返媽媽屋企其實為見瑩瑩

hehe...放工喇,本來想要出街食,不過問吓四家姐,原來瑩瑩成日都留響婆婆屋企,仲未走喎!嘻嘻..媽媽...唔好意思講句...返媽媽屋企其實為咗見瑩瑩咋...
見到四家姐用我同佢一齊買的Nokia 6230i影既相同video都真係幾好,而且見到瑩瑩扮超人好似龍珠的精英軍團咁,做個超人變身之後隻手仲擺吓擺吓好搞笑.
D BB大到呢個歲數,開始講好多好刁鑽奇怪的"推理"的說話,真係各有"特色",好以前呀D細個咁,有"南"(男)風窗同女風窗",今日媽媽問瑩瑩知唔知佢叫乜名,瑩瑩竟然話係"謝麗婆"!而公公仲變咗係"謝麗公"!
瑩瑩雖然好鍾意舅父,但係見到樺爾丈丈又好鍾意同佢玩,可能真係"新屎坑三日香",同舅父玩咗成日,見到樺爾又話好鍾意同佢玩喇.
呢個瑩瑩就成日唔食嘢掛住玩,搞到爹哋要發佢老痺,跟住當然又喊啦,四家姐同我當然就唔會錯過呢個"精彩"片段,對住瑩瑩猛影,三姐夫見到都忍唔話:"乜你哋兩個姨姨都咁殘忍架,見到呢d係咁影係咁影既!唔係去氹佢既?!"試機呀嘛,嘿嘿...證實咗NEC既N840雖然有200萬像,但係都冇Nokia 6230i的Display同處理咁好....唉...我都想要Nokia 6230i呀.
媽媽一見到我,就成日話我仲係熊貓眼,叫我要休息多d.佢話,人哋做新娘做到容光煥發,我做新娘就見住我殘.仲講笑話梗係樺爾唔幫手做家務所以做殘咗我添.哈...有時候真係既...不過,除咗煮嘢食之外,樺爾都成日幫手架啦.
今日仲特登買咗阿敏的Favourite--"踩屎糖"(采詩糖)添...估唔到都仲係咁好味.三家姐仲示範咗食蝦餅的奇怪食法,佢無啦啦就握實拳頭打碎塊蝦餅,佢話食蝦餅就係為咗聽呢吓"dub"碎聲... 6_^! 原來做咗媽媽的三家姐係咁變態架!(唔係...係一路都咁變態先係!)不過千祈唔好教壞哂瑩瑩先好呀.
阿敏同四家姐成日話要食冰冰,買咗又唔記得佢哋一齊食,匆匆忙忙又返番屋企去啦.好彩有三姐夫載我哋返去屋企啫!瑩瑩仲唔肯坐後坐,企咗響度係都要話要坐前面,要我捉佢坐後面先肯.