一週回顧1/7

星期六 又返媽媽屋企


今日又返媽媽屋企,因為又想見吓雯雯同瑩瑩.hehe...媽媽唔好怪我喲


見住呢兩個靚妹一日一日長大,同佢地玩的嘢都可以"有聊"d,今日二家姐同佢哋玩角色扮演,一個做侍應,一個做食客,用英文去點菜.


瑩瑩一來又大d,二來間學校好似教多d英文,瑩瑩學得又快,講得好好,又有心機學.


相反,雯雯就似乎想爭寵,所以成日引二家姐注意,淨係掛住做食客,又係咁扮食嘢.真係冇佢收.


可能又係因為要爭寵啦,雯雯仲搶咗瑩瑩睇緊的書.點知瑩瑩就話:"雯雯好自私呀!"
呢個時候的小朋友講嘢真係好真,好直接.


其實佢自己早幾個月都係咁樣,不過三家姐教佢要同人分享,唔好咁自私.點知佢自己仲識得用咗嚟話人哋添.


二家姐就因為呢個雯雯無禮貌,所以嬲嬲,其實過幾個月雯雯大少少,佢都會好似瑩瑩咁乖返架啦.


今日因為四家姐去街街,得返阿dee同爸爸媽媽一齊食晚飯,為咗細佬著想,唔想又是是但但食一餐,都係留低同爸爸媽媽一齊食啦.其實,留低又做唔到乜嘢,好浪費時間架.仲要洗碗添.


不過,有乜嘢係重要過一家人開開心心一齊呀.其實我哋個個星期都好似團年咁,點解要乜節日都團年呢?


上次三家姐講得真係好,"如果聖誕唔見面,咁我哋咪冇咗一個聖誕節囉!"


我想年年都可以同最親的人一齊過.唔好怕煩啦.其實約邊日都係想開心啫.


想同屋企人一齊睇演唱會,都係因為想大家都開心....唔知搞乜鬼,搞到連團年飯的日子都要改...只怪個李克勤,揀d咁既日子開頭場,年廿九要團年架嘛.