克勤"得心應手"第二擊

今晚同Mabel食完麥記,同Mabel傾咗好多嘢...不過呢...我唔係一個記性好的人...可能精神唔多好...好似失咗憶咁...點算呀!!


臨入去演唱會,我哋仲買咗支電光劍...唔係,係電光棒先啱...十足十Fans!


唱咗開場的兩首歌,我哋一聽到"財神到",個Rundown真係會改架!我哋就嗱嗱聲咁走去最近的位置等,好多人都唔知佢會行到大半個會場,所以我哋先可以把守住個最佳位置,個欄杆的護衛就嚮我同Mabel之間,d人見到克勤埋緊嚟,先衝過嚟搶,所以我其實己經見唔到Mabel,諗住如果我攞到,佢冇,我就一定畀佢.


有幾個人係咁衝,過後我先知,應該係佢哋搞到我腳瘀咗! -__-


本來克勤行過咗我哋啦,我哋就大嗌"克勤",咁克勤就真係畀我哋"得心應手",最後Mabel同我都係咁的方法就叫得住佢派畀我哋!!!!!!!我哋剛見到對方攞到的一刻都一齊...Yeah!


勁開心!


有好開始的第二場,我哋又猛影相,雖然我哋係Red Zone,克勤唔係成日過嚟,不過佢都算公平過上一場,四面的觀眾都可以輪流睇度佢的正面.


其實今日好期望聽現場版的"月半小夜曲",但係Solo的過門一段由呢個王蒙拉演奏,點解唔同原曲既?!大師級啦喎,點解唔係忠於原作,而係Simplified版,兩三聲就"拉"過咗成十幾個音的節奏!


今日就有呢幾首之前一晚冇唱的歌,冬暖夏涼,回首,告別校園時,好戲之人,一生不愛別人,又冇咗神州行,眷戀,一生不變,希望(克勤果首喎),一千零一夜...我當然會覺得第二晚好聽d啦.加埋嘉賓幾首成三十九首歌喎.


不過呢個Kelly做嘉賓就真係唔得,"愛一個人"又唱得麻麻,又掛住收利是,搞到冇得玩打拍子...咁都算啦,紅日係佢同克勤一齊唱既佢仲係掛住收利是喎!

另一個嘉賓,"阿姐"...因為太早出現,冇得尿尿添,如果唔係我都走埋一邊.


今日同Mabel睇演唱會,目的同睇的方式都好唔同,同Mabel睇就係Fans睇Show,要攞到佢手上的利是,要揮手 --我好乖架,要打拍子,要影到佢大頭,要同佢握到手先至算好.(我哋得一樣做唔到,都算幾好啦!)


Mabel同我講,佢話克勤講Lucky的時候佢聽到留眼淚,佢話克勤都講到落淚,但係我就剛好睇唔到.聽到佢講,我雖然明白佢的感受,同一隻愛犬十年的生活,有咁深的感情係好正常既,不過我就唔可能感同身受.Mabel,你有朝一日都要有心理準備....(大吉利是!)


哈哈,今日收獲都好豐富啦,有相,又有電話蠅在內的利是,仲想點!


多謝Mabel!好多謝你返到屋企仲陪我傾電話送我返屋企丫!

勁開心!