見雯雯雙重心痛

樺爾依家真係取代咗我響的地位,雯雯本來好鐘意同我玩,不過可能我成日掛住同二家姐傾計,樺爾就可以一心一意同佢哋玩,所以d BB 都同佢好玩d....(為自己找藉口辯護?)
樺爾又同佢玩拼圖,就食飯喇,雯雯其實淨係食樹樹,食脹咗個肚就算.食完飯玩咗一陣,雯雯就想拉樺爾入去佢的閨房,仲指明唔可以帶我入去添~~!嗚~~6_<~~~~~
我當場就係咁咇d眼淚啦,希望雯雯氹吓我帶我入去,但係雯雯就呆咗,可能佢知道搞喊咗我啦.咁我就問佢可唔可以帶埋我入去佢間房呀,佢先肯帶咋,但係就拖住樺爾隻手入去,我又問,雯雯你唔拖我架,雯雯就細細聲話:"你要自己行入去呀" ~~~~~~~~~ 我真係好想C計劃(lur 地)!真係心傷.
入咗房,樺爾又用佢的電話相機同雯雯影相相,雯雯又同我地影,但係唔係好似水彩畫咁花哂就係cut頭,終於有一張叫做見得吓人咁啦.雯雯影親相就好開心,"喳"住個相機就唔理自己身處何地,我噤啱就同二家姐講緊個抽氣扇的事,一轉眼,樺爾原來去咗睇吓停雨未,咁就出事喇....雯雯同個相機一齊由佢既新床樓梯度跌咗落嚟,撞傷咗小腿!聽佢失聲的秒數就知道唔少嘢...不過總算好彩冇撞親重要部位.見到佢喊個心都痛埋...樺爾的手機好似就short short 地...唔知有冇問題添.
之後許sir仲同二家姐,雯雯一齊送我哋去油麻地...嘩一家大細嚟送我哋走,真係夠哂排場!
咁啱就係我公司樓下落車,我心想...好似玩飛行棋咁,四隻疊哂一齊,點知畀人撞中咗,要打返回頭,返回起點.
返屋企前,仲去搵阿聰幫手借個 Linksys Wireless Receiver 添...真係矛盾,又想用個 Linksys 就解決問題,但係又接受唔到個Buffalo 真係咁不濟?! 都係返屋企再試清楚d先.
都未試過咁夜無啦啦搵朋友...以前都冇可能咁做...或者,真係獨立咗,又可以"放縱"吓自己.話唔定有一日,我可以話約吓 friend 無啦啦去飲吓嘢,又唔駛管住自己幾時要返屋企.唉,好奇怪...夠鐘就返屋企,想打電話畀朋友又冇咁做...日復一日...咁幾時先搵人?