以為一見到我就可以知係乜,點知我就要等食蛋糕先拆,佢同君君都好心急.君君仲"噤"吓佢估係乜添.但係我見到個Shape,估到七八成.......點知君君就代我拆咗出嚟啦!


哈哈,其實係好冇禮貌架,但係見到君君咁天真,反而覺得佢好可愛.佢仲同我講,原來"臨臨哋"的係呢個公仔呀...係姆明嚟架....因為見到同Mabel送畀我的電話繩的Size一樣,我就估到七八成係"撞禮物"啦.其實二家姐知我喜歡籃色,又知我喜歡小肥肥一族的嘢,所以就揀呢個畀我.


(哈,Mabel,係唔係好意外呢~,你知我喜歡史歷奇,所以就揀綠色,都唔係撞禮物呀.)


講真,我如果見到,我都好為難,好似兩年前我的電話繩,我兩個都買咗,因為兩個都係我的Favorite!上次呢,我就畀咗一個史歷奇畀樺爾(因為藍色好女仔,唔啱佢).....不過今次就唔會啦,因為我兩個都會用...嘿嘿...多謝哂呀. 好靚呀.


今日仲收到好多禮物架,大家姐今日唔得閒,但係佢一早送我Hello Kitty的Memory Stick + USB Cable(聖誕+新年+生日都值...我真係好喜歡呢份禮物),二家姐再送我一件"煲湯之寶"~隔油湯匙,三家姐就送手鍊畀我,四家姐就一口氣送我四樣嘢,唔知係唔係要我記得佢係"四"家姐呢,有靚靚花瓶,孫燕姿演唱會DVD,隨身袋同個掛牙刷鴨鴨,媽媽仲有大利是畀我添.至於樺爾,佢都係送我一個史歷奇的座檯飾物喎.唔知佢係唔咪想幫我買成個Collection 呢~


今晚同樺爾去咗三家姐同四家姐話好食又抵食的早稻田任食一個半小時,真係好飽,又好味,魚生大大件,大到有點吃不消....炒雜菜同豆腐都好好,燒物又唔會鹹過頭.我哋足足食咗十八款食品,加埋一都係$282兩個人,不過要入元朗,唔係人人都想去,如果唔係,就同你哋推介吓啦.


之前Kathy 同 Berry就送我有個有"Fidelity"誠實的鍊垂,好靚架,我之前同四家姐去行街都有睇過,不過因為自己知好少戴,所以冇買到.....但係,原來又會擁有喎~~你話係唔係好"橋"呢!


不過,我唔知會唔會成日戴,因為我唔想"掛羊頭賣狗肉"喎....不過我會盡量戴多d啦.


一個二個都送我頸鍊,手鍊,好似個個都想我似返個女仔多d...唔知呢個係唔係"民意素(->索)求"呢.不過,我就覺得自己都似架,所以...我係唔會變架~~~~~~~~~~!

不過都明白你哋一番苦心.我都會改少少咁啦.嘿嘿!