打籃球

以前住大坑東,因為好近樺爾打波的地方,有時仲帶埋阿Dee一齊去玩,所以成日都跟佢去打波.


依家佢逢星期日都會去打波,但係我就好耐冇跟佢去.佢間唔中都會問我去唔跟佢打,但係因為"晨咁早"的關係,我通常都大覺瞓到成十點打後先肯起身.


我有時都唔想佢個個星期都去,但係佢打波又對身體好,真係矛盾,有時都會叫佢不如唔好去一兩個星期,但係佢又唔理我喎!


本來今日落雨,叫咗佢唔好約人打波,但係d"波友"又好以波癮發作咁. 咁我就去睇吓佢哋會唔會變"落湯雞".順手就去求吓雨,睇佢哋點打啦嗱!


雨就真係有落,當我哋仲係撘緊車去旺角途中,佢個Friend到咗旺角個場就Call人話落緊雨,要轉場去尖沙咀海港城室內場.大家其實都好懷疑,唔知個場有冇得打.


咁我同樺爾就做先頭部隊啦,去到原來有個Show佔用咗個場冇得打.真係哂鬼氣!家陣仲出太陽添.個天又係唔係玩嘢?!


最抵死就係call人哋去的果個friend竟然自己都冇走去尖沙咀,反而自己就留咗嚮旺角玩喎!最後又返番旺角!樺爾原本都話照留嚮原先個場啦!


唔知係唔係的"腳頭好"啦,我一出嚟就咁多意外嘞.今次都算係結婚之後第一次見佢d"波友".仲因為"戥腳"的關係,同佢哋打咗兩場3 on 3 (三個鬥三個).


第一場我同兩個人 vs 樺爾同另外兩個人,我當然係負責Mark住樺爾啦,其實話Mark不如話係捉,起初成日畀佢走甩,我之後就直頭"駛橫手",直頭鎖住佢兩個手腕,功效顯著,10:9贏咗!


第二場我同樺爾係隊友,佢同另一個隊友好以打2 on 3咁,我的作用就係走開一面,睇佢哋表演.不過就今次就輸咗.


兩場入面,我只係入咗兩球.好唔好玩?好似玩麻鷹捉雞仔咁.好怪咁.


玩完都攰死啦.食完返屋企大覺瞓.....其實如果唔係想迴避Earma,我未必會跟樺爾咁早出去....