年廿九睇克勤(後記)

今年好少可一早就食咗團年飯,今日食咗個唔知食過乜的盤菜之後,一家人共十人一齊去捧克勤場,連瑩瑩都去睇演唱會.


公公嚮我哋臨走的時候同瑩瑩講話演唱會唔好睇架,瑩瑩同公公講拜拜時,就學公公咁講同公公講拜:

"我哋走啦,我哋去睇克勤演唱會啦,唔好睇架."


點知佢轉頭著鞋就同我哋講:"我哋去睇克勤演唱會,好好睇架!"


畀佢笑死!


嚮個紅館附近,我就抱住瑩瑩行,瑩瑩忽然又話:"克勤演唱會,你嚮邊度呀,快d出嚟啦!" .......到底佢知唔知"克勤演唱會"係乜嘢嚟架!!咁我就唯有"講解一下"啦!


點知原來話就算小孩不佔坐位都要畀錢,三家姐去補飛,仲話要佢哋畀四百元的飛,咁我哋都係買二百,擺到明搶啦!都唔知三家姐最後點先買到二百元的飛....希望佢唔係想氹媽媽而講的大話啦.


瑩瑩不嬲都好鍾意跳舞,一d都唔怕嘈,本來應該瞓覺的佢一d都唔攰.見到阿旺仲一齊唱阿旺新傳的主題曲.我又同佢玩LED燈,等佢唔會咁眼瞓,都幾湊效.


今日係克勤的頭場,所以好似都係一個試反應性質既Run down,好似一時熱烈,一時就靜d.


仲有個會出足十場的阿旺扮傻為宗仔"解圍",克勤呢個老友都算唔話得,咁都搵位幫佢落台!


克勤加兩個肥婆重重覆覆跳三次同一part舞,真係有點欺場,下次都係唔好跳好過啦.搵兩個蓋過自己把聲的人,仲唱國語添...."愛可以問誰" -_-


最奇怪就係對隻狗唱"你怎麼捨得我難過",頭一段的國語唱得又唔正...仲同狗狗唱"當找到你"!


有d編排就真係要讚,我一向都唔喜歡改原作Remix,但係今次的演唱會就加咗敲嘉士伯酒樽的"藍月亮",幾得意呀.


仲有"Victory"前奏Mix咗"十年前後"同"婚後事",都幾搞嘢.其實我都唔係聽得咁真,定係"婚前的女人",Mix得幾好.


以為"月半小夜曲"會由王蒙拉嚟拉小提琴添,因為個咪收音問題,所以個Rundown都改咗添.


佢唱好多歌都好有水準呀."我不會唱歌"仲有兩個細路一齊彈,咁先拍得住朗朗.


唔知...我可唔可以有朝一日同Mabel好似佢哋咁彈到呢首歌呢?!真係癡人說夢話!


今場只係唔想睇劉德華,我要同Mabel去行花市,啱哂,去廁所時間到啦.


不過整體都算好睇,克勤都唱咗好多首我好喜歡的歌,比較少唱的歌"沒有你．贏了世界又如何","在我身邊","一生想您","當找到你",我真係好想聽多d比較少嚮演唱會唱的歌囉,我就覺得佢應該為佢自己"星光"同"藝能動音"年代的"滄海遺珠"平反一下,好似"愛的不再是我","不必對我好","當我傾心愛上","濃情一秒"(.......唔知要數到幾時.)


我都好鍾意聽佢唱"吻別的位置,愛不釋手,空中飛人,飛花,心計,一千零一夜,未成年同盟會"...真係好.其實都有三十幾首丫.仲想點呢...都由9:45 pm 唱到差唔多1:00 am 啦.


"誰願分手"作結尾真係好好聽.其實佢真係大把好歌,點歌時間都唔係真係點歌既,如果佢真係唱"十年前後","佳節"或者"常在你左右"咁就好啦...唔知係唔係唔啱佢結婚的Feel,所以唔唱呢?


想知成個Rundown,可以睇呢度

睇得唔夠仔細唔緊要,我同Mabel聽日仲可以再睇過...多謝Mabel!同Mabel的朋友,同朋友細佬,仲有朋友細佬女友......可以睇多次,真係多得佢哋咁慷慨!第六行呀....第六行呀....!!!