今日同事嚟我屋企

今日朝早成日都落大雨,本嚟想出去食嘢,之後再去買嘢招呼佢哋添.睇嚟可能佢哋嚟唔到喎...不過只係Joseph 嚟唔到,佢仲千叮萬囑叫Dolmen帶UNO添...我連UNO都冇... 但係又唔記得攞屋企的過嚟6_-!.Joseph 都算唔話得啦,嚟唔到,都記住為我安排.
Kelvin & Fion, Philip & Flora 都一齊嚟,仲一個帶豆腐花,一個帶果汁香檳添.不過 Philip 睇咗一陣相就要早走,所以就冇飲到支果汁香檳.後來嚟到的Dolmen,Daisy & Roy,睇咗一陣相就玩吓外型好似台灣麻雀的數字遊戲,之後玩咗一陣UNO先走.
佢地幾個的腦都轉得幾快喎...不過我就...唔知點解一玩要用腦的遊戲我就唔知個腦去咗邊,個數字遊戲切嚟切去咁,明明可以贏都仲要kelvin指點添.
玩 UNO 時,樺爾坐響Kelvin隔籬,本來唔係罰佢都變咗罰佢,我仲係咁罰佢添,Roy 就唔記得咗點玩,幾舖之後就一馬當先,之後都反魂無術啦,不過樺爾就後來趕上,勢均力敵,雙雙包尾收場.Dolmen 同 Fion 就唔錯 Keep到100分左右.
今日都真係幾好彩,佢哋嚟的時候又冇乜雨,走的時候又冇雨,響屋企的時候,反而有時雨勢頗大添.
今日買咗炸魚皮,Dolmen就話幾好食...我之前同樺爾食得太多熱氣嘢,今日都唔敢食喇,所以都冇試到添.下次都要買多次先.

晚上又試吓煮飯仔,今次玩大堆頭,一味靠多,有青椒絲金菇粟米仔炒豬肉,我仲首次煲呢煲豬展節瓜湯,豬展煲得欠咗少少火"候".不過還可以啦.
今日終於都同樺爾打贏咗 PS2 版的 NBA Game 啦,同佢夾咗5舖,第一次輸30分,第二次輸20分,之後10分,8分,終於都贏咗喇...不過唔係樺爾帶著我諗都係70比2x咁上吓.不過PS2好屈,內線打唔到,用 Rocket 的姚明入緊樽,竟然可以畀矮佢成節的人 Block 到!