三日一記(之二A)

25/2 星期六
我都想早起,但係噚晚成兩點幾先瞓,起唔到身.點知叫醒我的竟然係呀Dee,其實我都唔知做緊乜,你叫我上你個Account Check email 的時候,我都仲未瞓醒.


裝裝吓電腦,咁就12:00p.m. Earma留低的菜都未食.咁就勉為其難去炒飯啦.得蛋同菜,可以變d出乜嚟呢?咁我就唯有用菜的莖部切粒,再加炒蛋,冇肉不歡的我,好似冇肉就唔知點咁.靈機一觸,不如加d辣啦.味道又唔錯喎.


繼兩年前的"生粉加蛋偷工減料打斧頭事件"之後又一新傑作!
哈哈,真係覺得自己真係天才老廚師!
不過樺爾仲自己再加辣喎!...嘿,唔識死....由得佢辣死佢啦~


煮的時候仲唔記得自己夜晚約咗Mabel佢哋食飯.諗住煮埋夜晚果餐添,我仲擔心夜晚唔夠食,好彩因為太好食的關係,自己同樺爾都食多咗,咁啱就留咗啱樺爾一個人份量的晚餐喎.


四家姐係魔鬼呀~本來想好好做自己嘢都引誘咗我出去行街街.不過睇在你話同我揀禮物的份上,咁就同你出啦....唉,反正留嚮屋企都有另一隻魔鬼要我同佢打機啦.


哈,今日出去行街好似大鄉里出城咁,好多嘢都好似好新鮮.四家姐同我行咗好多間飾物店.佢仲為我破費添.個手繪花瓶真係好靚.就好以一幅美麗的圖畫,有樹樹,有屋仔,有藍天,有白雲.四面都唔同.好靚架.多謝家姐.


嘻嘻,你仲送埋個掛牙刷的鴨鴨,真係好得意,同你一人一個隨身袋仔,好似一對咁架...
多謝家姐.